કપડવંજમાં ખાનગી ટયૂશન ક્લાસ ચલાવતા 2 શિક્ષકોને સસ્પેન્ડ કરાયા

- સોસાયટીના મકાનમાં ટયૂશન ક્લાસીસ ચલાવતા હતા

- શિક્ષણાધિકારી દ્વારા સખત પગલા ભરાતા ટયૂશનિયા શિક્ષકોમાં ભારે ફફડાટ

ખેડા જિલ્લાના કપડવંજ શહેરમાં આવેલી ગંગાનગર સોસાયટીના એક મકાનમાં પ્રાથમિક શિક્ષકો દ્વારા ખાનગી ટયુશન ક્લાસીસ ચલાવવામાં આવી રહ્યા હોવાની માહિતી મળ્યા બાદ શિક્ષણ અધિકારી દ્વારા બંને શિક્ષકો સામે પગલાં ભરવામાં આવ્યા છે. ટયુશન ક્લાસમાં આશરે ૧૫૦ જેટલા વિદ્યાર્થીઓને એ.સી. ક્લાસમાં બેસાડી શિક્ષા આપતા કપડવંજ તાલુકાની વડાલી પ્રાથમિક શાળાના શિક્ષક બીપીન પ્રજાપતિ અને મીરાપુર પ્રાથમિક શાળાના શિક્ષક દીપક પટેલને શિક્ષણ અધિકારી દ્વારા તાત્કાલિક અસરથી ફરજ મોકૂફ કરવામાં આવ્યા છે. એક તરફ સરકારનો પગાર લેતા હોવા છતાં પણ સરકારી શિક્ષકો દ્વારા શાળામાં યોગ્ય શિક્ષણ આપવામાં આવતું નથી અને બીજી તરફ ટયુશન ક્લાસનો ધિકતો ધંધો ચલાવવામાં આવે છે. ખેડા જિલ્લામાં સરકારી શાળાઓમાં આવા શિક્ષકોને કારણે જ શિક્ષણનું સ્તર નીચું જઈ રહ્યું છે. સરકારનો પગાર લઈને શાળામાં ગંભીરતાપૂર્વક પોતાની ફરજ નિભાવવાની જગ્યાએ આ શિક્ષકો ખાનગી ટયુશન ચલાવીને ખિસ્સા ભરતા જોવા મળે છે. જોકે શિક્ષણ અધિકારીના નિર્ણય બાદ હવે ટયુશન ક્લાસ ચલાવતા અન્ય શિક્ષકોમાં પણ ફફડાટ જોવા મળી રહ્યો છે.  આ બાબતે તાલુકા શિક્ષણ અધિકારી લીલાવતીબેન સુવેરાએ જણાવ્યું હતું કે, સંપૂર્ણ બાબતથી તેઓ અજાણ છે, પરંતુ આ બાબતની ચોક્કસથી તપાસ કરવામાં આવશે અને જો હકીકત સાચી હશે તો કાયદાની દ્રષ્ટિએ કડક પગલાં આ શિક્ષકો સામે લેવામાં આવશે. આ બાબતે જિલ્લા પ્રાથમિક શિક્ષણાધિકારી દ્વારા બંને શિક્ષકોને સસ્પેન્ડ કરાયા હોવાની વાતને પુષ્ટિ આપવામાં આવી હતી.