પશુ-પ્રાણીને પરણાવે અને લગનનાં ગીત ગાવે

- મેરા ભારત મહાન-અક્ષય અંતાણી

લગ્ન લાકડાના લાડુ કહેવાય છે, ખાય એ પણ પસ્તાય અને ન ખાય એ પણ પસ્તાય.  લાકડાના લાડુ ખાઈને પસ્તાયા હોય એવા લોકો બીજાને પરણાવવામાં પણ પાછું વાળીને નથી જોતા.  માણસને પરણાવે એ તો જાણે સમજ્યા, પણ પશુ-પ્રાણીને પણ ક્યારેક હોંશે હોંશે પરણાવતા હોય છે. 

રાજસ્થાનના  પાલી ગામે તાજેતરમાં જ કદાવરનંદી બળદ અને નાજુક નમણી વાછરડીનાં ધામધૂમથી લગ્ન કરાવવામાં આવ્યાં હતાં. નંદીને રંગીન રાજસ્થાની પાઘડી પહેરાવવામાં આવી હતી અને કદા-વર વરનો વર-ઘોડો કાઢવામાં આવ્યો હતો. નંદીનાં નવલા લગ્નમાં ગામના તમામ લોકોએ હોંશથી ભાગ લીધો હતો. આંધ્ર પ્રદેશ અને તેલંગણા બાજુ વરસાદ ખેેંચાય તો ગધેડા-ગધેડીને ઠાઠમાઠથી શણગારીને  પરણાવવામાં આવે છે. 

ગધેડાને ખર પણ કહે છેને? એટલે ખર-રાજા અને ખર-રાણી ધામધૂમથી પરણે તો વરસાદ આવે એવી માન્યતા છે. થોડાં વર્ષો પહેલાં વરસાદ ખેંચાતાં ગધેડા-ગધેડીને પરણાવવામાં આવ્યા પછી એટલો વરસાદ પડવા માંડયો કે કેટલાંય વિસ્તારોમાં પૂર આવ્યું હતું. એ વખતે એવી ટકોર થઈ હતી કે ગધેડા-ગધેડીને પરણાવવાથી ગાજવીજ સાથે શરૂ થયેલો આ એ કધારો વરસાદ પડતો બંધ કરવો હોય તો એ ગધેડા-ગધેડીને છૂટાછેડા  લેવડાવો. હવે તો દિલ્હી જેવાં શહેરોમાં પાળેલાં ડોગ-ડોગીના રીતસર જ્યોતિષ પાસે જન્મ-કુંડળી તૈયાર કરાવડાવીને અને કુંડળી મેચ કરાવીને પરણાવવાની ફેશન  શરૂ થઈ છે. ટૂંકમાં, આઝાદ જિંદગી જીવવા ટેવાયેલા પાળેલા શ્વાનને પરણાવીને  એમની આઝાદી છીનવી લેવામાાં આવે છે, એનાં કરતાં શેરીના કૂતરાની સ્થિતિ સારી છે, લિવ-ઈનમાં રહીને હસતાં-હસતાં અને ભસતાં-ભસતાં જીવન ગુજારે છે.

સેવ સ્લિપર્સ

ઘણા પગરખાપ્રેમી જોયા છે, જે મંદિરમાં દર્શને જાય ત્યારે ધ્યાન તો બહાર ઉતારેલા પગરખામાં જ ચોંટેલું હોય. મુંબઈમાં તો મોટાં મોટાં મંદિરોમાંથી ચંપલ અને પગરખાં  ચોરી જતી સચોર મંડળીઓ વર્ષોથી સક્રિય છે. આ ચંપલ-ચોર ગેન્ગ ધર્મસ્થાનોની બહારથી બૂટ, ચંપલ, સેન્ડલ સિફતથી ચોરી જાય છે અને પછી ચોરબજારની નજીક  આવેલી ગલીમાં કે બીજી જગ્યાએ ફટાફટ નજીવી કિંમતે વેેંચી આવે છે. ચોરીના ં પગરખાં વેંચનારા આ ચંપલ-બૂટને સાફ કરી, પોલિશ કરીને એકદમ ચકાચક બનાવી  પોતાનો નફો ચડાવી વેચી નાખતા હોય છે. 

