ઘરમાં ઓક્સિજન વધારતાં છ શ્રેષ્ઠ છોડવાં...!!

- શોધ સંશોધન : વસંત મિસ્ત્રી

કોરોના જેવા રોગોએ આપણને ઓક્સીજનનું મહત્વ સમજાવ્યું છે. મોટા પ્રમાણમાં ઓક્સીજન માટે સીલિન્ડર જોઇએ પરંતુ ઘરેલું ઉપયોગ માટે ઈન્ડોર પ્લાન્ટ્સ સારૂ કામ આપે છે. કેટલીક વનસ્પતિ દિવસે અને રાતે પણ ઓક્સીજન હવામાં ફેંકે છે.

હવે ઘરેઘેર પ્રાણાયમ સામાન્ય બની ગયો છે ત્યારે ઘરની હવા શુધ્ધ હોવી જરૂરી છે. અહીં છ પ્લાન્ટ્સ રજૂ કર્યા છે જે શ્રેષ્ઠ ઈન્ડોર પ્લાન્ટ્સ છે અને ઘરની હવામાં ઓક્સીજન વધારે છે.

(૧) એરીકા પામ્સ :

એરીકા પામ્સ એક સરસ ઈન્ડોર પ્લાન્ટ છે જે હવામાં રહેલાં ઝેરી તત્ત્વો ચૂસે છે અને ઓક્સીજન બહાર ફેંકે છે. ઘરમાં આ પ્લાન્ટની બે-ત્રણ જોડી રાખવાથી પુરતો ઓક્સીજન ઉત્પન્ન થાય છે. એરીકા પામ્સની શ્રેષ્ઠ જગા લિવિંગ રૂમ છે. તેને વારંવાર પાણી આપવું જરૂરી છે. ઘરમાં જેટલા સભ્યો હોય એટલા પ્લાન્ટ્સ ગોઠવવા.

(૨) સ્નેક પ્લાન્ટ :

સાપ જેવો દેખાતો આ પ્લાન્ટ ઈન્ડોર પ્લાન્ટ તરીકે શ્રેષ્ઠ છે. તે ભરપુર ઓક્સીજન બહાર ફેંકે છે અને હવામાંના ઝેરી વાયુઓ શોષે છે. નાસાએ પણ આ છોડને અનુમતિ આપેલ છે કારણ કે તે હવાને શુધ્ધ કરે છે. હવામાંથી ઝેરી તત્ત્વો જેવાં કે બેન્ઝીન, નાઇટ્રોજન ઓક્સાઇડ, ઝાયલીન, ફોર્મોલીહાઇડ અને ટ્રાયક્લોરોઈથીલીન વગેરેને શોષી લે છે. આ છોડ હવામાં ઓક્સીજન ફેંકે છે અને હવામાંનો કાર્બન ડાયોક્સાઇડ શોષી લે છે.

(૩) એલો વેરા :

ઊગાડવામાં સરળ એવો આ છોડ હવામાંથી કાર્બન ડાયોકસાઇડ, બેન્ઝીન, ફોર્મોલીહાઇડ શોષી લે છે અને ઓક્સીજન બહાર ફેંકે છે. ઓછો તડકો અને ભેજવાળી જમીનમાં તે સરળતાથી ઊગે છે. તેની અંદરની માંસલ પટ્ટી, એન્ટી બેકટેરીઅલ અને એન્ટી ઈન્ફ્લામેટરી છે એટલે ચામડીની સારવારમાં તે ખાસ વપરાય છે.

(૪) મની પ્લાન્ટ :

અનેક ઘરોમાં મની પ્લાન્ટ જોવા મળે છે તે ઓક્સીજન હવામાં ફેંકે છે અને ઝેરી વાયુઓ શોષી લે છે. બોટલ કે પોટમાં સરળતાથી ઊગે છે. તે સરસ ઊગે તો પૈસા વધે એવી માન્યતા પણ લોકોમાં ઘર કરી ગઇ છે.

(૫) પીસ લીલી :

સફેદ પુષ્પો ધરાવતો આ છોડ નાસાની સંમતિ મેળવી ચૂક્યો છે. તે એક શ્રેષ્ઠ સફાઇ કરનાર પ્લાન્ટ છે. ઈલેક્ટ્રોનિક્સ, ફર્નિચર અને બીજાં સાધનોમાંથી નીકળતા ઝેરી વાયુને તે શોષી લઇ હવા શુધ્ધ કરે છે તે એક સુપર હવાઇ શુધ્ધીકરણ કરનાર પ્લાન્ટ છે.

(૬) ગ્રીન સ્પાઇડર પ્લાન્ટ :

બાળકો અને પાલતુ પ્રાણીઓ માટે સલામત અને બીનઝેરી ગણાતો ગ્રીન સ્પાઇડર પ્લાન્ટ કરોળિયાના પગો જેવો દેખાય છે. એક જ પ્લાન્ટ લગભગ ૨૦૦ ચો.મી. વિસ્તારની હવા શુધ્ધ કરે છે. આ એર શુધ્ધીકરણ પ્લાન્ટ હવામાંના (ઈન્ડોર) ઝાયલીન, ફોર્માલીહાઇડ શોષી લે છે. આપણાં ઘરના નવા ફર્નીચર, ગાદીઓ, ઈલેક્ટરોનિક્સ વગેરે સતત ઝેરી તત્ત્વો હવામાં ફેંકતા હોય છે એટલે તે દૂર થવા જરૂરી છે.