પાલઘરમાં બનાવટી દસ્તાવેજો દ્વારા રૃ.111 કરોડની ઉચાપતનો આરોપ

નગર પંચાયતના વડાની ધરપકડ

દસ્તાવેજો પર સહી અને પત્ર લખવાની શૈલી અલગ, કરોડને બદલે બિલિયન શબ્દનો ઉપયોગ

મુંબઈ -  પાલઘર જિલ્લાના વિક્રમગઢ ખાતે સ્થાનિક નગર પંચાયતના પ્રમુખની ધરપકડ કરવામાં આવી છે. આરોપી સામે બનાવટી દસ્તાવેજો રજૂ કરીને રૃ.૧૧૧ કરોડની ઉચાપતનો આરોપ છે.

અગ્રણી જાહેર ક્ષેત્રની બેન્કના સતર્ક અધિકારીઓએ બનાવટી દસ્તાવેજો રજૂ કરીને નગર પંચાયતના વડાનો ઉચાપતનો પ્રયાસ નિષ્ફળ બનાવ્યો હતો, એમ અધિકારીએ શનિવારે જણાવ્યું હતું.

આરોપી નિલેશ ઉર્ફે પિકા રમેશ પડવાલે વિક્રમગઢ નગર પંચાયતના પ્રમુખ છે. આ ઉપરાંત તે ઓવી કન્સ્ટ્રકશન કંપનીનો માલિક પણ છે. થાણેની તેની ધરપકડ કરવામાં આવી હતી.

એક અધિકારીએ કહ્યું હતું કે 'આ ઉચાપતનું કાવતરુ ૭ નવેમ્બરના રોજ પ્રકાશમાં આવ્યું હતું. જ્યારે બાંધકામ કંપનીના નામે રૃ.૧૧૧.૬૩ કરોડનો ડિમાન્ડ ડ્રાફટ જારી કરવા માટે જાહેર બાંધકામ વિભાગ (પીડબલ્યુડી) તરફથી એક નકલી વિનંતી પત્ર સ્ટેટ બેન્ક ઓફ ઈન્ડિયા (એસબીઆઈ)ની જવ્હાર શાખામાં રજૂ કરવામાં આવ્યો હતો.

ડિમાન્ડ લેટર અને તેની સાથેના ચેક પર પીડબલ્યુડીના એક્ઝીકયુટીવ એન્જિનિયર અને એકાઉન્ટન્ટની કથિત સહી હતી. આ પત્રની ચકાસણી દરમિયાન બેન્કના અધિકારીઓને શંકા ગઈ હતી. તેમને ઘણી વિસંગતતાઓ જોવા મળી હતી. એમાં કરોડને બદલે બિલિયન શબ્દનો ઉપયોગ, પત્ર લખવાની અલગ શૈલીનો સમાવેશ થાય છે, એમ અધિકારીએ જણાવ્યું હતું.

બેન્ક કર્મચારીએ પહેલાં ઈમેલ દ્વારા વિનંતીની ચકાસણી કરવાનો પ્રયાસ કર્યો. પરંતુ કોઈ જવાબ મળ્યો ન હતો. ત્યારબાદ એક જાગૃત કર્મચારીએ વ્યક્તિગત રીતે જવ્હાર પીડબલ્યુડી ઓફિસની મુલાકાત લીધી હતી. જ્યાં અધિકારીઓએ મિશ્ર અન ેવિરોધાભાસી જવાબો આપ્યા હતા.

છેવટે એસબીઆઈ મેનેજરો એક્ઝિકયુટીવ એન્જિનિયરને રૃબરૃ મળ્યા ત્યારે આ કાવતરુ સંપૂર્ણપણે ખુલ્લું પડી ગયું હતું. તેમણે કહ્યું હતું કે પત્ર પરની સહી તેમની નથી. ત્યારબાદ પોલીસ દ્વારા આવેલી સામે કાર્યવાહી કરવામાં આવી હતી. આ મામલામાં યજ્ઞોશ અંબીરે સામે પણ કેસ દાખલ કરવામાં આવ્યો છે. પોલીસે બંને સામે છેતરપિંડી અને સંબંધિત અન્ય કલમો હેઠળ ગુનો નોંધ્યો છે.