US Threatens Europe Over India Free Trade Deal : ભારત અને યુરોપિયન યુનિયન વચ્ચે ઐતિહાસિક ફ્રી ટ્રેડ એગ્રીમેન્ટ ( FTA )ની જાહેરાત થઈ ગઈ છે. આ ડીલ વિશ્વની અર્થવ્યવસ્થાની નજરે ખૂબ મહત્ત્વની છે. જોકે ભારત અને યુરોપની આ સફળતા જોઈને અમેરિકાની અકળામણ વધી છે. અમેરિકા હવે ખૂલીને યુરોપથી નારાજગી વ્યક્ત કરી રહ્યું છે.
ભારત સાથે ડીલ અંગે અમેરિકાનો યુરોપ પર કટાક્ષ
અમેરિકાના ટ્રેઝરી સેક્રેટરી સ્કોટ બેસેન્ટે ભારત અને યુરોપની ટ્રેડ ડીલ અંગે પ્રહાર કરતાં કહ્યું છે કે, યુરોપના દેશો તેમના વિરુદ્ધ થઈ રહેલા યુદ્ધને જ ફંડ આપી રહ્યા છે. ભારત રશિયાથી ઓઈલ ખરીદે છે તેથી અમે તેના પર 25 ટકા ટેરિફ લગાવ્યો છે. તેમ છતાં યુરોપના દેશો ભારત સાથે ટ્રેડ એગ્રીમેન્ટ કરી રહે છે.
ભારત અને યુરોપ વચ્ચે ‘મધર ઓફ ઑલ ડીલ્સ’
ભારત અને યુરોપે ગઈકાલે મુક્ત વેપાર સમજૂતી અંગે વાટાઘાટો સંપન્ન કરી હતી, જેની આજે સત્તાવાર જાહેરાત કરાઈ છે. આ ડીલથી બંને પક્ષે રોકાણ અને વેપારને પ્રોત્સાહન મળશે. જો કે, આ ડીલ તબક્કાવાર ડીલ લાગુ કરાશે.
યુરોપિયન આયોગના પ્રમુખ ઉર્સુલા વોન ડેર લેયેન અને યુરોપિયન પરિષદના પ્રમુખ એન્ટોનિયો કોસ્ટા હાલ ભારતના પ્રવાસે છે. આ બંને નેતા ગઇકાલે પ્રજાસત્તાક દિવસની પરેડમાં ચીફ ગેસ્ટ તરીકે જ ભારત આવી ગયા હતા. આ મુદ્દે બંને પક્ષે 26 જાન્યુઆરીએ જ ફ્રી ટ્રેડ ડીલ અંગે વાટાઘાટો શરૂ કરી હતી, જેને 27 જાન્યુઆરીએ આયોજિત 16માં શિખર સંમેલનમાં અંતિમ રૂપ અપાયું હતું. યુરોપ આ ડીલને 'મધર ઓફ ઑલ ડીલ્સ' કહે છે.
ભારત અને યુરોપ બંનેને ફાયદો
ભારતના આગ્રહ પર કૃષિ અને ડેરી પ્રોડક્ટ્સને આ ડીલમાં સામેલ કરવામાં આવ્યા નથી. આ સિવાય ભારત અને યુરોપ વચ્ચે ડિફેન્સ અંગે પણ મહત્ત્વની ડીલ થઈ શકે છે. જેમાં સાયબર સિક્યુરિટી, આતંકવાદ વિરુદ્ધ લડત, સમુદ્રી સુરક્ષા સામેલ છે.
આ સિવાય ભારત અને યુરોપ વચ્ચે મોબિલિટી એગ્રીમેન્ટની પણ આજે જાહેરાત કરાઇ શકે છે. જેમાં વિદ્યાર્થીઓ, રિસર્ચર્સ, વર્કર્સ સરળતાથી યુરોપના દેશોમાં જઈ શકશે. ભારત અને યુરોપ વચ્ચે સપ્લાય ચેઈન મજબૂત કરવા અંગે પણ સમજૂતી કરાશે જેથી ચીન અને અમેરિકા પરથી નિર્ભરતા ઘટાડી શકાય.
