ઘાટકોપર કસ્ટોડિયલ ડેથ કેસમાં 2 પોલીસ કર્મીને 7 વર્ષની કેદ

2009 માં  હિસ્ટ્રીશીટરનું પોલીસ મથકમાં મોત થયું હતું

બે આરોપી પોલીસને જોકે હત્યાના ગુનામાંથી મુક્ત કરાયા

મુંબઈ -  મુંબઈની એક વિશેષ કોર્ટે મંગળવારે ૨૦૦૯માં ઘરફોડીના કેસમાં શંકમંદના  કસ્ટડીમાં થયેલા મૃત્યુના કેસમાં બે ભૂતપૂર્વ પોલીસકર્મીઓને દોષિત ઠેરવ્યા હતા અને તેમને સાત વર્ષની જેલની સજા ફટકારી હતી, પરંતુ તેમને હત્યાના આરોપમાંથી મુક્ત કરાયા હતા.

સેન્ટ્રલ બ્યુરો ઓફ ઇન્વેસ્ટિગેશન (સીબીઆઈ) કેસોની અધ્યક્ષતા કરી રહેલા સ્પેશિયલ જજ એ.વી. ગુજરાતીએ મુંબઈના ઘાટકોપર પોલીસ સ્ટેશનના તત્કાલીન સબ-ઇન્સ્પેક્ટર સંજય ખેડેકર અને તત્કાલીન હેડ કોન્સ્ટેબલ રઘુનાથ કોલેકરને ઈજા પહોંચાડવા અને ખોટી રીતે બંધક બનાવવાના આરોપ હેઠળ દોષિત ઠેરવ્યા હતા.

જોકે, ન્યાયાધીશે ૧૬ વર્ષ જૂના કેસમાં બંનેને વધુ ગંભીર હત્યાના આરોપમાંથી મુક્ત કર્યા હતા.

કોર્ટે ખેડેકર અને કોલેકરને સાત વર્ષની જેલની સજા ફટકારી હતી, પરંતુ જેલની સજા ૭ નવેમ્બર સુધી મુલતવી રાખી હતી જેથી બંને હાલમાં જામીન પર છે અને બોમ્બે હાઈકોર્ટમાં અપીલ કરી શકે છે.

ત્રીજા આરોપી પોલીસ કર્મચારી સયાજી થોમ્બ્રેનું ટ્રાયલ દરમિયાન મૃત્યુ થતાં તેની સામેનો કેસ બંધ કરી દેવામાં આવ્યો હતો.

પીડિત  અલ્તાફ શેખ  ડ્રગ્સનો વ્યસની અને હિસ્ટ્રીશીટર હતો, તેનું ૧૧ સપ્ટેમ્બર, ૨૦૦૯ના રોજ ઘાટકોપર પોલીસ સ્ટેશનમાં મૃત્યુ થયું હતું. ૨૨ વર્ષીય યુવકને ઘરમાં ઘૂસવાના કેસમાં શંકાસ્પદ તરીકે પોલીસે પકડી લીધાના કલાકોમાં જ તેનું મૃત્યુ થયું.

શેખની માતાએ હાઇકોર્ટનો સંપર્ક કર્યા પછી કેસ સીબીઆઈને ટ્રાન્સફર કરવામાં આવ્યો.