શેરબજાર કૌભાંડી કેતન પારેખની વિદેશ પ્રવાસની અરજી ફગાવાઈ

યુકે, આફ્રિકા, સિંગાપોર, યુએઈ ફરવા જવું હતું

કેતન  પારેખ વિદેશ ભાગી જશે  તેવી આશંકા સેબીએ વ્યક્ત કરતાં અદાલતે અરજી ફગાવી દીધી

મુંબઈ - મુંબઈની  વિશેષ સેબી  કોર્ટે મંગળવારે  બે દાયકા કરતાં વધુ સમય પહેલા થયેલા સિક્યોરિટીઝ કૌભાંડના મુખ્ય આરોપી ભૂતપૂર્વ  સ્ટોક બ્રોકર કેતન પારેખની વિદેશ પ્રવાસની પરવાનગી માંગતી અરજીને ફગાવી દીધી હતી.

પારેખ ૨૦૦૦-૨૦૦૧ ના કૌભાંડમાં તેમની કથિત ભૂમિકા બદલ ફોજદારી આરોપોનો સામનો કરી રહ્યા છે, જેના પરિણામે તેમને ૧૪ વર્ષ માટે શેરબજારમાંથી દૂર કરવામાં આવ્યા હતા.  કોર્ટનો વિગતવાર આદેશ તાત્કાલિક ઉપલબ્ધ નહોતો.

બજાર નિયમનકાર સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (સેબી) એ દાવો કર્યો છે કે પારેખે અન્ય આરોપીઓની મદદથી અને સક્રિય સહયોગથી આ ગુનો કર્યો હતો, જેના પરિણામે  લુપિન લેબોરેટરીઝના શેર માટે કૃત્રિમ બજાર ઊભું થયું અને શેરના ભાવમાં મોટા પાયે હેરાફેરી થઈ ેનિ. 

તેમણે સ્પેશિયલ સેબી કોર્ટના જજ એસએમ જાધવ સમક્ષ એક અરજી દાખલ કરી હતી જેમાં ૪ ઓક્ટોબર, ૨૦૨૫ અને ૩ ફેબુ્રઆરી, ૨૦૨૬ વચ્ચે કૌટુંબિક વેકેશન માટે વિદેશ પ્રવાસ કરવા અને લગ્નમાં હાજરી આપવા માટે પરવાનગી માંગવામાં આવી હતી.

અરજી મુજબ, પારેખ યુકે, યુએઈ, સિંગાપોર, થાઈલેન્ડ, શ્રીલંકા, દક્ષિણ આફ્રિકા, યુરોપિયન યુનિયન અને જ્યોજયા જેવા સ્થળોની મુલાકાત લેવા માંગતા હતા.

આ અરજીનો વિરોધ કરતા   સેબીએ કોર્ટનું  ધ્યાન દોર્યું કે મુખ્ય આરોપીઓ સામે વિશેષ કોર્ટ સમક્ષ અનેક કેસ પેન્ડિંગ છે.સેબીએ દલીલ કરી હતી કે આ કેસ ટ્રાયલના વિવિધ તબક્કામાં છે અને આરોપીઓ દ્વારા મોટા પાયે સિક્યોરિટીઝ માર્કેટમાં થયેલા હેરાફેરી અને માસ્ટરમાઇન્ડના આધારે દાખલ કરવામાં આવ્યા છે.

સેબી વધુમાં રજૂઆત કરી હતી કે આરોપીએ ચાર મહિનાના સમયગાળા દરમિયાન વિચારવામાં આવી રહેલી વ્યાપક મુસાફરી સંબંધિત કોઈ વિગતવાર પ્રવાસ કાર્યક્રમ દાખલ કર્યો નથી.

સેબીએ ભાર મૂક્યો હતો કે પારેખ અને તેમની સંબંધિત સંસ્થાઓએ  માત્ર બજાર નિયમનકારની દેખરેખથી બચવા અને કોર્ટ કાર્યવાહીથી બચવા માટે જ નહીં, પરંતુ વિદેશમાં સ્થાયી થવાનો પ્રયાસ કરવાના ખરાબ હેતુથી પણ અરજી દાખલ કરી છે.તેમાં ભાર મૂકવામાં આવ્યો હતો કે કેસ પુરાવાના તબક્કે છે અને હાલના તબક્કે આરોપીની હાજરી સર્વોપરી છે.

 પ્રોસિક્યુશન પક્ષનું દૃઢ માનવું છે કે, સિક્યોરિટીઝ માર્કેટમાં આરોપીના વર્તનને ધ્યાનમાં લેતા, તે એક મોટો ભાગી જવાનું જોખમ ધરાવે છે અને તેના ભારત પાછા ફરવાની શક્યતા ખૂબ જ ઓછી છે,એમ સેબીએ રજૂઆત કરી હતી.

નિયમનકારે દલીલ કરી હતી કે જો વિદેશ પ્રવાસની પરવાનગી આપવામાં આવે તો પારેખની પ્રવૃત્તિઓ અથવા સંદેશાવ્યવહાર પર નજર રાખવી અશક્ય બની જશે.

સેબીની રજૂઆતો સાથે સંમત થતાં કોર્ટે પારેખની અરજી ફગાવી દીધી હતી.