અર્નાળાના રિસોર્ટના સ્વીમીંગ પૂલમાં ડૂબી જતાં 8 વર્ષના બાળકનું મોત

ગોરેગાંવનો પરિવાર પિકનિક માટે રિસોર્ટમાં આવ્યો હતો 

વિરારના દરિયાકાંઠા નજીકના ડ્રીમલેન્ડ રિસોર્ટમાં માતાપિતાની નજર સામે જ બાળક તરફડયો 

મુંબઈ -  અર્નાળાના એક રિસોર્ટમાં સ્વિમિંગ પુલમાં ડૂબી જવાથી  દીક્ષાંત નામના ૮ વર્ષના બાળકનું મૃત્યુ થયું હતું. આ મૃતક  પોલીસે જણાવ્યું હતું કે પાણીમાં તરતા સમયે ગૂંગળામણથી તેનું મૃત્યુ થયું હતું.

         વસઈ-વિરારના દરિયાકિનારા પર ઘણા રિસોર્ટ છે. ઉનાળાની રજાઓમાં આ રિસોર્ટમાં મોટી સંખ્યામાં પ્રવાસીઓ આવે છે. ગોરેગાંવના સંતોષ નગરના રહેવાસી વ્યકટેશ પોતાના પરિવાર અને અન્ય મિત્રો સાથે વિરારના ડ્રીમલેન્ડ રિસોર્ટમાં ફરવા આવ્યા હતા.

 મંગળવારે સવારે નાસ્તો કર્યા પછી, બધા રિસોર્ટના સ્વિમિંગ પૂલમાં ગયા હતા. તે સમયે, તેમનો ૮ વર્ષનો પુત્ર દીક્ષાંતબાળકોના સ્વિમિંગ પુલમાં પાણીમાં રમી રહ્યો હતો. પરિણામે, પાણી તેના નાક અને મોંમાં ઘૂસી જતાં તેનો શ્વાસ રૃંધાવા લાગ્યો હતો. તેને તાત્કાલિક પાણીમાંથી બહાર કાઢવામાં આવ્યો અને સારવાર માટે ખાનગી હોસ્પિટલમાં દાખલ કરવામાં આવ્યો હતો. પરંતુ, ત્યાં જ તેનું મૃત્યુ થયું હતું.  અર્નાળા સાગરી પોલીસ મથકના સિનિયર પોલીસ ઇન્સ્પેક્ટર વિજય પાટીલે જણાવ્યું હતું કે, આ ઘટના  માતા પિતાની સામે બની હોવાથી તેમાં કંઈ શંકાસ્પદ નથી અને રિસોર્ટ તરફથી કોઈ બેદરકારી પ્રથમ દ્રષ્ટિએ જણાઈ નથી. આ અંગે પોલીસે અકુદરતી મૃત્યુનો ગુનો નોંધ્યો છે.

સ્વિમિંગ પુલમાં સુરક્ષા વ્યવસ્થા સામે સવાલો

વસઈના નિસર્ગરમ્ય સૌંદર્યને કારણે, મુંબઈ, થાણે અને અન્ય ભાગોમાંથી મોટી સંખ્યામાં પ્રવાસીઓ અહીં પર્યટન માટે આવે છે. વસઈ-વેસ્ટ કિનારાના વિસ્તારોમાં, જેમ કે વસઈ ગાંવ, ભુઈગાંવ કલંબ, રાજોડી, અર્નાળા, વટાર, રાનગાવ તેમ જ ભાલીવલી, તિલ્હેર, વજેશ્વરી, કૌલાર અને માંડવી જેવા પૂર્વીય વિસ્તારોમાં ઘણા રિસોર્ટ બનાવવામાં આવ્યા છે. ઉનાળાના વેકેશનની શરૃઆત સાથે, નાગરિકો હવે મોટી સંખ્યામાં આ રિસોર્ટની મુલાકાત લઈ રહ્યા છે. જો કે, પ્રવાસીઓ માટે સલામતીના પગલાંના અભાવે રિસોર્ટ જોખમી બની રહ્યા છે. એવું નોંધાયું છે કે મોટાભાગના રિસોર્ટમાં લાઇફગાર્ડ નથી. જો હોય તો પણ, ક્યારેક તેને અવગણવામાં આવે છે. તેથી, સ્વિમિંગ પુલમાં ડૂબી જતા લોકોની સંખ્યા પણ વધી રહી છે.