ફક્ત ધર્મસ્થાનોમાંથી જ નહીં, પણ સભા-સમારંભના સ્થળેથી કે મોટી હોટેલોમાંથી પણ ચંપલ કે સ્લીપર્સ પગ કરી જતા હોય છે. એટલે જ મુંબઈની એક સ્ટાર હોટેલે નવો નુસ્ખો અજમાવ્યો છે. હોેટેલ રૂમની અંદર ટોઈલેટ પાસે જુદા જુદા રંગનાં અને ડિઝાઈનનાં સ્લિપર્સ રાખવાની શરૂઆત કરી છે. તમે જ કહો જુદા જુદા રંગના સ્લિપર્સ કોણ ચોરી જાય? આ નુસ્ખા વિશે જાણીને દો લાઈનમાં કહી શકાયઃ

સબને આઈડિયા યાદ રખા

કૈસે બચાયે 'પગ-રખા'

હવે મંદિરમાં દર્શને જનારા બે જુદા જુદા ખૂણે ચંપલ કે બૂટ ઉતારી ચોરી થતા બચાવી શકશે.

ઈન્સાનને ખુશ રાખતો

અનોખો શ્વાન

મિયા-બીબી રાજી તો ક્યા કરે  કાજી - એવી કહેવત છે. જ્યારે હૈદરાબાદમાં મિયા-બીબીને રાજી રાખવા માટે નહીં, પણ ઓફિસના સ્ટાફને રાજી રાખવા માટે એક શ્વાનને હેપીનેસ ઓફિસર તરીકે નિયુક્ત કર્યો છે. ગોલ્ડન રિટ્રિવર નસલના આ ડેનવર નામના ચોપગા અધિકારીનો હોદ્દો છે ચીફ હેપીનેસ ઓફિસરનો, આ ચીફ હેપીનેસ ઓફિસરે ઓફિસમાં ફરવાનું અને સ્ટાફ મેમ્બરોને ખુશ રાખવાના. રમતિયાળ નેચરના હેપીનેસ ઓ ફિસરને જોઈને અને તેની સાથે ગેલ-ગમ્મત કરીને સહુ ખુશખુશાલ રહે છે અને પ્રફુલ્લિત વાતાવરણમાં કામ કરવાથી કાર્યશક્તિ પણ વધી ગઈ છે. હવે તો માનસિક તાણ દૂર કરવા માટે ડોકટરો પણ શ્વાન કે બિલાડી પાળીને રાખવાની સલાહ આપે છે. આ જોઈને કહવું પડે કે-

બે પગા જ્યારે ચોપગાને

પાળે ને પંપાળે,

ત્યારે ચોપગા બેપગાનું 

સ્વાસ્થ્ય સંભાળે.

રોષથી નહીં હોંશથી

ખાવ ચંપલ

કોઈ રોડ રોમિયો યુવતીની છેડતી કરે ત્યારે યુવતી રાતીપીળી થઈ પગમાંથી ચંપલ કાઢી તાડૂકશે કે, 'ચંપલ ખાવાના વિચાર છે  કે શું?' કોઈ મહિલાના ગુસ્સાનો ભોગ બની  ચંપલ ખાવાની નોબત આવે એ પુરૂષને માટે કેવી શરમજનક સ્થિતિ કહેવાય!  પરંતુ પુરૂષોને મહિલાએ ઠાલવેલા રોષથી નહીં, પણ હોંશથી ચંપલ ખાતાં જોઈને કેવી નવાઈ લાગે! જોકે આમાં ચોખવટ એ કરવાની કે આ ચંપલ ચામડાનાં કે પ્લાસ્ટિકનાં નહીં, પણ ચંપલના આકારમાં તળવામાં આવતા પકોડાની છે. 

