અમદાવાદના 13 સ્વાતંત્ર્ય સેનાનીઓ કે જેમણે અંગ્રેજોને દિવસે તારા દેખાડયા

અમદાવાદ,તા.12 ઓગષ્ટ 2021, ગુરૂવાર

અમદાવાદમાં ૧૩ સ્વાતંત્ર્ય સેનાનીઓ છે કે જેમણે દેશની આઝાદીની લડતમાં આખું જીવન ખપાવી દીધું હોય. રાજ્ય અને કેન્દ્ર સરકાર દ્વારા તેઓનું સન્માન કરીને સ્વાતંત્ર્ય સેનાનીનું પેન્શન આપવામાં આવી રહ્યું છે. અમદાવાદમાં હાલમાં ફક્ત ૮ સ્વાતંત્ર્ય સેનાનીઓ જીવિત છે. બાકીના પાંચ સ્વાતંત્ર્ય સેનાનીઓ દેવલોક પામ્યા છે.જેમાંથી ચારને કેન્દ્ર સરકારનું અને બાકીનાઓને રાજ્ય સરકારનું પેન્શન આપવામાં આવી રહ્યું છે. આ ૧૩ સ્વાતંત્ર્ય સેનાનીઓએ તેમનું આખુ જીવન દેશને આઝાદી અપાવવાની લડતમાં હોમી દીધું, અંગ્રેજો સામેની કોઇપણ લડતમાં તેઓ પહેલી હરોળમાં ઉભા રહ્યા અને દરેક લડતમાં અંગ્રેજોને દિવસે તારા બતાવ્યા. અંગ્રેજોના ભારે અત્યાચારો વચ્ચે પણ હિંમત ન હારનાર આવા સેનાનીઓ પર દેશને ગર્વ છે.

અંગ્રેજોને દેશમાંથી ભગાડવા, દેશને ગુલામીમાંથી મુક્તિ અપાવવી અને દેશબાંધવોને તેમના સ્વતંત્ર્ય દેશમાં જીવવાનો હક અપાવવો આ એકમાત્ર ધ્યેય સાથે આ લડવૈયાઓ મેદાનમાં કુદી પડયા હતા. અંગ્રેજોની લાકડીઓ ખાધી, ઉપવાસ કર્યા, જેલવાસ ભોગવ્યો, ઘરસંસારની ચિંતા છોડી દેશ માટે લડયા તેવા આ દેશના ઘડવૈયા, લડવૈયાઓને દેશ તેના સ્વાતંત્ર્યના ૭૪ વર્ષે યાદ કરી રહ્યો છે.

આગામી તા.૧૫ ઓગષ્ટે દેશ આઝાદ થયાને ૭૪ વર્ષ થશે. આ નિમિતે આ સ્વાતંત્ર્ય સેનાનીઓનું બહુમાન કરવામાં આવી રહ્યું છે. રાજ્ય સરકાર દ્વારા આઝાદીના આ લડવૈયાઓના ઘરેઘરે જઇને શાલ ઓઢાળીને તેમનું સન્માન કરાઇ રહ્યું છે અને ધ્વજવંદન સહિતના કાર્યક્રમમાં હાજરી આપવા વિનંતી કરાઇ રહી છે પરંતુ મોટી ઉંમર અને નાદુરસ્ત તબિયતને લઇને આ સ્વાતંત્ર્ય સેનાનીઓ હાજરી આપી શકે નથી.

દેશના ઘડતરમાં જેમનો પાયો રહેલો છે તેવા નામી-અનામી સ્વાતંત્ર્ય સેનાનીઓ દેશના સાચા હીરો છે. તેમના બલિદાન, લડતો, ખુમારી, દેશદાજ, રાષ્ટ્રપ્રેમ તમામ નાગરીકો માટે પ્રેરણાદાયી છે.

અમદાવાદ જિલ્લા કક્ષાનો તા.૧૫ ઓગષ્ટનો  ધ્વજવંદન કાર્યક્રમ દસક્રોઇ તાલુકાના કુબડથલ ગામે યોજાનાર છે. આ દિવસે સાંજે પાંચ વાગ્યે  ગાંધીનગરમાં રાજભવન ખાતે ગુજરાતના રાજ્યપાલ દ્વારા સ્નેહ મિલન  સમારંભ રખાયો છે જેમાં સ્વાતંત્ર્ય સેનાનીઓને આમંત્રણ આપવામાં આવ્યું છે.

અમદાવાદના સ્વાતંત્ર્ય સેનાનીઓની યાદી