'ટ્રમ્પના કામ તો નોબેલ કરતા પણ ચઢિયાતા...' અચાનક કેમ પુતિને ટ્રમ્પના કર્યા આટલા વખાણ?

Donald trump and Putin : રશિયાના પ્રમુખ વ્લાદિમીર પુતિને તાજેતરમાં અમેરિકન પ્રમુખ ડોનાલ્ડ ટ્રમ્પના કાર્યકાળની જોરદાર પ્રશંસા કરી છે. પુતિને કહ્યું કે ડોનાલ્ડ ટ્રમ્પના પ્રયાસો અને તેમના દ્વારા કરાયેલા કાર્યોને નોબેલ શાંતિ પુરસ્કારથી પણ ચડિયાતા ગણવા જોઈએ. પુતિનની આ ટિપ્પણી પર ટ્રમ્પે તેમના સોશિયલ મીડિયા પ્લેટફોર્મ 'ટ્રુથ સોશિયલ' પર તેમનો આભાર માન્યો હતો.

ગાઝા શાંતિ પ્રયાસોને ઐતિહાસિક ગણાવ્યા

પુતિને મીડિયા સાથેની વાતચીતમાં જણાવ્યું હતું કે, ભલે ટ્રમ્પને નોબેલ પુરસ્કાર ન મળ્યો હોય, પરંતુ તેમના દ્વારા કરવામાં આવેલા કાર્યોને અવગણી શકાય નહીં. તેમણે ખાસ કરીને ગાઝામાં શાંતિ સ્થાપિત કરવાના ટ્રમ્પના પ્રયાસોની પ્રશંસા કરી. પુતિને કહ્યું કે જો આ શાંતિ કાયમી રહેશે, તો તેને ઐતિહાસિક ઘટના માનવામાં આવશે.

પુતિન કેમ ટ્રમ્પના વખાણ કરી રહ્યા છે? 

રશિયન પ્રમુખે રશિયા-અમેરિકા સંબંધો સુધારવા માટે ટ્રમ્પના પ્રયાસોની પણ પ્રશંસા કરી, જોકે તેમણે સ્વીકાર્યું કે સંબંધો હજુ પણ તણાવપૂર્ણ છે. માનવામાં આવે છે કે પુતિન આવતા વર્ષે સમાપ્ત થઈ રહેલી પરમાણુ હથિયારો સંબંધિત સ્ટાર્ટ સંધિ (START Treaty) ને ચાલુ રાખવા માટે ટ્રમ્પને મનાવવા માટે તેમની પ્રશંસા કરી રહ્યા છે. પુતિનના આ પ્રસ્તાવ પર ટ્રમ્પ સકારાત્મક વલણ દર્શાવી ચૂક્યા છે. પુતિને કહ્યું કે ટ્રમ્પ સતત એવા જટિલ મુદ્દાઓ હલ કરવામાં વ્યસ્ત છે, જે વર્ષો અને દાયકાઓથી વણઉકેલાયેલા છે.

નોબેલ વિજેતા મચાડોએ પુરસ્કાર ટ્રમ્પને સમર્પિત કર્યો

બીજી બાજુ, નોબેલ શાંતિ પુરસ્કારથી સન્માનિત વેનેઝુએલાના વિપક્ષી નેતા મારિયા કોરિના મચાડોએ તેમનો પુરસ્કાર ટ્રમ્પને સમર્પિત કર્યો હતો. મચાડોએ ટ્રમ્પને ફોન કરીને આ વાત જણાવી હતી અને કહ્યું કે તેમને લાગે છે કે ટ્રમ્પ ખરેખર આ પુરસ્કારના હકદાર છે. તેમણે કહ્યું હતું કે અમેરિકા તેમના દેશમાં તાનાશાહી ખતમ કરવા અને લોકતંત્રને પ્રોત્સાહન આપવામાં તેમને સમર્થન આપી રહ્યું છે.