તાજેતરમાં જ સોશિયલ મીડિયામાં એક વીડિયો ક્લિપ વાઈરલ થઈ હતી જેમાં એક મહિલા લારીમાં ચંપલના આકારના પકોડા તળતી જોવા મળે છે અને પુરૂષો ટેસથી ખાતા જોવા મળે છે. ચંપલ પકોડાની આ વીડિયો અસલી છે કે નકલી એ ખબર નથી. બાકી તો જેના પણ ફળદ્રુપ ભેજામાં ચંપલ ભજિયાનો આઈડિયા ફ્રાય થયો હશે તેને દાદ દેવી પડે.

ઘોડાની ધરપકડ

ગધેડાની ખર-પકડ

અંગ્રેજોના રાજમાં ઘણાં ગામોમાં ઘોડસવાર પોલીસ (માઉન્ટેડ પોલીસ) સભા-સરઘસ વખતે જાપ્તો રાખતી, ખબર છેને? આઝાદી પછી અમુક શહેરોમાં ઘોડેસવાર પોલીસ કાયદો અને વ્યવસ્થા જાળવતી જોવા મળે છે, પરંતુ કાયદાનો ભંગ કરવા બદલ પોલીસ ઘોડાની ધરપકડ કરે એવો પહેલવહેલો કિસ્સો બિહારના પશ્ચિમ ચંપારણમાં બહાર આવ્યો છે. બિહારમાં દારૂબંધી છે એટલે શરાબ તસ્કરી જોરશોરથી ચાલે છે. 

પોલીસે દારૂના એક અડ્ડા ઉપર રેડ પાડી ત્યારે શરાબ તસ્કરીનું નેટવર્ક ચલાવતોે  સરદાર ભાગી ગયો, પણ તેનો ઘોડો ઝડપાઈ ગયો. ઘોડાની પીઠ ઉપરની મોટી કોથળીમાંથી ૫૦ લીટર દારૂ પકડાયો. એટલે પોેલીસ ઘોડાને પકડીને પોલીસ થાણામાં લઈ તો આવી, પણ હવે તેની સારસંભાળ  લેવાની ખરી પીંજણ થઈ છે. 

લોકઅપમાં રાખવામાં આવતા આરોપીઓ કરતાં દસ ગણી સંભાળ ઘોડાની પાખવી પડે છે. ઘોડાને સાચવવા કોઈ રખેવાળ મળતો નથી, એટલે પોલીસોએ જ તેને ટાઈમ-ટુ-ટાઈમ લીલોેચારો, ચણા અને ગોળ ખવડાવીને તાજોમાજો રાખવો પડે છે. 

હવે કોર્ટની પરવાનગીથી ઘોડાને સાચવવા માટે કોઈ રખેવાળને સોંપવામાં આવશે. રખેવાળે ઘોડાની સંભાળ લેવી પડશે, એટલું જ નહીં કેસની તારીખ પડે ત્યારે ઘોડાને કોર્ટમાં ખડો કરવો પડશે. એટલે હવે પોલીસ થાણાની જેમ અદાલતમાં પણ આરોપી અશ્વ દેખા દેશે.

બિહારમાં જેમ ઘોડાની ધરપકડ થઈ એમ  દુશ્મન પાકિસ્તાનના સિંધ પ્રાંતમાં જુગારના અડ્ડા પર પોલીસે રેડ પાડી ત્યારે ત્યાં હાજર ગધેડાની ધરપકડ કરવામાં આવી હતી. ગધેડાને માટે ખર શબ્દ પણ વપરાય છે, એટલે એમ કહી શકાય કે હિન્દુસ્તાનમાં અશ્વની અરેસ્ટ અને પાકિસ્તાનમાં ગધેડાની ખર-પકડ.

પંચ-વાણી

અનીતિ પાડે

નીતિ ઉ-પાડે.