લેખા વોશિંગ્ટન-ઈમરાન ખાનઃ બે ભગ્ન દિલોનું મિલન

'અમારા બંનેના કુટુંબીજનો અમારી પડખે છે. મારા અને ઈમરાનના સંબંધો પરિપકવતા અને સમજદારીના સેતુ પર રચાયા છે. સાચું કહું, અમારા પ્રેમ સંબંધનો પ્રાથમિક તબક્કો પરીકથા જેવો જરાય નહોતો.'
'જાને તુ.. યા જાને ના' પર મુજે તુમ સે પ્યાર હૈ. આ વાત અભિનેત્રી લેખા વોશિંગ્ટન અને અભિનેતા ઈમરાન ખાનને સુપેરે લાગૂ પડે છે. એક મોટા મિત્રવર્તુળના ભાગ સમાન આ બે કલાકારોએ છેક ૨૦૦૯ની સાલમાં 'જાને તુ… યા જાને ના'માં એકસાથે કામ કર્યું હતું. લગભગ એક દશક સુધી દક્ષિણ ભારતીય ફિલ્મોમાં કામ કરનાર અભિનેત્રી લેખા વોશિંગ્ટન ઈમરાન સાથે આ ફિલ્મ કરી ત્યારે તેને કદાચ એ વાતની કલ્પના નહીં હોય કે તે એક દિવસ તેના આ સહકલાકારના પ્રેમમાં પડશે. શક્ય છે કે મનના કોઈક ખૂણે બંનેના મનમાં પ્રેમના બીજ રોપાઈ ગયા હશે. અને અજાણ્યે રોપાયેલા આ બી કોરોના કાળ દરમિયાન અંકુરિત થયાં. અને છેલ્લા કેટલાક સમયથી ફિલ્મોદ્યોગમાં તેમના પ્રેમ સંબંધની ચર્ચા થઈ રહી છે.
લાંબા સમય સુધી ઈમરાન સાથેના સંબંધો બાબતે ચૂપકીદી સેવનાર લેખા હવે દિલ ખોલીને તેના વિશે વાત કરે છે. અદાકારા કહે છે કે આપણે જે સમાજમાં રહીએ છીએ ત્યાં વસતા અન્ય લોકો પોતાના વિચારો આપણા માથે મઢવાના પ્રયાસો કરે છે. આપણા માટે પીઠ પાછળ વાતો કરે છે. અને પ્રારંભિક તબક્કે આપણે તેમના દબાણમાં આવી પણ જઈએ છીએ. જોકે ધીમે ધીમે આપણને સમજાય છે કે ગામના મોઢે ગરણું નહીં બંધાય. લોકો આપણા વિશે શું વિચારે છે તેની ચિંતા કરવા પાછળ સમય વેડફવાને બદલે આપણને પોતાને શું જોઈએ છે, આપણે સ્વયં શું કરવા માગીએ છીએ એ વાત પર ધ્યાન કેન્દ્રિત કરવું જોઈએ. મેં પણ એ જ કર્યું.
લેખા વધુમાં કહે છે કે મેં એક દાયકા સુધી દક્ષિણ ભારતીય ફિલ્મોમાં કામ કર્યું. દરમિયાન ટાંટિયા ખેંચ પ્રવૃત્તિનો ભોગ બની. છેવટે મને એમ લાગ્યું કે મારે એવું કામ કરવું જોઈએ જેના પર સંપૂર્ણપણે મારો કાબૂ હોય અને હું આર્ટ ઇન્સ્ટોલેશન, સ્કલ્પચર અને ડિઝાઈનિંગના કામ તરફ વળી. લાંબા સમય સુધી કળા ક્ષેત્રે કાર્યરત રહેવાને પગલે મને એમ લાગવા માંડયુ હતું કે શું હું અભિનય કરી શકું છું? જોકે હવે હું આ ભ્રમણામાંથી બહાર આવી ગઈ છું. ખરેખર તો મેં મારી સઘળી ગ્રંથિઓ ખંખેરી નાખી છે. મને ગળા સુધી ખાતરી છે કે હું ફરીથી અભિનય ક્ષેત્રે ઝંપલાવવા સક્ષમ છું. મૂળભૂત રીતે હું એક અભિનેત્રી છું તેથી અભિનય પ્રત્યેનું આકર્ષણ ખાળી શું તેમ નથી. હા, હું હવે માત્ર એવા લોકો સાથે કામ કરવાનું પસંદ કરીશ જેઓ મને સમજે છે. લેખા વધુમાં કહે છે કે હવે હું ઈમરાન સાથેના પ્રેમ સંબંધ વિશે પણ નિઃસંકોચપણે વાત કરી શકું છું. મને એ સમજાઈ ગયું છે કે લોકો તમારા વિશે ધારણાઓ બાંધતા રહેશે. પણ કોઈની ધારણાને ઝાઝું મહત્વ ન આપવું જોઈએ. જે લોકો તમને પિછાણતા નથી તેઓ તમારા વિશે શું ધારે છે, શું વિચારે છે તેનાથી તમને શા માટે ફરક પડવો જોઈએ?
લેખા પોતાનો ઉગતી જુવાનીનો સમય સંભારતા કહે છે કે હું માત્ર ૧૮ વર્ષની હતી ત્યારે પણ મને 'આઈટમ ગર્લ', 'હોમબ્રેકર' કહેવામાં આવતી. તે વખતે હું ચેન્નઈમાં રહેતી હતી. તે વખતે મને આવી વાતોથી થોડોઘણો પણ ફરક પડતો હતો. પણ હવે બિલકુલ નથી પડતો. તેમાંય જ્યારે કોઈ એક વ્યક્તિ તમારી અત્યંત નિકટ છે અને તમારી પડખે અડીખમ બનીને ઊભી છે ત્યારે અન્યોની વાતો પર ધ્યાન આપવાના સ્થાને પોતાના નિકટના સાથી વિશે જ વિચારવું જોઈએ. તમારા માટે એ વ્યક્તિ જ સર્વોપરી હોવી જોઈએ. ખરું કહું તો હું ઈમરાન સાથે બહુ ખુશ છું. અમારા બંનેના કુટુંબીજનો પણ અમારી પડખે છે. લેખા વધુમાં કહે છે કે મારા અને ઈમરાનના સંબંધો પરિપકવતા અને સમજદારીના સેતૂ પર રચાયા છે. વાસ્તવમાં અમારા પ્રેમ સંબંધનો પ્રાથમિક તબક્કો પણ પરીકથા જેવો નહોતો. અમે બંને ભગ્નહૃદય વ્યક્તિ હતાં. પણ અમે બંનેએ એકબીજાની મલમપટ્ટી કરી છે. કદાચ એટલે જ ઈમરાનની પ્રથમ પત્નીની પુત્રી 'ઈમાન' અમારી સાથે છે.