દિલ્હીના કરુણ દૃશ્યો | બ્લાસ્ટ નજરે જોનારાએ કહ્યું- ઠેર ઠેર લોકોના મૃતદેહો વિખેરાયેલા હતા

Car Blast In Delhi’s Red Fort : રાજધાની દિલ્હીમાં લાલ કિલ્લા મેટ્રો સ્ટેશનના ગેટ નંબર-1 પાસે એક કારમાં ભયાનક વિસ્ફોટ થવાની ઘટનામાં આઠ લોકોના મોત અને 16 લોકો ઈજાગ્રસ્ત થયા હોવાની માહિતી સામે આવી છે. ઘટનાસ્થળ પર હાજર નજરે જોનારાઓએ કહ્યું કે, બ્લાસ્ટ બાદ ક્યાંક લોકોના હાથ પડ્યા છે, તો ક્યાંક ફેફસાં પડ્યા હતા.

‘વાહનની પાસે ઉભેલા લોકોના ચિથડા ઊડ્યા’

ઘટનાને નજરે જોનારાએ કહ્યું કે, ‘કારમાં ભયાનક વિસ્ફોટ થવાના કારણે વાહનની પાસે ઉભેલા લોકોના ચિથડા ઉડી અનેક મીટર દૂર સુધી વિખેરાયા હતા.’ ઈજાગ્રસ્તોને તાત્કાલીક લોક નાયક સરકારી હોસ્પિટરમાં ખસેડવામાં આવ્યા છે. જ્યારે પોલીસની ટીમે મૃતદેહોના વેરવિખેર થયેલા અંગોને પોલિથીનમાં ભરીને તપાસ માટે મોકલી રહી છે. રિપોર્ટ મુજબ, ઘટના સ્થળ પર પાંચતી છ વાહનોના ચિથડા ઉડી ગયા હતા. અહીં ઈકો વેનમાં વિસ્ફોટ થયો હોવાની સંભાવના છે.

‘ઘટનાસ્થળે હાથ પડેલો હતો, ફેફસું પડેલું હતું’

નજરે જોનારાઓએ એમ પણ કહ્યું કે, અમે સાઈડમાં જોયું તો કોઈ વ્યક્તિનો હાથ પડેલો હતો. એટલું જ નહીં ત્યાં ફેફસાં પણ પડેલું હતું. કોઈ વ્યક્તિ વિચારી પણ ન શકે કે અચાનક શું થયું? બ્લાસ્ટ થતા અને વેરવિખેર અંગો જોતાં જ અમે ગભરાઈ ગયા હતા અને તુરંત ત્યાંથી આગળ જતા રહ્યા હતા.

રાજધાનીમાં હાઈએલર્ટ, પોલીસ કાફલો ખડકી દેવાયો

લાલ કિલ્લાના ગેટ નંબર-1ની પાસે ઉભેલી કારમાં ભયાનક વિસ્ફોટ થયો હતો. વિસ્ફોટ એટલો ભયાનક હતો કે, તેની આગે આસપાસની અનેક કારોને ઝપેટમાં લઈ લીધી હતી. ઘટના બાદ આખા વિસ્તારમાં અફરાતફરી મચી ગઈ છે. દિલ્હી પોલીસે આખી રાજધાનીમાં હાઈએલર્ટ જાહેર કરી દીધું છે. પોલીસે તાત્કાલીક કાર્યવાહી કરીને આખા વિસ્તારને કોર્ડન કરી દીધું છે. અહીં સામાન્ય વાહનોની અવર-જવર પણ અટકાવી દેવાઈ છે. ઘટનાસ્થળે પોલીસનો કાફલો ખડકી દેવાયો છે.