AI અને MLl ના ઉપયોગ બાબતે સેબીની ચેતવણી
બજાર નિયમનકાર સેબીએ બજારના સહભાગીઓ દ્વારા ઉપયોગમાં લેવાતા આર્ટિફીશિયલ ઇન્ટેલિજન્સ અને મશીન લર્નિંગ એપ્લિકેશનો અને સાધનોના દેખરેખ અને સંચાલન માટે ડ્રાફ્ટ માર્ગદર્શિકા બહાર પાડી છે. આ માર્ગદર્શિકા જવાબદારી સાથે તેનો ઉપયોગ સુનિશ્ચિત કરવાના હેતુથી લાવવામાં આવી રહી છે. પ્રસ્તાવિત માર્ગદર્શિકામાં તેના શાસન, રોકાણકાર સુરક્ષા, જાહેરાત, પરીક્ષણ માળખું, ન્યાયીતા અને પૂર્વગ્રહ અને ડેટા ગોપનીયતા અને સાયબર સુરક્ષા પગલાં સહિત અનેક મુખ્ય ધોરણો સામેલ છે. હાલમાં, આર્ટિફીશિયલ ઇન્ટેલિજન્સ અને મશીન લર્નિંગનો ઉપયોગ સ્ટોક એક્સચેન્જ, બ્રોકર્સ અને મ્યુચ્યુઅલ ફંડ્સ દ્વારા સર્વેલન્સ, સોશિયલ મીડિયા એનાલિટિક્સ, ઓર્ડર એક્ઝિક્યુશન, કેવાયસી પ્રોસેસિંગ અને ગ્રાહક સપોર્ટ જેવા વિવિધ હેતુઓ માટે વ્યાપકપણે થાય છે. સેબીએ પ્રસ્તાવ મૂક્યો છે કે બજારના સહભાગીઓએ અલ્ગોરિધમિક ટ્રેડિંગ, એસેટ મેનેજમેન્ટ, પોર્ટફોલિયો મેનેજમેન્ટ અને સલાહકાર સેવાઓ જેવા કાર્યોમાં આર્ટિફીશિયલ ઇન્ટેલિજન્સ અને મશીન લર્નિંગ ટૂલ્સના તેમના ઉપયોગનો ખુલાસો કરવો જોઈએ.
PSU બેંકોમાં EDની છ જગ્યાઓ માટે 94 અરજદારો
જાહેર ક્ષેત્રની બેંકોમાં એક્ઝિક્યુટિવ ડિરેક્ટર (ED) ની છ જગ્યાઓ માટે ઇન્ટરવ્યુ આ મહિનાના અંત સુધીમાં યોજાવા જઈ રહ્યા છે. આ માહિતી આપતાં, સરકારી સૂત્રોએ જણાવ્યું હતું કે સરકારી નાણાકીય સંસ્થાઓના ટોચના મેનેજમેન્ટ પદો પર નિમણૂક કરતી ફાઇનાન્સિયલ સર્વિસીસ ઇન્સ્ટિટયુશન્સ બ્યુરો આ ઇન્ટરવ્યુ લેશે. સરકારી બેંકોમાં એક્ઝિક્યુટિવ ડિરેક્ટરની છ ખાલી જગ્યાઓ માટે ૯૪ અરજીઓ મળી છે. તાજેતરમાં, બેંકોમાં મેનેજિંગ ડિરેક્ટર અને ચીફ એક્ઝિક્યુટિવ ઓફિસર્સ (CEO) ની નિમણૂક પછી, ઘણા ફેરફારો થયા છે, જેના કારણે ઘણી સરકારી બેંકોમાં નવી તકો ઉભી થઈ છે. કેટલાક એક્ઝિક્યુટિવ ડિરેક્ટર હવે નિવૃત્ત પણ થવાના છે, જેના કારણે ખાલી જગ્યાઓ વધી છે. સરકારી બેંકોમાં એક્ઝિક્યુટિવ ડિરેક્ટર્સને ટોચના મેનેજમેન્ટ અધિકારીઓ માનવામાં આવે છે.
