બ્લાઇન્ડ ડેટનું 'રિપ્લેસમેન્ટ' ભારે પડયું

• રજનીગંધા-વિભાવરી વર્મા
• 'એકચ્યુઅલી શું છે, આ રોયલ એન્ફીલ્ડ મારી નથી. ખાલી તમને ઇમ્પ્રેસ કરવા માટે.. બટ આઈ એમ વેરી સોરી, હોં ?'

'ક્યા રનો છોકરી-છોકરી કર્યા કરતો હતો ને ? તો લે, આ મારા મસ્ત રોયલ એન્ફીલ્ડ બાઈકની ચાવી, અને એન્જોય કર એક મસ્ત છોકરી જોડેની ડેટ…'
સ્ટાઇલિશ અને ધનવાન બાપનો નબીરો શૌનક એના મિડલ ક્લાસિયા દોસ્ત મેહુલને જોરદાર ઓફર આપી રહ્યો હતો. મેહુલ હજી 'ગુંચવાયેલો હતો'
'ડેટ ? છોકરી જોડે ? તું મને કયા હિસાબે અપાવી રહ્યો છે ?'
'યાર, તું તો જાણે છે ને, હું તો આ મોબાઈલના ડેટિંગ એપ વડે કંઇ કેટલીયે છોકરીઓ જોડે ડેટ પર જઇને જલસાઓ કરતો જ હોઉં છું.'
'અચ્છા, તો એમાંની કોઈ છોકરીનું તું 'દાન' કરી રહ્યો છે ?'
'એવું નથી ટોપા ! આજે જે ડેટ છે એ 'બ્લાઇન્ડ ડેટ' છે. મતલબ કે મનેય ખબર નથી કે સામેવાળી છોકરી કોણ છે ! અને એનેય ખબર નથી કે છોકરો કયો આવવાનો છે !'
'એટલે ? તારે બદલે મારે જવાનું ?' મેહુલના મનમાં મીઠો ઝબકારો થયો.
'હા, કેમકે હમણાં જ મેસેજ આવ્યો કે મારા એક માસાજી એક્સપાયર થઇ ગયા છે. મારે ત્યાં જવું પડશે.'
'પણ એક મિનિટ !' મેહુલ બોલ્યો.'મારી પાસે તો સરખાં કપડાં ય નથી.'
'એની ચિંતા ના કર ! મારાં કપડાં પહેરીને જજેને ? અને હા, ગળામાં લાલ સ્કાર્ફ રાખવાનો છે. પેલી છોકરી પાસે ગ્રીન કલરનો સ્કાર્ફ હશે ! હવે જા બકા, જલસા કરજે…'

મેહુલને શૌનકનું હેવી રોયલ એન્ફીલ્ડ બાઈક ચલાવતાં ફાવતું નહોતું છતાં લીધું. શૌનકનું શાઈનિંગવાળું મોઘું રંગીન શર્ટ ઢીલું પડતું હતું છતાં પહેર્યું. શૌનકના જ મોટી સાઇઝના રે-બેન ગોગલ્સ ઠઠાડયા ! હા, મોબાઈલ પોતાનો જ રાખવો પડયો…માત્ર દસ હજારવાળો !
જ્યારે મેહુલ પેલી ફાઈવ સ્ટાર હોટલની આલિશાન રેસ્ટોરન્ટમાં જઇને એક ટેબલ પર બેઠો ત્યારે તે સખ્ખત નર્વસ હતો. સાલું, અહીં મળવા આવનારી છોકરી તો કેવી હાઈ-ફાઈ હશે ?
દિલમાં ધકધક ચાલુ જ હતું. ત્યાં તેની તરફ આવી રહેલી યુવતી, જેણે માથા પર ગ્રીન કલરનો નાનો સ્કાર્ફ બાંધેલો હતો તેને જોઇને મેહુલની ધકધક ડબલ થઇ ગઈ!
'એક્સક્યુઝ મિ ! તમે જ મિસ્ટર રણબીર ?'
'યસ ! અને તમે જ આલિયા ?'
