લોરેન્સ બિશ્નોઈ ગેંગ સંબંધી 5 સામે વિશેષ કોર્ટમાં આરોપો ઘડાયા

સલમાન ખાનના ઘરે ફાયરિંગ કેસ

આરોપીઓએ દોષિત ન હોવાની કબૂલાત કરતા  ટ્રાયલનો સામનો કરશે

મુંબઈ -  અભિનેતા સલમાન ખાનના બાંદ્રા સ્થિત નિવાસસ્થાન, ગેલેક્સી એપાર્ટમેન્ટ્સ પર ગોળીબારના કેસમાં બુધવારે મહારાષ્ટ્ર કંટ્રોલ ઓફ ઓર્ગેનાઈઝ્ડ ક્રાઈમ એક્ટ (મકોકા)ની એક વિશેષ અદાલતે પાંચ આરોપીઓ સામે આરોપો ઘડયા.

કોર્ટે નોંધ્યું હતું કે લોરેન્સ બિશ્નોઈ ગેંગના સભ્યોએ અભિનેતાની હત્યાનું કાવતરું ઘડયું હતું અને ગેંગની સર્વોેપરિતા સ્થાપિત કરીને શહેરમાં આતંક મચાવવા માંગતા હતા. બધા આરોપીઓએ દોષિત ન હોવાની કબૂલાત કરી છે અને ટ્રાયલનો સામનો કરવાનું પસંદ કર્યું છે. ૧૪ એપ્રિલ, ૨૦૨૪ ના રોજ, સવારે ૪.૪૫ વાગ્યે, બે મોટરસાઇકલ સવારોએ ગેલેક્સી એપાર્ટમેન્ટની બહાર પાંચ રાઉન્ડ ફાયરિંગ કર્યું. આ બંને અને અન્ય ત્રણ લોકો સામે ભારતીય દંડ સંહિતા અને મકોકાની સંબંધિત જોગવાઈઓ હેઠળ આરોપો ઘડવામાં આવ્યા છે. જે પાંચ આરોપીઓ પર કેસ ચલાવવાનો છે તેમાં શૂટર વિક્કીકુમાર ગુપ્તા અને સાગરકુમાર પાલ ઉપરાંત સોનુકુમાર બિશ્નોઈ, રફીક ચૌધરી અને હરપાલ હરદીપ સિંહનો સમાવેશ થાય છે. આ કેસમાં ત્રણ અન્ય - લોરેન્સ બિશ્નોઈ, અનમોલ બિશ્નોઈ અને રાવતારામ સ્વામી ઉર્ફે રોહિત ગોદારાને વોન્ટેડ તરીકે દર્શાવવામાં આવ્યા છે. અનમોલ બિશ્નોઈને તાજેતરમાં જ અમેરિકાથી પ્રત્યાર્પણ કરવામાં આવ્યો હતો અને નવી દિલ્હીમાં રાષ્ટ્રીય તપાસ એજન્સી દ્વારા ધરપકડ કરવામાં આવી હતી.

આરોપો ઘડતી વખતે કોર્ટે નોંધ્યું હતું કે પાંચ આરોપીઓ  વોન્ટેડ આરોપીઓ સાથે, ગુનાહિત કાવતરાના પક્ષકારો હતા અને ઓગસ્ટ ૨૦૨૨થી એપ્રિલ ૨૦૨૪ દરમિયાન લોરેન્સ બિશ્નોઈના નેતૃત્વ હેઠળના સંગઠિત ગુના સિન્ડિકેટના સભ્યો તરીકે કામ કર્યું હતું.

 ષડયંત્રને આગળ ધપાવવા માટે, પાલે સલમાન ખાન વિશેની માહિતી - ચૌધરીએ એકત્રિત કરી - ગેંંગના નેતાઓ, બિશ્નોઈ ભાઈઓ અને ગોદારાને આપી. વધુમાં, ગુપ્તા અને પાલને હથિયારો સોનુકુમાર અને અનુજકુમાર થાપન દ્વારા પૂરા પાડવામાં આવ્યા હતા, જેમનું કસ્ટડીમાં મૃત્યુ થયું હતું.

દરમિયાન, સિંહના વકીલે સીસીટીવી ફૂટેજ અને કોલ ડેટા રેકોર્ડ માંગ્યા છે. કોર્ટ આવતા અઠવાડિયે યોજાનારી સુનાવણીમાં તેમની અરજી પર સુનાવણી કરશે.