દરેક મીટિંગ બાદ કેમ સાફ કરાય છે કિમ જોંગ ઉનની ખુરશી? ચીનનો વીડિયો વાઈરલ થયા બાદ સોશિયલ મીડિયામાં ચર્ચા

Kim Jong Un Security: ઉત્તર કોરિયાના તાનાશાહ કિમ જોંગ ઉન હાલમાં ચીનની મુલાકાતે છે. કિમ બેઇજિંગમાં યોજાનારી સૈન્ય પરેડમાં પણ સામેલ થયા હતા. પોતાની બેઇજિંગ યાત્રા દરમિયાન તેમણે રશિયાના રાષ્ટ્રપતિ વ્લાદિમીર પુતિન સાથે મુલાકાત કરી. આ મુલાકાત પછીનો એક વીડિયો સોશિયલ મીડિયા પર ખૂબ ઝડપથી વાઈરલ થઈ રહ્યો છે.

હકીકતમાં, પુતિન સાથે દ્વિપક્ષીય વાર્તા પછી કિમ ત્યાંથી નીકળતાની સાથે જ કોરિયન સુરક્ષાકર્મીઓ ત્યાં પહોંચ્યા અને કિમ દ્વારા સ્પર્શ કરાયેલી દરેક વસ્તુને સારી રીતે સાફ કરી. જેવો આ વીડિયો સોશિયલ મીડિયા પર આવ્યો, લોકો આશ્ચર્યચકિત થઈ ગયા.

શું છે આખો મામલો?

કિમ જોંગ ઉનની ચીન યાત્રા દરમિયાન, બુધવારે તેમણે રશિયાના રાષ્ટ્રપતિ વ્લાદિમીર પુતિન અને ચીનના રાષ્ટ્રપતિ શિ જિનપિંગ સાથે મુલાકાત કરી. આ બેઠક પછી એક વિચિત્ર ઘટના બની, જેનો વીડિયો સોશિયલ મીડિયા પર વાઈરલ થઈ રહ્યો છે. નિષ્ણાતોના મતે, કિમના સુરક્ષાકર્મીઓએ તરત જ તે સ્થળ પર પહોંચીને ખુરશી અને ટેબલ સહિત કિમ દ્વારા સ્પર્શ કરાયેલી દરેક વસ્તુને સાફ કરી, જેથી તેમના ડીએનએના કોઈ નિશાન ન રહી જાય. આ ઘટનાને લઈને સોશિયલ મીડિયા પર નવી ચર્ચા શરુ થઈ ગઈ છે.

એક-એક ખૂણાની થઈ સફાઈ

કર્મચારીઓએ ખુરશી-ટેબલ-ગ્લાસ સહિત ત્યાં હાજર દરેક વસ્તુને સાફ કરી. તેમણે તે તમામ વસ્તુઓને સાફ કરી જેને કિમ જોંગ ઉને સ્પર્શ કર્યો હોય એવી શંકા હતી. કર્મચારીઓએ ખુરશીના હાથા, પીઠ, સાઈડ ટેબલને સારી રીતે સાફ કર્યા. આ આખી ઘટનાનો એક વીડિયો રશિયન પત્રકાર એલેક્ઝાન્ડર યુનાશેવે શેર કર્યો છે. તેમણે આ વીડિયો સાથે લખ્યું કે વાતચીત પછી કિમ સાથે આવેલા કર્મચારીઓએ કિમની હાજરીના તમામ નિશાનને સાવચેતીપૂર્વક મિટાવી દીધા.

આ પણ વાંચો: ભારત-ચીનને ટેરિફથી ડરાવી ન શકાય, ધાક-ધમકીનો યુગ સમાપ્ત: પુતિનની US-યુરોપને શિખામણ

પોતાની પોસ્ટમાં તેમણે લખ્યું કે કર્મચારીઓ ગ્લાસ પણ પોતાની સાથે લઈ ગયા. ઉપરાંત, તેમણે ખુરશી, ગાદી અને ફર્નિચરના તે તમામ ભાગોને સાફ કર્યા, જેને કિમ જોંગ ઉને સ્પર્શ કર્યો હતો.