રેસિડેન્ટ ડોક્ટરોની આજે હડતાળ અને અધ્યાપકો-ડોક્ટરોનું આંદોલન

અમદાવાદ

કોરોનાની ત્રીજી લહેરના ભણકારા અને વધતા જોખમ વચ્ચે સરકારની મુશ્કેલી વધી શકે છે.કારણકે આવતીકાલે ૨૯મીથી જ્યાં તમામ સરકારી મેડિકલ-ડેન્ટલ ડોક્ટરો પડતર પ્રશ્નોને લઈને આંદોલન શરૃ કરવાના છે ત્યાં બીજી બાજુ પીજી મેડિકલ કાઉન્સેલિંગ સ્થગિત થવા મુદ્દે રેસિડેન્ટ ડોક્ટરો (પીજી સેકન્ડ અને થર્ડ સ્ટુડન્ટ) હડતાળ પાડશે અને ઓપડી સેવાથી અળગા રહેશે.

પીજી મેડિકલ કાઉન્સેલિંગ એક મહિનો સ્થગિત કરી દેવાતા દેશભરના રેસિડેન્ટ ડોક્ટરો હોસ્પિટલોમાં ભારણ વધવાને લીધે રોષે ભરાયા છે. દોઢ વર્ષથી નવી બેચ ન આવતા ફર્સ્ટ યરના પીજી સ્ટુડન્ટ ન હોવાથી બીજા અને ત્રીજા વર્ષના રેસિડેન્ટ ડોક્ટરો(પીજી સ્ટુડન્ટ) પર કામનુ ભારણ કોરોનાથી ખૂબ જ વધ્યુ છે અને જે આગળ પણ હજુ વધશે તેવી ફરિયાદ સાથે રેસિડેન્ટ ડોક્ટરોએ ૨૭મીથી આંદોલન શરૃ કર્યુ છે. જુનિયર ડોક્ટર્સ એસોસિએશના નેજા હેઠળ ગઈકાલે રેસિડેન્ટ ડોક્ટરોએ બી.જે.મેડિકલ કોલેજ ખાતે ધરણા કર્યા હતા અને આવતીકાલે રાજ્યની તમામ સરકારી મેડિકલ કોલેજોના રેસિડેન્ટ ડોક્ટરો હડતાળ પાડશે.સવારે ૧૦ વાગે તમા રેસિડેન્ટ ડોક્ટરો એકઠા થશે અને ધરણા કરશે અને ઓપીડી સેવાથી અળગા રહીને તમામ રૃટિન કામગીરીમાં પણ નહી જોડાય .જો કે ઈમરજન્સી સેવાઓ ચાલુ રખાશે અને સોંપાયેલી કામગીરી કરશે. આવતીકાલે ગુજરાત સહતિ દેશભરની તમામ મેડિકલ કોલેજોના પીજી સ્ટુડન્ટ-રેસિડેન્ટ ડોક્ટરો એક દિવસની હડતાળ પર ઉતરવાના છે. જો સરકાર દ્વારા પીજી કાઉન્સેલિંગ મુદ્દે કોઈ ચોક્કસ નિર્ણય ન લેવાય તો રેસિડેન્ટ ડોક્ટરો આગળ પણ આંદોલન ચાલુ રાખશે અને હડતાળ પાડી શકે છે.

આ ઉપરાંત ગુજરાતના મેડિકલ અધ્યાપકો પણ આવતીકાલે ૨૯મીથી આંદોલન શરૃ કરવાના છે.સરકાર દ્વારા અગાઉ પગાર-બઢતી સહિતના પડતર પ્રશ્નોને લઈને જે ઠરાવ કરવામા આવ્યો હતો અને મેડિકલ અધ્યાપકો-ડોક્ટરોને જે બાંયધરી અપાઈ હતી તેનુ પાલન ન થતા ગુજરાત મેડિકલ ટીચર્સ એસોસિએશનના નેજા હેઠળ તમામ સરકારી મેડકિલ કોલેજોના અધ્યાપકો આવતીકાલે આંદોલન શરૃ કરશે. જેમાં સરકારી મેડિકલ કોલેજો અને તમામ જીએમઈઆરએસ મેડિકલ કોલેજો તેમજ ડેન્ટલ કોલેજોના  સરકારી તબીબો ( ઈનસર્વિસ તબીબો, કલાસ ૨ મેડિકલ ઓફિસરો)  જોડાશે. ઉપરાંત ગુજરાતના પીએચસી સેન્ટર,સીએચસી સેન્ટર અને ઈએસઆઈએસના તથા સિવિલ હોસ્પટલના તમા સરકારી અને ડેન્ટલ તબીબો આવતીકાલે  બ્લેક રીબન પહેલીને પ્રોટેસ્ટ કરશે અન ડીનને આવેદનપત્ર આપશે.