કફ પરેડ પાસે દરિયામાં ઝંપલાવનાર શ્ખસને પોલીસ જવાને બચાવ્યો

માછીમારી બોટની મદદથી પોલીસ પહોંચી

આત્મહત્યાના પ્રયાસનું કારણ સ્પષ્ટ નહિ,  કફ પરેડમાં ટૂંકા સમયગાળામાં જ બીજી ઘટના

મુંબઈ -  દક્ષિણ મુંબઈના કફ પરેડ સ્થિત ગીતા નગર નજીક એક શખ્સે ભારે વરસાદ અને ભરતીના સમયે દરિયાના પાણીમાં ઝંપલાવીને આત્મહત્યાનો પ્રયાસ કર્યો હતો. આ ઘટનાની જાણ થતાં જ મુંબઈ પોલીસ કોન્સ્ટેબલે ઝડપી કાર્યવાહી કરતા જીવના જોખમે માછીમારી બોટની મદદથી દરિયામાં પ્રવેશીને શખ્સને સફળતાપૂર્વક બચાવી લીધો હતો.

આ ઘટના રવિવારે સાંજના ૬.૩૦ વાગ્યાના આસપાસ ભારે વરસાદ અને દરિયામાં ભરતીના સમયે બની હતી. જેમાં કફ પરેડના ગીતા નગર નજીક એક શખ્સે અચાનક દરિયાના પાણીમાં ઝંપલાવીને આત્મહત્યાનો પ્રયાસ કર્યો હતો.

 આ અંગે જાણ થતાં  પોલીસ કોન્સ્ટેબલ રંધવેએ તાત્કાલિકઘટનાસ્થળે પહોંચીને અહીંના સ્થાનિક માછીમારી બોટની મદદથી ભરતી સમયે દરિયામાં પ્રવેશીને જીવના જોખમે પીડીતને દરિયામાં ડૂબતા સફળતાપૂર્વક બચાવી લીધો હતો. જો કે, આ શખ્સે આત્મહત્યાનો પ્રયાસ શું કામ કર્યો હતો. તેનું ચોકક્સ કારણ હજુ સ્પષ્ટ થયું નથી. પોલીસે આ મામલે વધુ તપાસ હાથ ધરી હતી.

વધુમાં ઘટનાનો વિડીયો વાયરલ થતાં જ નેટ યૂઝર્સએ પોલીસ કોન્સ્ટેબલની આ કામગીરીની વ્યાપક પ્રશંસા કરી હતી. નોંધનીય છે કે, મે મહિનાની શરુઆતમાં પણ દક્ષિણ મુંબઈના કફ પરેડમાં આવી જ એક ઘટના બની હતી.

જેમાં મહિલાએ તેનો કોઈ પીછો કરી રહ્યા હોવાનું જણાવીને કફ પરેડમાં બીડી સોમાણી જંકશન પાસે દરિયામાં ઝંપલાવી દીધું હતું. આ સમયે ત્યાં જ ફરજ પર હાજર પોલીસકર્મીને આ અંગે જાણ થતાં જ તેણે તરત જ દરિયામાં કૂદીને જીવના જોખમે મહિલાને બચાવી લીધી હતી.