સુપ્રીમ કોર્ટે મુંબઈ હોટેલિયર મર્ડર કેસમાં છોટા રાજનના જામીન રદ કર્યા

રાજન, અન્ય ત્રણને વિશેષ કોર્ટે આજીવન કેદ  ફટકારેલી

27 વર્ષ ફરાર રહ્યો હતો તે વાત કોર્ટે નોંધી ઃ ગત ઓક્ટોબરમાં હાઈકોર્ટે અપીલની નિકાલ સુધી જામીન આપ્યા હતા

મુંબઈ -   સુપ્રીમ કોર્ટે બુધવારે મુંબઈના હોટેલિયર જયા શેટ્ટીની ૨૦૦૧માં થયેલી સનસનાટીભર્યા હત્યાના કેસમાં માફિયા ડોન રાજેન્દ્ર એસ. નિકાલજે ઉર્ફે છોટા રાજનના જામીન રદ કર્યા છે.

ન્યાયાધીશ વિક્રમ નાથ અને સંદીપ મહેતાની બેન્ચે છોટા રાજનને જામીન આપવાના બોમ્બે હાઈકોર્ટના આદેશને પડકારતી સીબીઆઈ (સેન્ટ્રલ બ્યુરો ઓફ ઇન્વેસ્ટિગેશન) દ્વારા દાખલ કરવામાં આવેલી સ્પેશિયલ લીવ પિટિશન (એસએલપી) મંજૂર કરી અને તેની આજીવન કેદની સજા સ્થગિત કરી હતી.

ન્યાયાધીશ નાથની આગેવાની હેઠળની બેન્ચે સીબીઆઈ વતી હાજર રહેલા એડિશનલ સોલિસિટર જનરલ (એએસજી) એસવી રાજુની રજૂઆતની નોંધ લીધી હતી કે છોટા રાજનને અન્ય ચાર કેસોમાં દોષિત ઠેરવવામાં આવ્યો છે અને તે લગભગ ૨૭ વર્ષ સુધી ફરાર રહ્યો હતો.

ખાસ મકોકા કોર્ટે રાજન અને અન્ય લોકોને આ સનસનાટી ભર્યા હત્યા કેસમાં દોષિત ઠેરવ્યા અને લગભગ નવ વર્ષમાં બીજી વાર આજીવન કેદની સજા ફટકાર્યા પછી રાજને બોમ્બે હાઈકોર્ટમાં અપીલ દાખલ કરી હતી.

ગયા વર્ષે ઓક્ટોબરમાં હાઈકોર્ટની બેન્ચે ફોજદારી અપીલના નિકાલ સુધી સજા સ્થગિત કરી હતી અને તેમને જામીન પર મુક્ત કરવાનો આદેશ આપ્યો હતો. જોકે, રાજન જામીનનો લાભ મેળવી શક્યો ન હતો કારણ કે તે ૨૦૧૧માં પવઈ ખાતે ગુના પત્રકાર જ્યોતિર્મય ડેની  હત્યાના કેસમાં નવી દિલ્હીની તિહાર સેન્ટ્રલ જેલમાં આજીવન કેદની સજા ભોગવી રહ્યો છે.

નવેમ્બર ૨૦૧૫ માં બાલીના પર્યટન સ્થળમાંથી રાજનને પકડાયા પછી અને ત્યારબાદ ભારત મોકલવામાં આવ્યા પછી, સીબીઆઈ દ્વારા ઇન્ડોનેશિયા સરકારને સોંપવામાં આવેલા ૭૧ મોટા ગુનાઓના દસ્તાવેજોમાં શેટ્ટી હત્યા કેસનો સમાવેશ થતો હતો.

દક્ષિણ મુંબઈમાં ગોલ્ડન ક્રાઉન હોટેલના માલિક શેટ્ટીની ૪ મે, ૨૦૦૧ના રોજ બે બંદૂકધારીઓએ ગોળી મારીને હત્યા કરી હતી. આ ગોળીબાર ફરાર આતંકવાદી ડોન દાઉદ ઇબ્રાહિમ કાસકરના કટ્ટર હરીફ રાજન દ્વારા કરવામાં આવ્યો હતો, જેનાથી ભારે ખળભળાટ મચી ગયો હતો.

લાંબી ટ્રાયલ પછી, સ્પેશિયલ મકોકા કોર્ટના સ્પેશિયલ જજ એ.એમ. પાટીલે રાજનને દોષિત ઠેરવ્યો અને તેને અન્ય આરોપીઓ, રાહુલ પાનસરે, અજય મોહિતે અને પ્રમોદ ધોંડે સાથે આજીવન કેદની સજા ફટકારી હતી.

શેટ્ટી એક કથિત ખંડણી કેસમાં ભોગ બન્યા હતા અને તેમને પોલીસ સુરક્ષા પૂરી પાડવામાં આવી હતી, જે તેમને નિશાન બનાવીને હત્યા કરવામાં આવી તેના બે મહિના પહેલા પાછી ખેંચી લેવામાં આવી હતી.