દુષ્કર્મ કેસમાં સજા ભોગવતા પૂર્વ સાંસદને જેલમાં VIP સુવિધા? ફોનમાંથી મળ્યા અશ્લીલ વીડિયો

Prajwal Revanna Cell Phone Raid : બેંગલુરુની પરપ્પના અગ્રહાર સેન્ટ્રલ જેલમાં આજીવન કેદની સજા ભોગવી રહેલા પૂર્વ જનતા દળ (સેક્યુલર) સાંસદ પ્રજ્વલ રેવન્નાની બેરેક પર ગત 11 ઓગસ્ટના રોજ ક્રાઈમ બ્રાન્ચના અધિકારીઓ દ્વારા દરોડો પાડવામાં આવ્યો હતો. આ દરમિયાન રેવન્ના જેલની અંદર મોબાઈલ ફોન વાપરતો ઝડપાયો હતો. સુરક્ષાની દૃષ્ટિએ અત્યંત સંવેદનશીલ ગણાતી આ હાઈ-સિક્યોરિટી બેરેકમાંથી અધિકારીઓએ મોબાઈલ ફોન ઉપરાંત એક ચાર્જર, પેન ડ્રાઈવ અને નોટબુક પણ જપ્ત કરી હતી. જપ્ત કરાયેલા આ તમામ ડિજિટલ ઉપકરણોને તાત્કાલિક ફોરેન્સિક વિશ્લેષણ માટે મોકલી આપવામાં આવ્યા હતા, જેનો રિપોર્ટ હવે સામે આવ્યો છે.

ફોરેન્સિક રિપોર્ટમાં અનેક ડિજિટલ ફાઇલોનો ખુલાસો

ફોરેન્સિક વિશ્લેષણના રિપોર્ટથી એ વાતનો ઘટસ્ફોટ થયો છે કે જપ્ત કરાયેલા મોબાઈલ ફોન અને અન્ય ઉપકરણોમાં મોટી સંખ્યામાં બિભત્સ વિડિઓ અને પેન ડ્રાઈવમાં વિવિધ બિભત્સ વેબ સીરિઝ મળી આવી છે. આ ઘટના સામે આવ્યા બાદ રાજ્યની જેલ સુરક્ષા વ્યવસ્થા સામે ફરી એકવાર ગંભીર સવાલો ઊભા થયા છે કે કેવી રીતે હાઈ-સિક્યોરિટી ઝોનમાં પ્રતિબંધિત વસ્તુઓ પહોંચી શકે છે. અગાઉ પણ જેલની અંદર 'વીઆઈપી' કેદીઓને મળતી ખાસ સગવડો અને છૂટછાટોને લઈને ભારે ચર્ચા થઈ ચૂકી છે.

પૃષ્ઠભૂમિ અને જેલના કડક નિયમો

ઉલ્લેખનીય છે કે પ્રજ્વલ રેવન્ના એ પૂર્વ વડાપ્રધાન એચ.ડી. દેવેગૌડાનો પૌત્ર અને કેન્દ્રીય મંત્રી એચ.ડી. કુમારસ્વામીનો ભત્રીજો છે. તે એક મહિલા સામેના ગંભીર કેસમાં દોષિત સાબિત થયા બાદ હાલ જેલમાં આજીવન કેદની સજા ભોગવી રહ્યો છે. જેલના કાયદા અને નિયમો અનુસાર, કોઈપણ કેદી માટે વ્યક્તિગત મોબાઈલ ફોન, સિમ કાર્ડ અને ઇલેક્ટ્રોનિક કોમ્યુનિકેશન ડિવાઈસ રાખવા પર સંપૂર્ણ પ્રતિબંધ હોય છે. કેદીઓ માત્ર નિયંત્રિત લેન્ડલાઈન અથવા પબ્લિક કોલ ઓફિસ દ્વારા જ સંપર્ક કરી શકે છે. આ ગંભીર ત્રુટિ સામે આવતા સત્તાવાળાઓએ તાત્કાલિક ધોરણે એક જવાબદાર જેલ અધિકારીને સસ્પેન્ડ કરી દીધા છે અને સમગ્ર મામલે ઊંડી તપાસના આદેશ આપ્યા છે.