જોરદાર આઇડિયા ક્યાં મળે?
- સ્કવેર કટ-અધીર અમદાવાદી
= જોરદાર આઇડિયા ક્યાં મળે?
- સુરેશભાઈ શાહ, ભરૂચ
- બેકાર સાળા પાસેથી.
= ટીવી પર ન્યૂઝ ચેનલમાં જે બ્રેકિંગ ન્યૂઝ આવે છે એમાં એ લોકો શું બ્રેક કરે છે?
- કૃપાલી વ્યાસ, અમદાવાદ
- આપણી ધીરજ અને વિશ્વાસ.
= વિદ્યાર્થી : ટીચર પેટ્રોલ બચાવવા માટે શું કરવું જોઈએ? ટીચર શું કહેશે?
- રમીઝ વહોરા, સુરત
- બાઇક ખેંચીને લઈ જવું.
= આ ઘોર કળિયુગમાં સતયુગ હોય એવું જીવન વ્યતિત કરતાં હોય, તેમને શું કહેવું?
- ગોપાલ દવે, અમદાવાદ
- થેન્ક યુ.
= ભૂત ગરમીમાં સફેદ ચાદર ઓઢીને ફરે તો અંદર પરસેવો ના વળે?
- લલિત ઇન્દ્રવદન દોશી, કરજણ
- તમે ટેલકમ પાવડરનું શું કરો છો?
= મારી જાત ઉપર દયા આવે છે શું કરું?
- વિનોદભાઇ પરમાર, સુરત
- આવે તે સારું કહેવાય. પેલી સીરીયલવાળી તો ગયેલી પાછી જ નથી આવતી.
= આ મોંઘવારીમાં સવાલ પુછવાનું મહેનતાણું આપવાનું ક્યારથી શરુ કરશો?
- નાગેસ ઓડેદરા, રાજકોટ
- મારી અટક અમદાવાદી છે. ભાઈ, પ્લીજ નોટ.
= નુકસાનમાં હોઈએ તોયે ફાયદો કઈ રીતે કરાય?
- જગદીશ મોદી, પેટલાદ
- સીએના માર્ગદર્શનથી.
= મોટર ડ્રાઇવિંગ સ્કૂલની ટ્રેનિંગ અમદાવાદના ટ્રાફિકમાં કામમાં આવે?
- હરેશ લાલવાની, અમદાવાદ
- ડ્રાઇવિંગ એ જવાબદારી છે. દરેકે સમજવું પડે.
= નિષ્ફળતાને સફળતામાં કઈ રીતે ફેરવાય?
- હેમંત પાટિલ, વડોદરા
- પોલિટીશિયનની જેમ વિચારીને.
= આફૂસ સારી કે કેસર ?
- કેયૂર ઠક્કર, અંકલેશ્વર
- મફતમાં મળે તો રાજાપુરી પણ સારી.
= ઉનાળામાં રાત્રે ચડ્ડો પહેરીને બહાર જતાં ડર લાગે છે, ચડ્ડી-બનિયાન ગેંગનો સમજીને ટીચી નાખે તો?
- નીરવ વ્યાસ, અમદાવાદ
- તો તમારું નામ સ્ક્વેર કટને બદલે સમચારના પાના પર છપાય.
= કોઈનો વિડીયો કોલ ક્યારે ના ઉપાડાય?
- કનુભાઈ પરમાર, દામનગર
- થાઈલેન્ડ ગયા હોઈએ ત્યારે.
= સરકાર રાશનમાં કેરી કેમ નથી આપતી?
- શિવમ યાજ્ઞિાક, રાજકોટ
- હું તો કહું છું સોનાના સિક્કાય આપવા જોઈએ. હાચ્ચે
= કોઈએ બબલ ગમ ફુલાવી હોય અને એ ફૂટે એનો બહુ ડર લાગે છે, શું કરવું?
- રાકેશ પટેલ, અમદાવાદ
- બીજું ગમે તે કરો, શેરબજારનું ના કરતાં.
= આજના જમાનામાં આદર્શ પતિ કોને કહી શકાય ?
- હંસાબહેન ભરુચા, વિરાર
- પોતાના પતિને જ કહેવાય. ધ્યાન રાખજો.
= મલ્ટિપ્લેક્સમાં ફિલ્મ સાથે પોપકોર્નના ખર્ચથી બચવા શું કરવું?
- શશિકાંત જી.દેસલે, સનિયા કનદે, સુરત
- પોપકોર્નના બંધાણીની સાથે ફિલ્મ જોવા જવું.
= તમને પ્રશ્નો વાંચીને હસવું આવે છે કે રડવું?
- સોલંકી ચિરાગ, નંદેસરી
- અમુક પ્રશ્નો વાંચીને તો ડૂસકાં ભરું છું.
= મરચાં હવે કેમ મોળા આવે છે?
- મુકેશ ચંદારાણા, મીઠાપુર
- છોકરીઓ પણ હવે ક્યાં તીખી આવે છે?
=નેતાઓ ગાંધીજીની વિચારધારા, આદર્શો અપનાવે એમ તેમના જેવો પોશાક ક્યારે અપનાવશે?
- એ. કે. ગોસર વાંકાનેર
- પોતડીની ફેશન આવશે ત્યારે. ઘડિયાળની તો આવી ગઈ.
