રાહુલ ગાંધી આવતા મહિને યુરોપના પાંચ દિવસના પ્રવાસે જશે, ઘણા કાર્યક્રમોમાં આપશે હાજરી

કોંગ્રેસ નેતા રાહુલ ગાંધી સપ્ટેમ્બરના પ્રથમ સપ્તાહમાં યુરોપનો પાંચ દિવસનો પ્રવાસ કરે તેવી શક્યતા છે. સૂત્રોના જણાવ્યા મુજબ 7 સપ્ટેમ્બરે રાહુલ ગાંધી તેમના વિદેશ પ્રવાસ દરમિયાન બેલ્જિયમમાં યુરોપિયન કમિશનના સાંસદોને મળશે. 

રાહુલ ગાંધીએ અમેરિકાનો લાંબો પ્રવાસ કર્યો હતો

સુત્રોમાંથી મળતી માહિતી મુજબ રાહુલ ગાંધી આગામી મહિને યુરોપના પાંચ દિવસના પ્રવાસે જનાર છે જેમાં તેઓ 8 સપ્ટેમ્બરના રોજ પેરિસમાં યુનિવર્સિટીના વિદ્યાર્થીઓને સંબોધિત કરશે તેમજ 9 સપ્ટેમ્બરે પેરિસમાં મજૂર સંગઠનની બેઠકમાં ભાગ લેશે. આ પછી તે નોર્વે જવાના છે, જ્યાં 10 સપ્ટેમ્બરે વિદેશી ભારતીયોને સંબોધિત કરીને એક પ્રેસ કોન્ફરન્સને પણ સંબોધિત કરી શકે છે. રાહુલ ગાંધીનો યુરોપ પ્રવાસ એવા સમયે થઈ રહ્યો છે જ્યારે નવી દિલ્હીમાં 9-10 સપ્ટેમ્બરે G-20 સમિટ યોજાવા જઈ રહી છે. ઉલ્લેખનીય છે કે આ વર્ષે મે મહિનામાં રાહુલ ગાંધીએ અમેરિકાનો લાંબો પ્રવાસ કર્યો હતો. કોંગ્રેસના નેતાએ સાન ફ્રાન્સિસ્કો, વોશિંગ્ટન ડીસી અને ન્યૂયોર્કના શહેરોમાં ભારતીય પ્રવાસીઓ, સાહસિક મૂડીવાદીઓ અને ધારાશાસ્ત્રીઓ સાથે વાતચીત કરી હતી.

સુનીતા વિશ્વનાથને મળવા પર સવાલો ઉઠ્યા હતા

રાહુલ ગાંધી તેમના અમેરિકા પ્રવાસ દરમિયાન સુનિતા વિશ્વનાથને મળ્યા હતા. આ અંગે ભાજપે આરોપ લગાવ્યો હતો કે કોંગ્રેસના નેતા અમેરિકાની મુલાકાત દરમિયાન એવા લોકોને મળ્યા હતા, જેમના સંબંધો ભારત વિરોધી ગતિવિધિઓમાં સામેલ હોવાનું જાણવા મળ્યું હતું. ભાજપે માંગ કરી હતી કે રાહુલ ગાંધીએ સત્ય જણાવવું જોઈએ કે તેઓ સુનિતા વિશ્વનાથને કેમ મળ્યા, જેઓ જ્યોર્જ સોરોસ દ્વારા ભંડોળ પૂરું પાડવામાં આવતી કંપની સાથે સંકળાયેલા છે.