મરાઠા આંદોલન પૂરું થયું પણ નુકસાન કોણ ભોગવશેઃ હાઈકોર્ટ

જરાંગેનો દાવોઃ જનતાને  અગવડ પડી  પણ કોઈ નુકસાન નથી થયું

સાઉથ મુંબઈમાં સર્જાયેલી ગેરવ્યવસ્થા માટે પોતાની ઉશ્કેરણી જવાબદાર ન હતી તેવું સોગંદનામું કરીને જણાવવા જરાંગે તથા ટીમને  આદેશ

મુંબઈ -  મરાઠા આંદોલનનો અંત આવ્યો છે પરંતુ આ દરમિયાન જાહેર સંપત્તિને થયેલું નુકસાન કોણ ભોગવશે તેવો સવાલ બોમ્બે હાઈકોર્ટે ઉઠાવ્યો છે. આંદોલનના નેતા મનોજ જરંાગે વતી બુધવારે બોમ્બે હાઈકોર્ટમાં એવી રજૂઆત કરી હતી કે મરાઠા અનામત આંદોલનનો મુદ્દો ઉકેલાયા બાદ તેને રદ કરવામાં આવ્યું છે.કાર્યકારી મુખ્ય ન્યાયાધીશ ચંદ્રશેખર અને ન્યાયાધીશ આરતી સાઠેની બેન્ચે રજૂઆત સ્વીકારી હતી પરંતુ કહ્યું હતું કે  જરાંગેએ  મુંબઈમાં તેમના અને તેમના સમર્થકો દ્વારા કરવામાં આવેલા પાંચ દિવસના વિરોધપ્રદર્શન સામેની અરજીઓમાં કરવામાં આવેલા અન્ય વિવિધ આરોપોના જવાબમાં તેમનું સોગંદનામું દાખલ કરવું પડશે.

 કેટલાક મુદ્દાઓ હજુ પડતર  છે. જાહેર સંપત્તિને મોટા પાયે નુકસાન થયું છે. તેની ચૂકવણી કોણ કરશે?,એમ બેન્ચે પૂછયું હતું.

જોકે, જરાંગે અને આંદોલનનું નેતૃત્વ કરનારા સંગઠનો તરફથી હાજર રહેલા વકીલો સતીશ માનેશિંદે અને વીએમ થોરાટે ભારપૂર્વક જણાવ્યું હતું કે સામાન્ય માણસને અસુવિધા સિવાય આવું કોઈ નુકસાન થયું નથી.

બેન્ચે કહ્યું કે જારંગે અને સંગઠનોએ તેમના વલણને સ્પષ્ટ કરતા સોગંદનામા દાખલ કરવા પડશે.

 સોગંદનામામાં કહેવું પડશે કે તેઓ (જારાંગે અને તેમની ટીમ) ઉશ્કેેરણી કરનારા નહોતા. એવું નિવેદન હોવું જોઈએ કે તેઓ  બધામાં સંડોવાયેલા ન હતા.  અરજીઓમાં કેટલાક ગંભીર આરોપો છે,એમ કોર્ટે કહ્યું હતું.

જો સોગંદનામા પર ઇનકારનું નિવેદન આપવામાં ન આવે, તો જરાંગે અને તેની ટીમે આ અવ્યવસ્થા માટે ઉશ્કેરણી કરી હતી તેમ ગણાશે એમ કોર્ટે જણાવ્યું હતું.

તેમાં ઉમેર્યું હતું કે એકવાર સોગંદનામા દાખલ થઈ ગયા પછી, કોર્ટ કોઈ પ્રતિકૂળ આદેશ પસાર કરશે નહીં પરંતુ ફક્ત અરજીઓનો નિકાલ કરશે.

બેન્ચે જરાંગે અને તેમની ટીમને તેમના સોગંદનામા દાખલ કરવા માટે ચાર અઠવાડિયાનો સમય આપ્યો છે.

મંગળવારે કોર્ટે જરાંગે અને તેમના સમર્થકોને મુંબઈના આઝાદ મેદાનને તાત્કાલિક ખાલી કરવા માટે અલ્ટીમેટમ આપ્યું હતું, જ્યાં આંદોલન ચાલી રહ્યું હતું અને કહ્યું હતું કે તે ગેરકાયદેસર અને પરવાનગી વિનાનું છે.બાદમાં બેન્ચે બુધવાર સવાર સુધી આઝાદ મેદાનમાં રહેવાની જરાંગેની વિનંતી સ્વીકારી લીધી કારણ કે ઉકેલ આવવાની શક્યતા હતી.

૨૯ ઓગસ્ટના રોજ દક્ષિણ મુંબઈના આઝાદ મેદાનમાં ભૂખ હડતાળ શરૃ કરનારા જરાંગેએ મંગળવારે સાંજે વિરોધ પ્રદર્શન પાછું ખેંચી લીધું હતું, જેમાં સરકારે તેમની મોટાભાગની માંગણીઓ સ્વીકારી હતી, જેમાં લાયક મરાઠા કુણબી જાતિ પ્રમાણપત્રો આપવાનો સમાવેશ થાય છે, જેનાથી તેઓ અન્ય પછાત વર્ગો (ઓબીસી)ને ઉપલબ્ધ અનામત લાભો માટે પાત્ર બનશે.

મહારાષ્ટ્ર સરકારે રાજ્યમાં ઓબીસી શ્રેણી હેઠળ વર્ગીકૃત કરાયેલા કુણબી વારસાના ઐતિહાસિક પુરાવા ધરાવતા મરાઠા સમુદાયના પાત્ર વ્યક્તિઓને કુણબી જાતિ પ્રમાણપત્રો આપવા માટે એક સમિતિની રચના કરવા અંગે સરકારી ઠરાવ (જીઆર) બહાર પાડયા પછી કાર્યકર્તા અને તેમના સમર્થકોએ સ્થળ ખાલી કરી દીધું હતું.