કોંગ્રેસ નેતા પવન ખેડાના ઘરે પોલીસના દરોડા: CMની પત્ની પાસે 3 પાસપોર્ટના આરોપ મુદ્દે દિલ્હી પહોંચી આસામ પોલીસ

Pawan Khera News: કોંગ્રેસ નેતા પવન ખેડા દ્વારા આસામના મુખ્યમંત્રી હિમંત બિસ્વા સરમાના પત્ની પર કરાયેલા ગંભીર આક્ષેપો બાદ વિવાદ વકર્યો છે. પવન ખેડાએ 5 એપ્રિલ, 2026ના રોજ એક પ્રેસ કોન્ફરન્સમાં દાવો કર્યો હતો કે મુખ્યમંત્રીના પત્ની રિંકી ભુઈયા સરમા પાસે ત્રણ અલગ-અલગ પાસપોર્ટ છે, જેમાંથી બે મુસ્લિમ દેશોના છે.

પવન ખેડાએ સવાલ ઉઠાવ્યો હતો કે ભારતનો કાયદો બેવડી નાગરિકતાની મંજૂરી આપતો નથી, તો પછી તેમની પાસે ત્રણ પાસપોર્ટ કેવી રીતે હોઈ શકે? તેમણે ગૃહમંત્રી પાસે આ મામલે SIT દ્વારા તપાસની માંગ કરી હતી અને આક્ષેપ કર્યો હતો કે હિમંત બિસ્વા સરમા મુસ્લિમો વિરુદ્ધ નફરતની રાજનીતિ કરે છે જ્યારે તેમના પરિવાર પાસે જ મુસ્લિમ દેશોના પાસપોર્ટ છે.

આ પણ વાંચો: ધર્મની વ્યાખ્યા કરવી એ કોર્ટનું કામ નથી: સબરીમાલા વિવાદમાં કેન્દ્રનો સુપ્રીમ કોર્ટમાં જવાબ

કોંગ્રેસ નેતા પવન ખેડાના ઘરે પોલીસના દરોડા

આ આક્ષેપો સામે મુખ્યમંત્રી હિમંત બિસ્વા સરમાએ આકરો પલટવાર કર્યો હતો. તેમણે પવન ખેડાના તમામ દાવાઓને પાયાવિહોણા અને ખોટા ગણાવતા 48 કલાકની અંદર ફોજદારી અને માનહાનિનો કેસ કરવાની જાહેરાત કરી હતી. જે મુજબ, 6 એપ્રિલના રોજ મુખ્યમંત્રીની પત્નીએ ખેડા વિરુદ્ધ FIR નોંધાવી હતી. આ ફરિયાદ નોંધાયાના બીજા જ દિવસે એટલે કે આજે, આસામ પોલીસની એક ટીમ દિલ્હી પોલીસ સાથે પવન ખેડાના દિલ્હી સ્થિત નિવાસસ્થાને પૂછપરછ માટે પહોંચી છે. હાલ આ મામલે રાજકીય ગરમાવો જોવા મળી રહ્યો છે.