વિરોધ પ્રદર્શનો અને રજૂઆતો બાદ માહિતી
પરિણામ તૈયાર કરવાનું કામ અંતિમ તબક્કે પહોંચ્યું, વિદ્યાર્થીઓ સીટ નંબર તૈયાર રાખે
મુંબઇ - મહારાષ્ટ્ર બોર્ડનું એચએસસી (ધોરણ ૧૨)નું ૨૦૨૬નું પરિણામ આ અઠવાડિયામાં જાહેર થવાની સંભાવના હોવાનું એક વરિષ્ઠ અધિકારીએ જણાવ્યું છે. હજી ચોક્કસ તારીખ જાહેર કરવામાં આવી નથી, પરંતુ તાજેતરની માહિતી મુજબ પરિણામ એપ્રિલના અંત સુધી અથવા મે ૨૦૨૬ના શરૃઆતના દિવસોમાં જાહેર થઈ શકે છે, જેના કારણે વિદ્યાર્થીઓમાં ઉત્સુકતા વધી છે.
આ જાહેરાત કેટલાંક વિરોધ પ્રદર્શન અને પ્રશ્નોની વચ્ચે કરવામાં આવી છે. છતાં બોર્ડે સ્પષ્ટ કર્યું છે કે વિદ્યાર્થીઓના ઉચ્ચ શિક્ષણમાં વિલંબ ન થાય તે માટે સમયસર પરિણામ જાહેર કરવા પર પ્રાથમિકતા આપવામાં આવી રહી છે. એચએસસીની પરીક્ષાઓ ફેબુ્રઆરીથી માર્ચ ૨૦૨૬ દરમિયાન યોજાઈ હતી અને હાલ પરિણામ તૈયાર કરવાની પ્રક્રિયા અંતિમ તબક્કામાં છે. વિદ્યાર્થીઓને પોતાના સીટ નંબર તૈયાર રાખવાની સલાહ આપવામાં આવી છે.
ચોક્કસ તારીખ જાહેર ન થઈ હોવા છતાં, અગાઉના વર્ષોના ટ્રેન્ડ પ્રમાણે મહારાષ્ટ્રનું ધો.૧૨નું પરિણામ સામાન્ય રીતે મેના પ્રથમ સપ્તાહ (૫ મેની આસપાસ)માં જાહેર થઈ શકે. તેથી આ વર્ષે પણ પરિણામ ખૂબ જ ટૂંક સમયમાં જાહેર થવાની શક્યતા છે, જેથી વિદ્યાર્થીઓ અને માતા-પિતાની એડમિશન તથા અન્ય બાબતોની ચિંતા ઓછી થાય.
