- પીપલગ વિસ્તારમાં પાલિકા તંત્રની કાર્યવાહી
- ફાયર સેફ્ટીના અભાવે કર્મવીર હાઈટ્સ કોમ્પલેક્સમાં ગટર, પાણીના જોડાણ કપાયા
નડિયાદ નગરપાલિકાની ટેક્સ અને ફાયર વિભાગે આજે શહેરમાં ધડબટાડી બોલાવી છે. ટેક્સ વિભાગની રીકવરી માટે આજે નીકળેલી ટીમોએ શહેરના વિવિધ એકમોમાં બાકી ટેક્સ ભરપાઈ કરવા નોટીસો બજાવી હતી. આ વચ્ચે એકાઉન્ટન્ટે પીપલગ ચોકડી પાસે નડિયાદ પાલિકાની હદમાં આવતા બેસ્ટ મસાલાના એકમમાં તેનો બાકી પડતો ૭,૪૭,૪૬૮ રૂપિયાનો ટેક્સ ભરપાઈ કરવા માટે સમજણ કરી હતી. પરંતુ એકમ માલિક દ્વારા ટેક્સ ભરવામાં આનાકાની કરતા અંતે અહીંયા પહોંચેલી પાલિકાની ટીમે એકમ સીલ કરી દીધું હતું. આ સાથે જ ટેક્સ ઉઘરાતી ટીમો દ્વારા કડકાઈથી કામ લેતા અત્યાર સુધી પાલિકામાં ૭૦ લાખનો ટેક્સ જમા થયો છે. બીજીતરફ આજે નડિયાદ નગરપાલિકાના ફાયર વિભાગની ટીમ દ્વારા ગત રોજ મિશન રોડ પર સપાટો બોલાવ્યા બાદ આજે પીપલગ રોડ પર કાર્યવાહી કરી હતી. પીપલગ રોડ પર આવેલા કર્મવીર હાઈટ્સ નામના કોમ્પલેક્ષમાં ફાયર સેફ્ટીનો અભાવ હોવાથી અગાઉ નોટીસો ફટકાર્યા બાદ હજુ સુધી કોમ્પલેક્ષના માલિકો દ્વારા ફાયર સુવિધા ઉભી કરાઈ નહોતી. જેના પગલે ત્યાં પહોંચેલી ફાયરની ટીમે આજે કોમ્પલેક્ષમાં લાઈટ અને ગટરના કનેક્શનો કાપી નાખ્યા હતા. જેના પગલે કોમ્પલેક્ષના કોમસયલ એકમો ચલાવતા વેપારીઓને ભારે હાલાકી વેઠવાનો વખત આવ્યો હતો.
નગરપાલિકાની આ કાર્યવાહીના પગલે શહેરમાં ચોમેર લોકોમાં ફફડાટ વ્યાપ્યો છે.
