પુત્રીના મિત્રની મદદ કરવા જતાં મહિલાએ રૂ.84,352 ગુમાવ્યા
ONGCના અધિકારી સાથે અને પતંજલિ પ્રોડક્ટસમાં ડિસ્કાઉન્ટના નામે વેપારી સાથે છેતરપિંડી : ઓનલાઈન ઠગાઈની વધુ 13 ફરિયાદ
અમદાવાદ : ઓનલાઈન ચિટીંગ કરતી ટોળકીઓ હવે મહિલાઓને ટાર્ગેટ કરી રહી છે. એલીસબ્રિજમાં રહેતા મહિલાએ મુંબઈની રહેતી પુત્રીના કહેવાથી તેના મિત્રની મદદ કરવા માટે ઓનલાઈન પેમેન્ટ કરી 84352 રૂપિયા ગુમાવ્યાં છે. ચોંકાવનારી બાબત એ છે કે, લિકરની ઓનલાઈન ખરીદી માટે અપાયેલો નંબર જ ઈ-ચિટરનો હતો.
ઓનલાઈન ખરીદી-વેચાણના સોદામાં ઓએનજીસીના અિધકારી અને પતંજલીની પ્રોડક્ટસમાં ડીસ્કાઉન્ટના નામે વેપારી સાથે છેતરપિંડી કરાઈ છે. અમદાવાદમાં ઓનલાઈન ઠગાઈની વધુ 13 ફરિયાદ નોંધાઈ છે. એલીસબ્રિજમાં રહેતા 62 વર્ષના દિપાલીબહેન ત્રિવેદીને મુંબઈમાં રહેતી પુત્રીએ ફોન કરીને પોતાના મિત્ર વતી ઓનલાઈન પેમેન્ટ કરી આપવા કહ્યું હતું.
મિત્ર આદિત્ય વર્માએ લિકરની બોટલ ખરીદી હતી તેનું પેમેન્ટ પોતાના ગુગલ-પેથી થતું ન હોવાથી આદિત્યએ મિત્ર શીલની મદદ માગી હતી. શીલએ માતા દિપાલીબહેનને વોટ્સ-એપ પર ક્યુ આર કોડ મોકલ્યો હતો તેનાથી પેમેન્ટ કરવા કહ્યું હતું. પેમેન્ટ થતું નહોતું એવામાં એક ફોન આવ્યો હતો અને પેમેન્ટ મોટું છે એટલે વેરિફીકેશન કોડ સ્કેન કરવો પડશે તેમ કહેવાયું હતું.
વધુ એક ક્યુઆર કોડ મોકલાયો તેના પર દિપાલીબહેને સ્કેન કરતાં જ કુલ 84352 ડેબીટ થઈ ગયા હતા. તપાસ કરતાં ખબર પડી કે, આદિત્યએ લિકર ખરીદવા મુબઈના લિકર શોપનો નંબર ઓનલાઈન મેળવ્યો હતો. ખરેખર આ નંબર લિકર શોપનો હતો જ નહીં. આખરે દિપાલીબહેને એલીસબ્રિજ પોલીસ સ્ટેશનમાં ફરિયાદ આપી છે.
* સાબરમતીમાં રહેતા વિદ્યાર્થી સાથે સોફાના ઓનલાઈન ખરીદદાર બનીને ગુગલ-પેથી પેમેન્ટના બહાને રૂ. 24998ની છેતરપિંડી.
* શાહપુરના યુવકે ક્રેડીટ કાર્ડ માટે ્એપ્લિકેશન કરી હતી તે મેળવવા ઓનલાઈન સર્ચ કરી સંપર્કથી એપ્લિકેશન ડાઉનલોડ કરાવી 1.44 લાખની ઠગાઈ.
* સાબરમતીમાં રહેતા વિદ્યાર્થીએ સોફાના ઓનલાઈન ખરીદદાર બનીને ગુગલ-પેથી પેમેન્ટના બહાને રૂ. 24998ની છેતરપિંડી.
* એલીસબ્રિજના 77 વર્ષના વૃધૃધાને ક્રેડીટ કાર્ડ બંધ કરવાનું છે તેવો ડર બતાવી કાર્ડ ચાલુ રાખવાની પ્રોસિજરના બહાને 40000નું ઈ-ચિટિંગ
* ઓએનજીસીના એક્ઝિક્યુટીવ એન્જિનિયર જીતેન્દ્રસિંઘ સોલંકી પાસેથી કેમેરાની ખરીદીના ટોકનપેટે 5000 ઓનલાઈન મેળવી લઈને ચિટિંગ.
* સાબરમતીના રહીશ મહિલાને એરપોર્ટના કાર્ગો ડિપાર્ટમેન્ટમાં સુપરવાઈઝરની નોકરી અપાવવાનું કહી 20500ની ઓનલાઈન છેતરપિંડી
* ગાયકવાડ હવેલીના રહીશ યુવકને વધુ લીમિટવાળું ક્રેડીટ કાર્ડ અપાવવાનું કહી ફોર્મ ભરાવીને ઓનલાઈન 25992 રૂપિયા સેરવી લેવાયા.
* ખાડિયાના રહીશ, આયુર્વેદના વેપારીને પતંજલીની પ્રોડક્ટસમાં 20 ટકા ડીસ્કાઉન્ટની લાલચ આપી ફોન-પેથી 1.85 લાખ સેરવી લેવાયા.
* સરસપુરના યુવકને ફ્રીજ, ટીવી, ડબલ બેડ, ડાઈનિંગ ટેબલ માત્ર 41000માં આપવાની લાલચ ફેસબૂક થકી આપી ફોન-પે દ્વારા 21998 રૂપિયા મેળવી છેતરપિંડી.
* નવા નરોડા ખાતે રહેતા હાર્દિક પટેલના બેંક આફિસરની ઓળખ આપીને એક ગઠિયાએ રૂપિયા 75 હજાર અન્ય એકાઉન્ટમાં ટ્રાન્સફર કરી દીધા હતા.
* મણીનગરના જય ગોસળિયાને ક્રેડીટ કાર્ડનો ચાર્જ એપ્લીકેશનની મદદથી ભરવાના નામે ટ્રાન્જેક્શન કરાવીને રૂપિયા 1.25 લાખની છેતરપીંડી કરી હતી.
* કુબેરનગરમાં રહેતા દેવીબહેન ગોપલાણીને સસ્તામાં સોફા સેટ આપવાનું કહીને અલગ અલગ ટ્રાન્જેક્શન કરાવીને રૂપિયા 1.12 લાખની છેતરપીંડી કરી હતી.
