અમરાવતીમાં ચાલુ લગ્ને સ્ટેજ પર જઇ વરરાજા પર છરાથી ઘાતક હુમલો

સમગ્ર ફિલ્મી ઘટના ડ્રોન કેમેરામાં શૂટ થઇ

આરોપીઓ બાઇક પર બેસી ફરાર થઇ ગયા, નવવધુ સ્ટેજ પર જ બેહોશ થઇ ગઇ

આ  હુમલામાં વરરાજા સુજલરામ સમુદ્રે ગંભીર ઇજા પામતા તેને તાત્કાલિક હોસ્પિટલમાં ખસેડવામાં આવ્યો હતો. નજર સામે બનેલી આ ઘટનાથી નવવધુ સ્ટેજ પર જ બેભાન થઇ ઢળી પડી હતી.  આ સમયે આરોપીઓને પકડવા દોડેલા વરરાજાના પિતા પર પણ હુમલાખોરોએ હુમલો કર્યો હતો. આ ચોંકાવનારી ઘટના લગ્નના શૂટિંગ માટે ઉપયોગમાં લેવાતા ડ્રોન કેમેરામાં કેદ થઇ ગઇ હતી. આ ઘટના બાદ હુમલાખોરો બાઇં પર નાસી છૂટયા હતા.

આ સંદર્ભે વધુ વિગતાનુસાર અમરાવતી જિલ્લાના બડનેરામાં સાહિલ લોનમાં મંગળવારે એક લગ્ન સમારંભ ચાલી રહ્યો હતો. આ સમયે ચાલુ લગ્ને સ્ટેજ પર બે યુવકો ધસી આવ્યા હતા અને છરો કાઢી વરરાજા સુજલરામ પર હુમલો શરૂ કર્યો હતો આ લોકોએ સુજલરામ પર છરાના ઉપરા- છાપરી ઘા કર્યા હતા અને હાજર લોકો કાંઇ સમજે તે પહેલા જ ઘટનાસ્થળેથી બાઇખ પર બેસી ફરાર થઇ ગયા હતા. આ ઘટના જોઇ નવવધુ ડરી ગઇ હતી અને સ્ટેજ પર બેભાન થઇ ઢળી પડી હતી. આ સમગ્ર ઘટના લગ્નમાં શૂટિંગ માટે રાખેલા ડ્રોન કેમેરામાં શૂટ થઇ ગઇ હતી. સુજલરામના પિતા જ્યારે હુમલાખોરોને પકડવા ગયા ત્યારે હુમલાખોરોએ તેમના પર પણ હુમલો કર્યો હતો.

આ હુમલામાં ગંભીર ઇજા પામેલા સુજલરામને પાસેની એક હોસ્પિટલમાં ખસેડવામાં આવ્યો હતો. આ ઘટનાની જાણ થતા જ બડનેરા પોલીસની એક ટીમ તાત્કાલિક ઘટનાસ્થળે દોડી આવી હતી. પોલીસે આ પ્રકરણે ગુનો નોંધી વધુ તપાસ હાથ ધરી છે. પોલીસે લગ્નમાં વાપરવા આવેલા ડ્રોન કેમેરાના ફૂટે જ મેળવી આરોપીઓની ઓળખ સ્થાપિત કરવાના પ્રયાસ હાથ ધર્યા છે.