Bypolls Result 2025: આજે(14 નવેમ્બર) બિહાર વિધાનસભા ચૂંટણી સહિત કુલ 7 રાજ્યોની 8 બેઠકો પર યોજાયેલી પેટાચૂંટણીના પરિણામો જાહેર થઈ ચૂક્યા છે. આ મહત્ત્વપૂર્ણ ચૂંટણીઓમાં જમ્મુ-કાશ્મીર, રાજસ્થાન, ઝારખંડ, તેલંગાણા, પંજાબ, મિઝોરમ અને ઓડિશાના મતદારોએ વર્ષની શરુઆતમાં ખાલી પડેલી આ 8 બેઠકો માટે નવા જનપ્રતિનિધિઓની પસંદગી કરી છે. જેમાં રાજસ્થાનની અંતા, ઝારખંડની ઘાટશિલા, પંજાબની તરનતારન, તેલંગાણાની જ્યુબિલી હિલ્સ, મિઝોરમની ડમ્પા, ઓડિશાની નુઆપાડા અને જમ્મુ-કાશ્મીરની બડગામ તથા નગરોટા બેઠકનો સમાવેશ થાય છે.
Bypoll Election Results
પેટાચૂંટણી વાળી 8 બેઠકોના પરિણામ જાહેર
જમ્મુ-કાશ્મીરના બડગામમાં પણ BJPની હાર
જમ્મુ-કાશ્મીરના બડગામ (Budgam) બેઠક પરથી આગા સયૈદ મુન્તઝિરએ જીત નોંધાવી છે. જમ્મુ અને કાશ્મીર પીપલ્સ ડેમોક્રેટિક પાર્ટી (PDP)ના ઉમેદવાર મુન્તઝિરને કુલ 21,576 વોટ મળ્યા છે.
કોંગ્રેસના નવીન યાદવની જ્યુબિલી હિલ્સમાં 24,729 વોટથી જીત
તેલંગાણાની જ્યુબિલી હિલ્સ વિધાનસભા પેટાચૂંટણીના અંતિમ પરિણામો અનુસાર, કોંગ્રેસના ઉમેદવાર નવીન યાદવે 98,988 મત મેળવીને વિજય હાંસલ કર્યો છે. જ્યારે BRSના મગંતી સુનીથા 74,259 મતો સાથે પાછળ રહ્યાં. આ રીતે, કોંગ્રેસે આ બેઠક પર 24,729 મતોની નિર્ણાયક બહુમતી સાથે જીત નોંધાવી છે.
પંજાબની તરનતારન બેઠક પર આમ આદમી પાર્ટીની જંગી સરસાઈ
તરનતારન વિધાનસભા પેટાચૂંટણીના 15 રાઉન્ડની મતગણતરી પૂર્ણ થઈ ગઈ છે. જેમાં, આમ આદમી પાર્ટીના ઉમેદવાર હરમીત સિંહ સંધૂ 11,317 મતોની મજબૂત લીડ સાથે જીતી ગયા છે. 28,852 મત મેળવીને શિરોમણી અકાલી દળના ઉમેદવાર સુખવિંદર કૌર બીજા સ્થાને છે. જ્યારે, ખાલિસ્તાન સમર્થક સાંસદ અમૃતપાલ સિંહના સમર્થનવાળા ઉમેદવાર ત્રીજા ક્રમે છે અને કોંગ્રેસના ઉમેદવાર ચોથા ક્રમે છે.
રાજસ્થાનની અંતા બેઠક પર કોંગ્રેસની શાનદાર જીત
રાજસ્થાનની અંતા વિધાનસભા બેઠક પર કોંગ્રેસે દમદાર જીત નોંધાવી છે. કોંગ્રેસના ઉમેદવાર પ્રમોદ જૈન ભાયાને 69,462 મત મળ્યા છે. જ્યારે ભાજપના મોરપાલ સુમન બીજા ક્રમે રહ્યા, તેમને 53,868 મત મળ્યા છે. અપક્ષ ઉમેદવાર તરીકે લડેલા નરેશ મીણાને 53,740 મત મળ્યા છે.
ભાજપે અંતાની સાથે સાથે મિઝોરમમાં પણ હારનો સામનો કર્યો છે. આ ઉપરાંત, ઝારખંડની ઘાટશિલા બેઠક પર પણ પાર્ટી હજી પાછળ ચાલી રહી છે.