આ 'રણબીર-આલિયા' એમનાં 'કોડનેમ' હતાં. કેમ કે અસલી ઓળખ તો આપવાની જ નહોતી.
મેહુલ યાને 'રણબીર' તો આ 'આલિયા'ને જોતો જ રહી ગયો ! એક તો હોઠ ઉપર ચોપડેલી લિપસ્ટીકનો રંગ એટલો ભડકીલો પિંક હતો કે જાણે પ્લાસ્ટિકનો હોઠ ચોંટાડયો હોય ! ઉપરથી ચહેરા ઉપર વદારે પડતો મેકપ હતો. અને એ 'આલિયા'નો ટોપલેસ ડ્રેસ ? તૌબા તૌબા… છોકરીનું જે માપ હશે તેના કરતાં કમ સે કમ બે સાઇઝ નાનું એનું ટોપ હતું ! જેના કારણે એના ઉભાર કંઇ વધારે પડતા જ બહાર આવી ગયા હતા !
મેહુલની હથેળીમાં પસીનો વળી ગયો ! હવે કેમનું થશે આગળ ?
એવામાં વેઇટર મેનુ મુકી ગયો. એ ખોલતાં જ મેહુલની આંખે અંધારાં આવી ગયાં ! સાલી અહીં એક મામુલી ચાની કિંમત ૫૦૦ રૂપિયા હતી !
મેહુલ તરત જ બોલ્યો : 'આપણે બીજે ક્યાંક જઈને બેસીએ ? અહીં જરા-'
'કેમ પૈસા નથી ખિસ્સામાં ? પેલી નફ્ફટાઇથી બોલી.'
'ના… એવું નથી પણ - 'મેહુલે લોચા વાળ્યા. 'પણ, શું છે મને એરકંડીશનીંગમાં ફાવતું નથી. બે દિવસ પહેલાં શરદી થઇ હતી ને, એટલે ડોક્ટરે ના પાડી છે.'
'સમજી ગઈ.' પેલી છોકરી તરત જ ઊભી થઇ ગઈ. 'ચલો ? ક્યાં જવાનું છે ?'
એ તો મેહુલને પણ ક્યાં ખબર હતી ? છતાં છોકરીને બાઈક પર બેસાડીને કીક મારી. નવો લોચો હવે શરૂ થયો. મેહુલે રોયલ એન્ફીલ્ડ પહેલી જ વાર હાથમાં લીધી હતી એટલે ગિયર બદલતાં ઝટકા લાગી રહ્યા હતા.
આમાં ને આમાં પેલીનું શરીર મેહુલની પીઠ પર વારંવાર દબાતું હતું ! આમ તો મેહુલને મસ્ત મજાની

ઝણઝણાટી થઇ રહી હતી. પણ બે ચાર-રસ્તા વટાવ્યા ત્યાં તો પાછળથી છોકરીનો અવાજ આવ્યો : 'ઓ મિસ્ટર રણબીર ! બાઈકને જાણી જોઇને ઝટકા કેમ મરાવો છો ? કંઇ મેનર્સ જેવું છે કે નહીં ? ઊભી રાખો બાઈક આઈ એમ ગોઇંગ !'
મેહુલે છોભીલા પડીને બાઈક ઊભી રાખી. પેલી છોકરી ફટ કરતી ઉતરી ગઈ. મેહુલને થયું કે યાર, આ તો પહેલીવાર આવેલો ચાન્સ હાથથી જશે. એટલે એણે તરત જ વટાણા વેરી નાંખ્યા : 'એકચ્યુઅલી શું છે, આ રોયલ એન્ફીલ્ડ મારી નથી. ખાલી તમને ઇમ્પ્રેસ કરવા માટે.. બટ આઈ એમ વેરી સોરી, હોં ?'
આ 'હોં' બોલતાં જ મેહલે પોતાની જીભ કચરી ! સાલું, મારું દેશીપણું બહાર આવી જ ગયું ! પણ શી ખબર, એ જ 'હોં' ઉપર પેલી હસી !
તરત જ મેહુલે બીજો ચાન્સ માર્યો : 'હું શું કહું છું, સામે જ એક સાઉથ ઇન્ડિયન રેસ્ટોરન્ટ છે. અહીં ઇડલી અને વડા બેસ્ટ મળે છે ! તમે ટ્રાય તો કરો ?
