મુંબઈ-અમદાવાદ શતાબ્દી એક્સપ્રેસ ટ્રેનની તત્કાલ ટિકિટ માટે ઓટીપી સિસ્ટમ શરૃ કરાશે

1લી ડિસેમ્બરથી ફેરફાર અમલી બનશે

ફોન નંબર પર ઓટીપી આવશે, તે જણાવ્યા પછી જ ટિકિટ મળી શકશે

મુંબઈ -  મુંબઈ સેન્ટ્રલ-અમદાવાદ શતાબ્દી એક્સપ્રેસ ટ્રેન નંબર ૧૨૦૦૯/૧૨૦૧૦માં પ્રવાસ કરવા માટેની તત્કાલ ટિકિટ બુકિંગ માટે હવે ઓટીપી સુવિધા દાખલ કરવામાં આવી છે. રેલવે બોર્ડની ગાઇડલાઇન્સ અનુસાર આ નિયમ લાગુ કરાશે. આની શરૃઆત શતાબ્દી એક્સપ્રેસ ટ્રેનથી શરૃ કરાશે. ટ્રેન નંબર ૧૨૦૦૯/૧૨૦૧૦ માટે પહેલી ડિસેમ્બરથી ટ્રેનની ટિકિટ બુકિંગ કરવું હોય તો ઓટીપી (વનટાઇમ પાસવર્ડ) વડે ઓથેન્ટીકેશન (ખરાઈ) કર્યા પછી જ તત્કાલ ટિકિટ બુકિંગ થઈ શકશે.

પીઆરએસ કાઉન્ટર્સ, ઓથોરાઇઝ્ડ એજન્ટ્સ, આઇઆરસીટીસી વેબસાઇટ, આઇઆરસીટીસી મોબાઇલ એપ વગેરે દ્વારા આ સિસ્ટમ લાગુ બનશે.

પ્રવાસી જે મોબાઇલ નંબર રજૂ કરે તેના પર સિસ્ટમ જનરેટેડ વનટાઇમ પાસવર્ડ મોકલવામાં આવશે અને ઓટીપીની ખરાઈ કર્યા પછી જ તત્કાલ ટિકિટ આપવામાં આવશે.

તત્કાલ બુકિંગમાં પારદર્શિતા દાખલ કરવા અને વાસ્તવિક પ્રવાસીઓને ટિકિટ  મળે તે માટે આ ફેરફાર કરાયો છે. પહેલી ડિસેમ્બર મધ્યરાત્રિના ૦૦.૦૦ કલાકથી આ ફેરફાર અમલમાં આવશે.