જ્યુબિલી હિલ્સ પેટાચૂંટણી: કોંગ્રેસના ઉમેદવાર નવીન યાદવની લીડ
કોંગ્રેસના ઉમેદવાર નવીન યાદવે જ્યુબિલી હિલ્સ વિધાનસભાની પેટાચૂંટણીમાં 79634 વોટથી આગળ
નગરૌટામાં ભાજપની જીત
જમ્મુ-કાશ્મીરના નગરૌટામાં ભાજપનો વિજય, 24647 વોટથી દેવ્યાની રાણાની ભવ્ય જીત
ઝારખંડ ઘાટશિલા પેટાચૂંટણી: JMMના સોમેશ સોરેનની લીડ જળવાઈ
ઝારખંડની ઘાટશિલા બેઠક પર મતગણતરીના પાંચમા રાઉન્ડ પછી, ઝારખંડ મુક્તિ મોરચા(JMM)ના ઉમેદવાર સોમેશ ચંદ્ર સોરેન 23,898 મતો સાથે આગળ ચાલી રહ્યા છે. તેઓ ભાજપના બાબુલાલ સોરેન (જેમને 16,794 મત મળ્યા છે) કરતાં આગળ છે.
પંજાબમાં AAP અને તેલંગાણામાં કોંગ્રેસની સરસાઈ
પંજાબની તરનતારન વિધાનસભા બેઠક પર આમ આદમી પાર્ટી(AAP)ના હરમીત સિંહ સંધુ આગળ ચાલી રહ્યા છે. જ્યારે, તેલંગાણાની જ્યુબિલી હિલ્સ બેઠક પર કોંગ્રેસના નવીન યાદવ આગળ છે. ભારતીય રાષ્ટ્ર સમિતિ(BRS)ના સુનીતા ગોપીનાથ બીજા ક્રમે છે અને ભાજપના દીપક રેડ્ડી ત્રીજા સ્થાને છે.
જ્યુબિલી હિલ્સમાં કોંગ્રેસના વી. નવીન યાદવની ચોથા રાઉન્ડમાં સરસાઈ વધુ મજબૂત
જ્યુબિલી હિલ્સ વિધાનસભા પેટાચૂંટણીની મતગણતરીના ચાર રાઉન્ડ પૂરા થયા બાદ, કોંગ્રેસના ઉમેદવાર વી. નવીન યાદવે 38,566 મતો સાથે પોતાની સરસાઈ મજબૂત કરી છે. તેઓ BRSના મગંતી સુનીથા ગોપીનાથ(29,007 મત)થી આગળ ચાલી રહ્યા છે. ભાજપના લાંકલા દીપક રેડ્ડી પાસે 7296 મત છે, જ્યારે NOTA 387 મતો સાથે ચોથા સ્થાને છે.
J&K, ઓડિશામાં ભાજપ; જ્યુબિલી હિલ્સ અને અંતામાં કોંગ્રેસ આગળ
8 વિધાનસભા બેઠકો પર મતગણતરી ચાલુ છે, ત્યારે સવારે 11:00 વાગ્યાના પ્રારંભિક વલણો મિશ્ર ચિત્ર રજૂ કરે છે, જેમાં...
- ભાજપ જમ્મુ-કાશ્મીરની નગરોટા અને ઓડિશાની નૂઆપડા બેઠક પર આગળ છે.
- કોંગ્રેસ તેલંગાણાની જ્યુબિલી હિલ્સ અને રાજસ્થાનની અંતા બેઠક પર સરસાઈ ધરાવે છે.
પ્રાદેશિક પક્ષો પણ પોતાની છાપ છોડી રહ્યા છે, જેમાં...
- JMM(ઝારખંડ મુક્તિ મોરચા)ના સોમેશ ચંદ્ર સોરેન ઘાટશિલા(ઝારખંડ)માં આગળ.
- PDP(પીપલ્સ ડેમોક્રેટિક પાર્ટી)ના મુન્તઝીર મેહદી બડગામ(J&K)માં આગળ.
- MNF(મિઝો નેશનલ ફ્રન્ટ)ના ડૉ. આર. લાલથાંગલિયાની દમ્પા(મિઝોરમ)માં જીત.
- AAP(આમ આદમી પાર્ટી)ના હરમીત સિંહ સંધુ તરન તારન(પંજાબ)માં આગળ.
