Vladimir Putin Birthday: રશિયન પ્રમુખ વ્લાદિમીર પુતિન આજે, 7 ઓક્ટોબર, 2025 ના રોજ 73મો જન્મદિવસ ઉજવી રહ્યા છે. દુનિયા તેમને એક રહસ્યમય અને શક્તિશાળી નેતા તરીકે ઓળખે છે, જેમણે રશિયાને વિશ્વના સૌથી શક્તિશાળી દેશોમાં સ્થાન અપાવ્યું છે. છેલ્લા કેટલાક વર્ષોથી પુતિન યુક્રેન સામે યુદ્ધના કારણે ઘણા દેશોની ટીકાઓનો સામનો કરી રહ્યા છે. જો કે, આ તેમના માટે કંઈ નવું નથી. તેમણે તેમના જીવનમાં આવા ઘણા ઉતાર-ચઢાવનો અનુભવ કર્યો છે.
પુતિનનું બાળપણ
પુતિન એક સામાન્ય પરિવારમાંથી આવે છે જે સોવિયેત યુનિયનના સૌથી ગરીબ વિસ્તારમાં ઉછેર્યા હતા, જ્યાં તેમના પિતા ફેક્ટરીમાં મશીનમેન તરીકે કામ કરતાં, જ્યારે તેમની માતાએ શેરીઓમાં સફાઈ કામ કરતાં હતાં. સામાન્ય પરિવારમાંથી આવતા પુતિન વિશ્વના સૌથી પ્રભાવશાળી નેતાઓમાંના એક કેવી રીતે બન્યા? તેની પાછળ એક રસપ્રદ કહાની છે.
તેમના પિતા સોવિયેતની સેનામાં સૈનિક હતાં
વ્લાદિમીર પુતિનનો જન્મ 7 ઓક્ટોબર, 1952 ના રોજ લેનિનગ્રાડમાં થયો હતો, જે બીજા વિશ્વયુદ્ધ દરમિયાન નાઝી જર્મનીના નાકાબંધીથી ગંભીર રીતે પ્રભાવિત શહેર હતું. પુતિનના પિતા વ્લાદિમીર સ્પિરિડોનોવિચ પુતિન યુદ્ધ પહેલાં સેનામાં ફરજ બજાવતાં હતા અને બાદમાં રિટાયર્ડ થયા બાદ ફેક્ટરીમાં કામ કરતા હતાં. તેમની માતા મારિયા ઇવાનોવના શેલોમોવા પણ ફેક્ટરીમાં કામ કરતાં હતાં, યુદ્ધ બાદ તેમની પરિસ્થિતિ કથળતાં તેમણે શેરીઓમાં સફાઈ કામ પણ કર્યું હતું. તેમના ત્રણ બાળકોમાંથી એક બાળક ડિપ્થેરિયાથી અને બીજાનું બાળપણમાં જ અન્ય ગંભીર બીમારીથી મૃત્યુ થયું હતું. પુતિન સૌથી નાના બાળક હતા. ખૂબ જ ગરીબીના કારણે તેમની માતા ઘણીવાર ભૂખ્યા સૂવા મજબૂર બન્યા હતાં.
પુતિનને બાળપણમાં ઉંદરોની આસપાસ ઉછેર્યા
પુતિનના પિતા એક ધાતુની ફેક્ટરીમાં ફોરમેન હતા. યુદ્ધ દરમિયાન તેમને ગંભીર ઇજા થઈ હતી. તેમને ગોળી વાગી હતી, જેમાંથી તેઓ ક્યારેય સંપૂર્ણ રીતે સ્વસ્થ થયા ન હતા. તેમની માતા, મારિયા, વિવિધ પ્રકારની નાની-મોટી નોકરીઓ કરતી હતી, ક્યારેક શેરીઓ સાફ કરતી હતી અને ક્યારેક ફેક્ટરીઓમાં મજૂર તરીકે કામ કરતી હતી. ઘરમાં વીજળી અને પાણી જેવી મૂળભૂત સુવિધાઓનો પણ અભાવ હતો, અને પરિવાર ત્રણ અન્ય પરિવારો સાથે એક નાના એપાર્ટમેન્ટમાં રહેતો હતો. ત્યાં ગરમ પાણી નહોતું, શૌચાલય નહોતું, અને ઉંદરોનો સતત ઉપદ્રવ હતા. પુતિને પોતે પોતાના પુસ્તક "ફર્સ્ટ પર્સન" માં લખ્યું છે કે બાળપણમાં હું અને મારા મિત્રો લાકડીઓ વડે ઉંદરોનો પીછો કરતા. તેની આસપાસ જ બાળપણ પસાર કર્યું હતું.
જૂડોએ તેમને શિસ્ત શીખવી
બાળપણમાં પુતિનને ઘણીવાર અન્ય બાળકો ઠપકો આપતાં, લડતાં-મારતાં પણ તેઓ પીછેહઠ કર્યા વિના તેમની સામે લડતા હતા. આ લડાઈએ તેમને નબળા ન બનવા, પોતાની લડાઈ જાતે લડવાનું અને જીતવાનું શીખવ્યું. શાળામાં એક એવરેજ વિદ્યાર્થી તરીકે પુતિન જુડો ક્લાસમાં જોડાયા, અને તેનાથી તેમના જીવનમાં એક નવો વળાંક આવ્યો, જુડોએ તેમને શિસ્ત શીખવી. 1970ના દાયકામાં, લેનિનગ્રાડ સ્ટેટ યુનિવર્સિટીમાં કાયદાનો અભ્યાસ કરતી વખતે, તેઓ જાસૂસી ફિલ્મો પ્રત્યે આકર્ષાયા. "ધ શીલ્ડ એન્ડ ધ સ્વોર્ડ" જેવી સોવિયેત ફિલ્મો જોઈને, તેઓ સોવિયેત ગુપ્તચર એજન્સી, કેજીબીમાં જોડાવાનું સ્વપ્ન જોવા લાગ્યા.
