અમેરિકાએ ચીન-ઈરાનના 40 ઓઇલ નિકાસકારો અને મોટી રિફાઈનરી સામે પ્રતિબંધ લાદ્યો

Donald Trump Action Against China : ટ્રમ્પ સરકારે ઈરાનની આર્થિક કરોડરજ્જુ તોડવા માટે એક અત્યંત મહત્ત્વનો નિર્ણય લીધો છે. અમેરિકાએ ચીન સ્થિત એક અગ્રણી ઓઇલ રિફાઈનરી અને ઈરાની ઓઇલના પરિવહન સાથે જોડાયેલી અંદાજે 40 જેટલી શિપિંગ કંપનીઓ અને ટેન્કરો પર આર્થિક પ્રતિબંધો લાદી દીધા છે. આ પગલું ઈરાનના મહેસૂલના મુખ્ય સ્ત્રોતને સંપૂર્ણપણે ખતમ કરવાના વ્યાપક અભિયાનનો એક ભાગ માનવામાં આવે છે.

ચીની રિફાઈનરી નિશાના પર

શુક્રવારે જાહેર કરાયેલા આ પ્રતિબંધોમાં ડાલિયાન બંદર ખાતે આવેલી ચીનની સૌથી મોટી સ્વતંત્ર રિફાઈનરીઓમાંની એક એવી હિંગલી પેટ્રોકેમિકલ (Hengli Petrochemical) નો સમાવેશ થાય છે. આ રિફાઈનરી પ્રતિદિન 4 લાખ બેરલ ક્રૂડ ઓઈલ પ્રોસેસ કરવાની ક્ષમતા ધરાવે છે. અમેરિકી નાણા વિભાગના જણાવ્યા અનુસાર, હિંગલી રિફાઈનરી 2023થી ઈરાન પાસેથી ઓઇલ મેળવી રહી છે, જેના દ્વારા ઈરાની સેનાને કરોડો ડોલરની આવક થાય છે.

વૈશ્વિક ઈંધણ બજારમાં ખળભળાટ

અમેરિકાના નાણા મંત્રી સ્કોટ બેસન્ટે સ્પષ્ટ કર્યું છે કે તેમની એજન્સી ઈરાન દ્વારા વૈશ્વિક બજારમાં ઓઇલ પહોંચાડવા માટે ઉપયોગમાં લેવાતા જહાજો, વચેટિયાઓ અને ખરીદદારોના નેટવર્કને તોડવાનું ચાલુ રાખશે. અગાઉ આ મહિનાની શરૂઆતમાં જ અમેરિકાએ ચીન, હોંગકોંગ, યુએઈ અને ઓમાનની નાણાકીય સંસ્થાઓને પત્ર લખીને ઈરાન સાથે વેપાર કરવા બદલ પ્રતિબંધોની ધમકી આપી હતી.

યુદ્ધ જેવી સ્થિતિ અને નાકાબંધી

નોંધનીય છે કે અમેરિકાએ આ મહિને હોર્મુઝ સ્ટ્રેટ જેવા મહત્વના જળમાર્ગ પર નાકાબંધી લાદી દીધી છે, જે વૈશ્વિક ઉર્જા પુરવઠા માટે જીવનરેખા સમાન છે. આ આર્થિક પ્રતિબંધો એવા સમયે આવ્યા છે જ્યારે થોડા સપ્તાહો બાદ જ રાષ્ટ્રપતિ ટ્રમ્પ અને ચીની રાષ્ટ્રપતિ શી જિનપિંગની મુલાકાત યોજાવાની છે.