મિઝોરમની દમ્પા બેઠક પર MNFના આર. લાલથાંગલિયાનાની જીત
મિઝોરમની દમ્પા વિધાનસભા પેટાચૂંટણીમાં, મિઝો નેશનલ ફ્રન્ટ(MNF)ના ઉમેદવાર અને પૂર્વ મંત્રી આર. લાલથાંગલિયાનાએ ઝોરમ પીપલ્સ મૂવમેન્ટ(ZPM)ના ઉમેદવાર વનલાલસૈલોવાને 562 મતોના માર્જિનથી હરાવ્યા છે. શુક્રવારે પરિણામો જાહેર થતાં વિપક્ષ MNF માટે આ એક વિજય સાબિત થયો છે.
જ્યુબિલી હિલ્સમાં કોંગ્રેસના નવીન યાદવની ત્રીજા રાઉન્ડમાં BRS પર મોટી સરસાઈ
જ્યુબિલી હિલ્સ વિધાનસભા પેટાચૂંટણીની મતગણતરીના ત્રણ રાઉન્ડ પૂર્ણ થયા બાદ, કોંગ્રેસના ઉમેદવાર નવીન યાદવે કુલ 28,956 મત મેળવ્યા છે. તેઓ BRSના મગંતી સુનીથા ગોપીનાથ કરતાં 6012 મતોની સરસાઈથી આગળ ચાલી રહ્યા છે. આ સિવાય, ભાજપના એલ. દીપક રેડ્ડીને 5341 મત મળ્યા છે, જ્યારે NOTAમાં 280 મતો છે.
જમ્મુ-કાશ્મીર બડગામ પેટાચૂંટણીમાં PDPના આગા સૈયદ મુન્તઝીર મેહદીની લીડ
જમ્મુ-કાશ્મીર બડગામ વિધાનસભા બેઠકની મતગણતરીમાં, PDPના ઉમેદવાર આગા સૈયદ મુન્તઝીર મેહદી 1000 મતોની સરસાઈ સાથે આગળ છે. ગણતરી આગળ વધતાં તેમણે અગાઉ આગળ રહેલા NCના આગા સૈયદ મહમૂદ અલ-મોસાવી અને અપક્ષ ઉમેદવાર નઝીર અહમદ ખાનને પાછળ છોડી દીધા છે.
રાજસ્થાનમાં ભાજપને ફટકો
રાજસ્થાનની અંતા વિધાનસભા બેઠક પર પાંચ રાઉન્ડની ગણતરી પૂરી થતાં, કોંગ્રેસના પ્રમોદ જૈન ભાયાએ ફરી એકવાર સરસાઈ મેળવી છે, જેનાથી ભાજપને ફટકો પડ્યો છે. નરેશ મીણા બીજા ક્રમે છે, જ્યારે ભારતીય જનતા પાર્ટીના મોરપાલ ત્રીજા નંબરે ચાલી રહ્યા છે.
અંતા બેઠક પર ભાજપની ખરાબ હાલત, કોંગ્રેસ પણ પાછળ
રાજસ્થાનની અંતા પેટાચૂંટણીમાં ચોથા રાઉન્ડની મતગણતરી પૂર્ણ થયા બાદ, અપક્ષ ઉમેદવાર નરેશ મીણાએ 200 મતોની સરસાઈ સાથે લીડ મેળવી છે. આ સાથે કોંગ્રેસના પ્રમોદ જૈન ભાયા બીજા નંબરે છે, જ્યારે ભાજપના મોરપાલ ચોથા રાઉન્ડના અંતે પણ પાછળ રહ્યા છે.
બડગામ પેટાચૂંટણીમાં એનસી(નેશનલ કોન્ફરન્સ)ના ઉમેદવાર આગળ
બડગામ (જમ્મુ-કાશ્મીર) વિધાનસભા પેટાચૂંટણીમાં, ચૂંટણી પંચના શરુઆતી વલણો મુજબ, 17મા રાઉન્ડની મતગણતરી પૂર્ણ થયા બાદ નેશનલ કોન્ફરન્સ(NC)ના ઉમેદવાર આગા સૈયદ મહમૂદ અલ મોસાવી 624 મતોની સરસાઈ સાથે પીપલ્સ ડેમોક્રેટિક પાર્ટી(PDP)ના આગા સૈયદ મુન્તઝીર મેહદીથી આગળ છે.
જ્યુબિલી હિલ્સ પેટાચૂંટણીમાં કોંગ્રેસના નવીન યાદવ આગળ
જ્યુબિલી હિલ્સ પેટાચૂંટણીના શરુઆતી વલણો સૂચવે છે કે કોંગ્રેસના નવીન યાદવ આગળ છે. આ ચૂંટણીમાં કુલ 58 ઉમેદવારો મેદાનમાં હતા, જેમાં ભાજપના એલ. દીપક રેડ્ડી અને BRSના સુનીતાનો સમાવેશ થાય છે. આ બેઠક પર કુલ 48.49 ટકા મતદાન નોંધાયું હતું, જેમાં 1,94,631 મતદારોએ પોતાના મતાધિકારનો ઉપયોગ કર્યો હતો.