બર્લિન વોલના પતનથી તેમને એક મહાન પાઠ શીખવવામાં આવ્યો
સ્નાતક થયા પછી, તેઓ 1975 માં કેજીબીમાં જોડાયા, જ્યાં તેમણે તેમની જાસૂસી તાલીમ શરૂ કરી. 1985 થી 1990 સુધી તેઓ પૂર્વ જર્મનીના ડ્રેસ્ડનમાં તૈનાત હતા, જ્યાં તેમણે નાટોના રહસ્યો કાઢવાનો પ્રયાસ કર્યો. જોકે, બર્લિન વોલના પતનથી તેમને જાસૂસીના બધા કામ બંધ કરવા પડ્યા, અને KGB દસ્તાવેજો બચાવવા માટે, તેમણે તેને આગ લગાવી દીધી. આ અનુભવે તેમને અરાજકતામાં મજબૂત કેન્દ્રીય સત્તાનું મહત્વ શીખવ્યું.
પુતિનનો ઝડપી રાજકીય ઉદય
સોવિયેત યુનિયનના વિસર્જન પછી, પુતિન 1991માં KGB છોડીને લેનિનગ્રાડ પાછા ફર્યા. અહીં, નસીબે તેમને સાથ આપ્યો. તેઓ તેમના ભૂતપૂર્વ પ્રોફેસર એનાટોલી સોબચાકના સહાયક બન્યા, જે શહેરના નવા મેયર તરીકે ચૂંટાયા હતા. સોબચાકે પુતિનને વિદેશી રોકાણો અને નાણાકીય વ્યવસ્થાપન સોંપ્યું. પુતિનની મહેનત રંગ લાવી. તેઓ 1994 સુધીમાં ડેપ્યુટી મેયર બન્યા. આ રશિયા માટે તોફાની સમય હતો. અર્થતંત્ર તૂટી રહ્યું હતું, ગુના વધી રહ્યા હતા અને ભૂતપૂર્વ સોવિયેત રાજ્યોમાં અસ્થિરતા ફેલાઈ રહી હતી. પરંતુ પુતિને શાંતિથી પોતાનું નેટવર્ક બનાવવાનું ચાલુ રાખ્યું.
FSB માં કડક કાર્યવાહી દ્વારા નવી ઓળખ બનાવી
જ્યારે 1996માં સોબચાક ચૂંટણી હારી ગયા, ત્યારે પુતિન મોસ્કો ગયા. ત્યાં, તેઓ પ્રમુખ બોરિસ યેલત્સિનના વહીવટમાં જોડાયા. તેઓ શાંતિથી યેલત્સિનની ટીમમાં આગળ વધ્યા, પહેલા ક્રેમલિનના ડેપ્યુટી ચીફ ઓફ સ્ટાફ બન્યા, પછી, 1998માં ફેડરલ સિક્યુરિટી સર્વિસના ડિરેક્ટર બન્યા. FSBમાં તેમણે ભ્રષ્ટાચાર સામે કડક કાર્યવાહી કરી, જેની યેલત્સિને પ્રશંસા કરી. 1999માં જ્યારે યેલત્સિને તેમને વડાપ્રધાન તરીકે નિયુક્ત કર્યા ત્યારે પુતિનનું રાજકીય નસીબ ચમક્યું. તે જ વર્ષે ચેચન્યામાં અલગતાવાદી હુમલાઓએ રશિયાને હચમચાવી નાખ્યું હતું.
ચેચન્યાના યુદ્ધથી તેમનો પ્રભાવ વધ્યો
પુતિને મક્કમતા સાથે ચેચન્યા સામેના યુદ્ધનો જવાબ આપ્યો. તેમણે સૈનિકો મોકલ્યા અને ચેચન્યા પર કબજો કર્યો. જેનાથી તેમનો પ્રભાવ વધ્યો. જનતાએ તેમનામાં એક મજબૂત નેતા જોયો જે 1990ના દાયકાથી ચાલી રહેલી અરાજકતાનો અંત લાવી શકે. 31 ડિસેમ્બર, 1999ના રોજ, યેલત્સિને રાજીનામું આપ્યું, અને પુતિન કાર્યકારી પ્રમુખ બન્યા. તેમણે માર્ચ 2000ની ચૂંટણીમાં 53 ટકા મત સાથે જીત મેળવી હતી. 2004માં તેઓ ફરીથી ચૂંટાયા, પછી 2008માં બંધારણે તેમને પ્રમુખ પદ છોડવાની ફરજ પાડી, ત્યારે તેઓ વડાપ્રધાન બન્યા. 2012માં તેઓ ફરીથી પ્રમુખ બન્યા, અને હવે, 2024માં બંધારણીય પરિવર્તન સાથે તેઓ 2036 સુધી સત્તામાં રહેશે.
