નિકાસનો 97% હિસ્સો ફક્ત એક જ દેશમાં

કસ્ટમ ડેટા દર્શાવે છે કે ફોક્સકોને માર્ચ અને મે દરમિયાન ભારતમાંથી નિકાસ કરાયેલા લગભગ તમામ આઇફોન યુએસ મોકલ્યા હતા. આ ૨૦૨૪માં સરેરાશ ૫૦ ટકા કરતા વધારે છે અને ચીન પર ઉચ્ચ યુએસ ટેરિફ ટાળવા માટે એપલના પ્રયાસોનો સંકેત છે. આંકડા દર્શાવે છે કે એપલે લગભગ સંપૂર્ણપણે ભારતીય નિકાસ પર યુએસ બજારમાં ધ્યાન કેન્દ્રિત કર્યું છે. અગાઉ આ આઇફોન નેધરલેન્ડ્સ, ચેક રિપબ્લિક અને બ્રિટન સહિત અન્ય ઘણા દેશોમાં મોકલવામાં આવ્યા હતા. ફોક્સકોને માર્ચથી મે દરમિયાન ભારતમાંથી ૩.૨ બિલિયન ડોલરના આઇફોન નિકાસ કર્યા હતા. આમાંથી, સરેરાશ ૯૭ ટકા યુએસ મોકલવામાં આવ્યા હતા, જ્યારે ૨૦૨૪માં આ સરેરાશ ૫૦.૩ ટકા હતી. મે ૨૦૨૫માં ફોક્સકોન દ્વારા યુએસ મોકલવામાં આવેલા આઇફોનનું કુલ મૂલ્ય લગભગ ૧ બિલિયન ડોલર હતું, જે માર્ચમાં રેકોર્ડ ૧.૩ બિલિયન ડોલર આઇફોન શિપમેન્ટ પછી બીજા ક્રમનું સૌથી વધુ છે. આ વર્ષના પ્રથમ પાંચ મહિનામાં, ફોક્સકોને ભારતમાંથી અમેરિકામાં ૪.૪ બિલિયન ડોલરના મૂલ્યના આઇફોન મોકલ્યા, જે ૨૦૨૪ દરમિયાન ૩.૭ બિલિયન ડોલર હતા.

બંધ બેંક ખાતાઓ માટે નવી માર્ગદર્શિકા જારી 

ભારતીય રિઝર્વ બેંકે બંધ બેંક ખાતાઓ માટે નવી માર્ગદર્શિકા જારી કરી છે. આમાં, નિષ્ક્રિય બેંક ખાતાઓ અને દાવો ન કરાયેલ થાપણોને પુનર્જીવિત કરવાનું પહેલા કરતા વધુ સરળ બનાવ્યું છે. આ નિયમોનો ઉદ્દેશ્ય ગ્રાહકોની સુવિધા વધારવા, બેંકિંગ પ્રક્રિયાને સરળ બનાવવા અને સતત વધી રહેલા બેંકિંગ છેતરપિંડીને ઘટાડવાનો છે. હવે ગ્રાહકોને KYC અપડેટ કરવા માટે તેમની હોમ બ્રાન્ચમાં જવાની જરૂર રહેશે નહીં. નવા નિયમો હેઠળ, ગ્રાહકો હવે કોઈપણ શાખાની મુલાકાત લઈને તેમની KYC માહિતી અપડેટ કરી શકે છે,  અગાઉ, ગ્રાહકોને આ કામ ફક્ત તેમની હોમ બ્રાન્ચમાં જ કરવું પડતું હતું, જેના કારણે ઘણા લોકોને મુશ્કેલી પડતી હતી. આ ઉપરાંત, બેંકોએ હવે વિડિઓ-આધારિત ગ્રાહક ઓળખ પ્રક્રિયા (V-CIP)ની સુવિધા પૂરી પાડવી પડશે. આ પ્રક્રિયામાં, ગ્રાહકો વિડિઓ કોલ દ્વારા તેમની ઓળખ ચકાસી શકે છે. આ ખાસ કરીને તે લોકો માટે ઉપયોગી છે જેઓ દૂરના વિસ્તારોમાં રહે છે અને બેંક શાખા સુધી પહોંચી શકતા નથી.