બરફ વર્ષાના કારણે લેહ હાઈવે પર અનેક વાહનો ફસાયા
જમ્મુ-કાશ્મીરના જોજિલાપાસના ઝીરો પોઈન્ટ સોનમર્ગમાં હિમવર્ષાથી પર્વતોએ સફેદ ચાદર ઓઢી
જમ્મુ-કાશ્મીરના સોનમર્ગમાં સિઝનની પહેલી હિમવર્ષા થતા પર્વતોએ જાણે સફેદ ચાદર ઓઢી હોય તેવી સ્થિતિ સર્જાઈ હતી. આકાશમાંથી પડતા બરફનો નજારો જોવા પ્રવાસીઓ પ્રવાસન સ્થળો તરફ આકર્ષાયા હતા. હવામાન વિભાગે જમ્મુ-કાશ્મીરમાં ૪થી ૭ ઑક્ટોબર સુધી વેસ્ટર્ન ડિસ્ટર્બન્સ સક્રિય થવાની અને તેને પગલે અનંતનાગ, પહલગામ, કુલગામ, સિંથન પાસ, શોપિયાં, પીરની ગલી, સોનમર્ગ-જોજિલામાં હિમવર્ષાની આગાહી કરી હતી. હવામાન વિભાગે ચેતવણી આપી હતી કે, પ્રતિકૂળ વાતાવરણના કારણે જમ્મુ-શ્રીનગર અને શ્રીનગર-લેહ નેશનલ હાઈવેની સાથે અન્ય મહત્વના માર્ગો પર ટ્રાફિક ખોરવાઈ શકે છે.
દરમિયાન હિમાચલ પ્રદેશના પ્રવાસન સ્થળો મનાલી અને લાહૌલમાં પણ સિઝનની પહેલી હિમવર્ષા પડી હતી. મનાલી અને લાહૌલમાં પણ પર્વતો સફેદ બની જતા પ્રવાસીઓ આ સુંદર નજારો જોવા ઉમટી પડયા હતા. જોકે, રોહતાંગ, બારાલાચા, શિંકુલા અને કુંજુમ પાસ સહિત ગ્રામીણ વિસ્તારોમાં હિમપ્રપાત થયો હતો, જેને કારણે લેહ-મનાલી હાઈવે પર અનેક વાહનો ફસાઈ ગયા હતા. બારાલાચા અને શિંકુલા પાસ નજીક પણ અનેક વાહનો ફસાયા હતા. હિમપ્રપાતના કારણે લેહ જતા પેટ્રોલ અને ડીઝલના ટેન્કરોને મઢીમાં રોકવા પડયા હતા. આ સિવાય રોહતાંગ પાસમાં પ્રવાસીઓના વાહનોને પણ રોકવામાં આવ્યા હતા.
