- જામનગર-રાજકોટ ધોરી માર્ગ ધ્રોળ નજીક ટ્રક અને સ્કૂટર વચ્ચેના અકસ્માતમાં એક યુવતીનો ભોગ: સ્કુટર ચાલક યુવતી ઘાયલ
જામનગર,તા.24 માર્ચ 2022,ગુરૂવાર
જામનગર જિલ્લામાં છેલ્લા ત્રણ દિવસથી વાહન અકસ્માતની પરંપરા અવિરત ચાલુ રહી છે, અને ગઇકાલે પણ વધુ એક વાહન અકસ્માત સર્જાયો છે, અને રાજકોટની એક યુવતીનો ભોગ લેવાયો છે. જ્યારે અન્ય એક યુવતી ગંભીર સ્વરૂપે ઘાયલ થઈ છે. સમગ્ર મામલે ધ્રોળ પોલીસ તપાસ ચલાવે છે.
આ અકસ્માતના બનાવની વિગત એવી છે કે રાજકોટમાં રહેતી અને એક ખાનગી હેલ્થ કેર કંપનીમાં નોકરી કરતી ખુશાલીબેન રમેશભાઈ સખિયા (ઉ.વ.19) અને તેની સાથે જ નોકરી કરતી નમ્રતાબેન હેમતભાઈ ચોટલિયા કે જે પણ રાજકોટ રહે છે, અને બંને જામનગરમાં હેલ્થ કેર કંપની ના કામ માટે સ્કૂટર પર બેસીને જામનગર આવી હતી.
જેઓ જામનગર ની મીટિંગમાં હાજરી આપીને પોતાના એક્ટીવા સ્કુટર પર રાજકોટ પરત જઈ રહી હતી, જે દરમિયાન જામનગર-રાજકોટ ધોરીમાર્ગ પર ગઈકાલે આજે સાડા સાતેક વાગ્યાના અરસામાં વાંકિયા ગામ પાસે પહોંચતાં પાછળથી પુરપાટ વેગે આવી રહેલા એમ.એચ.46 એફ.4264 નંબરના ટ્રકચાલકે એક્ટીવા સ્કુટરને ઠોકરે ચડાવી દેતાં ગમખ્વાર અકસ્માત સર્જાયો હતો.
આ અકસ્માતમાં સ્કૂટર ફંગોળાઇ ગયું હતું, અને પાછળ બેઠેલી નમ્રતાબેન ચોટલિયાને માથાના ભાગે ગંભીર પ્રકારની ઈજા થઈ હોવાથી તેણીનું ઘટનાસ્થળે કરુણ મૃત્યુ નીપજયું હતું. આ ઉપરાંત સ્કુટર ચાલક ખુશાલીબેન સખિયાને પણ નાની-મોટી ઈજા થઈ હોવાથી તેણીને સારવાર માટે હોસ્પિટલમાં દાખલ કરવામાં આવી છે. આ અકસ્માતના બનાવ અંગે પોલીસને જાણ કરાતાં ધ્રોળ પોલીસ સ્ટેશનનો સ્ટાફ ઘટનાસ્થળે દોડી ગયો હતો, અને મૃતદેહનો કબ્જો સંભાળી પોસ્ટમોર્ટમ સહિતની કાર્યવાહી હાથ ધરી છે. જ્યારે ટ્રકના ચાલક સામે ગુનો નોંધી વધુ તપાસ આરંભી છે.
