કોર્પોરેશનની વેબસાઈટ હેક કરી લખ્યું તુર્કી કે મિત્ર બનો, શત્રુ મત બનો

પેજ રીલોડ કરવા માટે આઈટી ટીમો કામે લાગી સાયબર ક્રાઈમમાં ગુનો દાખલ કરવામાં આવશે

ગાંધીનગર : ગાંધીનગર મહાનગરપાલિકાની ઓફીસિયલ વેબસાઈટ તુર્કીના હેકર્સે હેક કરતાં દોડધામ મચી ગઈ છે. હેકર્સો દ્વારા મનપાનું હોમ પેજ હેક કરીને તેમાં તુર્કી ભાષામાં લખાણ કરવામાં આવ્યું છે.જેમાં લખ્યું છે કે તુર્કી કે મિત્ર બનો, શત્રુ મત બનો. જુર્મ સે અબ તક છુટ ચુકે લોગો કા ભવિષ્ય ભયાનક હોગા. જેને લઈ કોર્પોરેશનની આખી ટીમ કામે લાગી છે તો આ અંગે સાયબર ક્રાઈમમાં ગુનો દાખલ કરવા માટેની પણ તજવીજ શરૃ કરવામાં આવી છે.   

રાજયના પાટનગર ગાંધીનગરમાં એકબાજુ વાઈબ્રન્ટ સમિટની સુરક્ષા લઈ પોલીસ એકશન પ્લાન બનાવી રહી છે ત્યારે આ સ્થિતિમાં તુર્કીના હેકરો દ્વારા ગાંધીનગર મહાનગરપાલિકાની ઓફીશીયલ વેબસાઈટને હેક કરવામાં આવતાં ભારે દોડધામ મચી ગઈ છે. આજ સવારથી જ કોર્પોરેશનનું વેબ પેજ ખુલતાંની સાથે જ તુર્કી ભાષામાં લખેલા સંદેશાઓ જોવા મળ્યા હતા. જેને લઈ ગાંધીનગર કોર્પોરેશનની આઈટી વિભાગની ટીમ આ પેજને રીલોડ કરવા માટે મથી રહી છે. હેક કરીને હેકરો દ્વારા તુર્કી ભાષામાં લખાયું છે કે જુલ્મ સે અબ તક છુટ ચુકે લોગો કા ભવિષ્ય ભયાનક હોગા, તુર્કી કે મિત્ર બનો, શત્રુ મત બનો. એટલું જ નહીં જે હેકર્સ ટીમ દ્વારા આ વેબસાઈટને હેક કરવામાં આવી છે તેણે તેની વિગતો પણ આ પેજ ઉપર મુકી છે. તુર્કીની રક્ષા માટે આ ટીમ કામ કરતી હોવાનું પણ તેમાં લખવામાં આવ્યું છે. હાલ તો હેક થયેલી આ વેબસાઈટ હજુ સુધી રીલોડ થઈ શકી નથી અને કોર્પોરેશન દ્વારા આ મામલે વિધિવત રીતે સાયબર ક્રાઈમમાં ગુનો દાખલ કરવા માટે ઓનલાઈન અરજી પણ કરી દેવામાં આવી છે. ગાંધીનગર કોર્પોરેશન હાલ મોટાભાગના વ્યવહારો ડીઝીટલ થઈ ગયા છે ત્યારે આ પ્રકારની હેકીંગની ઘટના ખુબજ ચિંતાજનક છે કેમકે કોર્પોરેશનના આર્થિક વ્યવહારો પણ હવે નેટ બેંકીગ મારફતે વધ્યા છે ત્યારે આ પ્રકારની ઘટના ભવિષ્યમાં મોટી સમસ્યા ઉભી કરી શકે તેમ છે. જેથી કોર્પોરેશને આઈટી વિભાગને વધુ મજબુત બનાવવું પડશે.