રાજસ્થાન અંતામાં EVMથી મતગણતરી શરુ
રાજસ્થાનની અંતા વિધાનસભા બેઠક પર બૅલેટ પેપરની ગણતરી બાદ હવે EVM મશીનો દ્વારા પણ મતગણતરી શરુ થઈ ગઈ છે. બારાં ગવર્મેન્ટ કૉલેજ ખાતે મતગણતરી શરુ થતાં જ ઉમેદવારો અને સમર્થકોમાં ઉત્સાહ જોવા મળી રહ્યો છે.
જ્યુબિલી હિલ્સ પેટાચૂંટણીની મતગણતરી શરુ
જ્યુબિલી હિલ્સ પેટાચૂંટણીની મતગણતરી યુસુફગુડાના કોટલા વિજયભાસ્કર રેડ્ડી સ્ટેડિયમ ખાતે સવારે 8 વાગ્યે શરુ થઈ ગઈ છે, જેના માટે 42 ટેબલ ગોઠવવામાં આવ્યા છે. શૈકપેટ મંડળના પ્રથમ પોલિંગ બૂથથી શરુ થયેલી આ ગણતરી કુલ 10 રાઉન્ડમાં પૂરી થશે, ત્યારબાદ અંતિમ પરિણામો જાહેર કરાશે. આ અત્યંત મહત્ત્વપૂર્ણ ગણાતી ચૂંટણીના મતગણતરી કેન્દ્ર પર કડક સુરક્ષા વ્યવસ્થા ગોઠવવામાં આવી છે અને આસપાસ કલમ 144 લાગુ છે.
ઓડિશા નુઆપાડામાં BJPનો રૅકોર્ડ જીતનો દાવો
ભાજપના પ્રવક્તા સત્યબ્રત પાન્ડાએ દાવો કર્યો કે ઓડિશામાં સત્તામાં આવ્યા પછી નુઆપાડાની આ પ્રથમ પેટાચૂંટણીમાં પક્ષ રૅકોર્ડ માર્જિનથી જીતશે, જે મુખ્યમંત્રી મોહન ચરણ માંઝીની જન-કેન્દ્રિત સરકારની સાબિતી છે. તેમણે પૂર્વ CM નવીન પટનાયક દ્વારા લગાવેલા 'મત ચોરી'ના આક્ષેપોને તેમની રાજકીય હતાશા ગણાવી.
જમ્મુ-કાશ્મીર નગરોટા અને બડગામના પરિણામો
નગરોટા અને બડગામ વિધાનસભા પેટાચૂંટણીના પરિણામો આજે જાહેર કરવામાં આવશે. આ બંને બેઠકો પર મતગણતરીની પ્રક્રિયા સવારે 8 વાગ્યે શરુ થઈ ગઈ છે. જોકે, શરુઆતના વલણો 9 વાગ્યાથી મળવાની સંભાવના છે અને બપોરના 12 વાગ્યા સુધીમાં આ બેઠકોના અંતિમ પરિણામો સ્પષ્ટ થઈ જશે તેવી અપેક્ષા છે.
પંજાબ તરનતારન પેટાચૂંટણીનું કારણ
પંજાબ વિધાનસભાની તરનતારન બેઠક પરના આમ આદમી પાર્ટી(AAP)ના ધારાસભ્ય કશ્મીર સિંહ સોહલના નિધનને કારણે આ સીટ ખાલી પડી હતી, જેના પગલે 11 નવેમ્બરના રોજ અહીં પેટાચૂંટણી યોજાઈ હતી. આ ચૂંટણીમાં 60.95% મતદાન થયું હતું અને તેના મતોની ગણતરી આજે થઈ રહી છે.
રાજસ્થાન અંતા પેટાચૂંટણીનું કારણ
રાજસ્થાનની અંતા બેઠક પર ભાજપના ધારાસભ્ય કંવરલાલ મીણાને SDM પર પિસ્તોલ તાકવાના કેસમાં ત્રણ વર્ષની સજા થવાથી તેમની સભ્યતા રદ થઈ હતી. આ કારણોસર આ બેઠક પર પેટાચૂંટણી યોજાઈ, જેમાં 80.32% મતદાન નોંધાયું છે.