'હં…' એ ફરી હસી. 'અને અહીં ભાવ પણ ઓછા હશે નહીં ? બાકી, એસી તો અહીં પણ હશે જ ને?'
મેહુલ શું બોલે ? છતાં છોકરી રેસ્ટોરન્ટમાં આવવા તૈયાર થઇ એ જ મોટી વાત હતી.
અંદર બેસીને ઓર્ડર આપ્યા પછી મેહુલે જોયું કે આખી રેસ્ટોરન્ટમાં તમામ લોકોની નજર આ શોકીંગ પિંક લિપસ્ટીકવાળી હેવી મેકપવાળી છોકરીના 'ચપોચપ ડ્રેસમાંથી નીકળી આવતાં અંગો ઉપર જ ચોંટી છે !'
મેહુલે સ્હેજ ખોંખારો ખાને કહ્યું 'એક રિકવેસ્ટ કરું ? તમે અંદર વોશરૂમમાં જઇને આ મેકપ થોડો સાફ કરી શકો ? અને ખાસ તો આ મારો રેડ સ્કાર્ફ લેતા જાવ. એને તમારા ટોપ ઉપર જરા ઢાંકી શકો ? કેમ કે…'
છોકરી સમજી ગઈ. થોડીવારે એ વોશરૂમમાંથી પાછી આવી ત્યારે એનો નેચરલ ફેસ ખરેખર સુંદર લાગી રહ્યોહતો. અને હા, પેલા ઢાંકેલા સ્કાર્ફને લીધે હવે મેહુલની નર્વસનેસ જતી રહી હતી.
જોકે નાસ્તો કરતી વખતે ખાસ વાતો ના થઇ કેમ કે મેહુલને ડર હતો કે ક્યાંય પોતાની અસલિયત ઉઘાડી ના પડી જાય ! આમેય પોતપોતાનાં અસલી નામો તો કહેવાનં જ નહોતાં.
રેસ્ટોરન્ટમાંથી બહાર નીકળ્યા પછી મેહુલને આઇડિયા આવ્યો, 'હું શું કહું છું, એકાદ ગાર્ડનમાં જઈને બેસવું છે ? આમ બ્લાઇન્ડ ડેટમાં મળ્યા છીએ તો -'
'વસૂલ પણ કરવું પડશે, નહીં ?' છોકરી ખડખડાટ હસવા લાગી. પણ પછી એણે બહેતર આઇડિયા આપ્યો.
'અહીં નજીકમાં એક મહાદેવનું મંદિર છે. એની આસપાસ મોટો ચોક છે અને મોટાં મોટાં ઝાડ નીચે સરસ ઓટલા પણ છે… ત્યાં જઈશું ?'
મેહુલને આ ગમ્યું.
છેવટે જ્યારે મંદિરમાંથી લાડુનો પ્રસાદ લઇને ઝાડ નીચેના ઓટલા પર બન્ને બેઠા ત્યારે મેહુલથી ના રહેવાયું. તેણે કહી જ દીધું : 'સોરી હોં ? એકચ્યુલી તો હું મારા એક ફ્રેન્ડની જગ્યા પર આવ્યો છું. અસલમાં તો હું - '
'મને હતું જ !' એ ખડખડાટ હસી પડી 'કેમ કે હું પણ મારી બહેનપણીની જગ્યાએ આવી ગઇ છું !'
એ પછી જાતજાતની વાતો ચાલી… પછી જ્યારે છૂટા પડી રહ્યા હતા ત્યારે મેહુલે કહ્યું 'આમ તો તમારો મોબાઈલ નંબર ના માગવો જોઇએ, પણ તમને ફરી ક્યારેક મળવાનું મન થાય તો -'
'ફરી ક્યારેક શેનું ?' એ 'આલિયા' જેનું નામ 'નિષ્ઠા' હતું તે હસીને બોલી 'તમારો આ રેડ સ્કાર્ફ પાછો આપવા માટે તો મળવું જ પડશે ને ?'