તમે ભાષાશાસ્ત્રી કે ઈતિહાસકાર નથી, માફી માગોઃ હાઈકોર્ટે કમલ હાસનને તતડાવ્યો

કમલની જીદઃ ભૂલ માટે માફી હોય, ગેરસમજ માટે નહિ   

કમલે કહ્યું, કળા રાહ જોઈ શકે  છે, હું કર્ણાટકમાં  ઠગલાઈફ ફિલ્મ રીલિઝ નહિ  કરુઃ હાઈકોર્ટે કહ્યું, કળાત્મક અભિવ્યક્તિ લોકલાગણીથી સર્વોપરી ન હોઈ શકેે

મુંબઈ -  કમલ હાસને કન્નડા ભાષા તમિલમાંથી જન્મી છે તેવાં વિધાન બદલ માફી માગવાનો ઈનકાર કરતાં તેની મણિ રત્નમનાં દિગ્દર્શન હેઠળની ફિલ્મ 'ઠગ લાઈફ' કન્નડામાં રીલિઝ નહિ થાય. આ વિવાદ અંગે કર્ણાટક હાઈકોર્ટમાં થયેલી અરજીની સુનાવણી કરતી વખતે હાઈકોર્ટે કમલ હાસનને તતડાવ્યો હતો. તમે ગમે તે હો પણ ભાષાશાસ્ત્રી કે ઈતિહાસકાર તો નથી ને, માફી માગી લો તેવી તાકીદ કરી હતી. જોકે, કમલ હાસને કહી દીધું હતું કે મારાં વિધાન સંદર્ભમાં ગેરસમજ થઈ છે. મેં ભૂલ કરી હોય તો હું માફી માગું પરંતુ ગેરસમજ માટે માફી માગવાની ન હોય. તેણે કહી દીધું હતું કે કળા પ્રતીક્ષા કરી શકે છે અને એવું હોય તો હું હાલ આ ફિલ્મ કર્ણાટકમાં રીલિઝ નહિ કરું. 

આ ફિલ્મ તા. પાંચમીથી દેશભરમાં રીલિઝ થઈ રહી છે. કર્ણાટક હાઈકોર્ટે આ મુદ્દે દસમી જૂને સુનાવણી આગળ વધારવાનું નક્કી કર્યું છે. આથી, કર્ણાટકમાં હાલ પૂરતી આ ફિલ્મ રીલિઝ નહિ થાય.  કમલ હાસને જણાવ્યું હતું કે પોતે હાલ આ ફિલ્મની રીલિઝ કર્ણાટક પૂરતી મુલત્વી  રાખશે. ત્યાં સુધીમાં તે કર્ણાટક ફિલ્મ ચેમ્બર ઓફ કોમર્સ સાથે સંવાદ સાધશે. 

કમલ હાસને 'ઠગ લાઈફ' ફિલ્મના ઓડિયો રીલિઝ વખતે એવું  વિધાન કર્યું હતું કે કન્નડ ભાષા તમિલ ભાષામાંથી સર્જાઈ છે. આ વિધાનના કર્ણાટકમાં ઘેરા પ્રત્યાઘાત પડયા હતા. કર્ણાટક ફિલ્મ ચેમ્બર ઓફ કોમર્સે આ ફિલ્મ કર્ણાટકમાં રીલિઝ નહિ  કરવાનો નિર્ણય લીધો હતો. તેથી કમલ હાસને હાઈકોર્ટમાં અરજી કરી હતી અને પોલીસ રક્ષણની માગણી કરી હતી. કમલ હાસને હાઈકોર્ટને જણાવ્યું હતું કે પોતે પોતાનું વલણ સ્પષ્ટ કરતો એક પત્ર ચેમ્બરને પાઠવ્યો છે. જોકે, હાઈકોર્ટે એ વાતની નોંધ લીધી હતી કે આ પત્રમાં ક્યાંય માફી શબ્દનો ઉલ્લેખ નથી. ચચ૨

સુનાવણી વખતે જસ્ટીસ એમ. નગરપ્રસન્નાએ કમલ હાસનને એવી  સલાહ આપી હતી કે તમારાં વિધાનોથી કર્ણાટકની પ્રજાની લાગણી દૂભાઈ છે આથી તમારે માફી માગી લેવી જોઈએ. 

જોકે, કમલ હાસન વતી તેના વકીલે કહ્યું હતું કે તેને કન્નડા ભાષા માટે કોઈ દ્વૈષ નથી. પરંતુ, આખી  વાત ગેરસમજની છે. અને તેના માટે પોતે માફી માગવા તૈયાર નથી. 

 હાઈકોર્ટે કમલને તતડાવતાં કહ્યું હતું કે તમે માફી  નહિ  માગીને તમારા અહમને વળગી રહ્યા છો. તમે કમલ હાસન હો કે ગમે તે હો, આ વાત સમગ્ર રાજ્યના લોકોની ભાવનાઓને લગતી છે.  આ દેશમાં ભાષાના આધારે ભાગલા થયા છે. જાહેર જીવનની એક હસ્તી આ પ્રકારનાં વિધાનો કરી શકે નહિ. તમે કોઈ ઈતિહાસકાર કે ભાષાશાસ્ત્રી નથી કે તમારી વિદ્વતાના આધારે આવાં નિવેદનો કરી શકો. ૭૫ વર્ષ પહેલાં સી. રાજગોપાલાચારીએ આવાં જ વિધાન  બદલ માફી  માગી હતી તો તમે કેમ ન માગી શકો ?  રજનીકાંતે પણ 'કલા' ફિલ્મની રીલિઝ  વખતે  પોતાનાં કાવેરી  અંગેના નિવેદન માટે માફી માગી જ હતી. તમે પોતે હાથે કરીને આ તોફાન ઉભું કર્યું છે અને હવે તમે હાઈકોર્ટ પાસે તમારાં ધંધાદારી હિતો  સાચવવા  પોલીસ રક્ષણની માગણી સાથે આવો  છો? તેના કરતાં  માફી માગી  લો તો વિવાદ શાંત થઈ શકે તેમ છે. 

કમલ હાસનના વકીલે કહ્યું હતું કે મણિ રત્નમ અને કમલ હાસન ૧૯૮૭ પછી પહેલીવાર આ ફિલ્મ દ્વારા એકઠા થઈ રહ્યા  છે. આથી આ ફિલ્મ બહુ મહત્વની છે. જોકે, હાઈકોર્ટે આ દલીલનો એવો જવાબ આપ્યો હતો કે આ ફિલ્મ કળાત્મક રીતે મહત્વની છે એ સાચું પરંતુ કળાત્મક અભિવ્યક્તિ લોકલાગણી કરતાં સર્વોપરી હોઈ શકે નહિ. અભિવ્યક્તિની સ્વતંત્રતાને મર્યાદા  ઓળંગીને લોકલાગણીને દૂભવવા  દઈ શકાય નહિ. 

 કમલ હાસને કહ્યું હતું કે જે ફિલ્મને સેન્સર બોર્ડે ક્લિયર કરી છે તેના પર રાજ્ય સરકાર કે ચેમ્બર પ્રતિબંધ મૂકી શકે નહિ. હાઈકોર્ટે આ અરજી  મુદ્દે કેન્દ્ર સરકાર તથા રાજ્ય સરકાર ઉપરાંત સેન્સર બોર્ડને પણ નોટિસો આપી તેમનો જવાબ  રજૂ કરવા જણાવ્યું છે.