Ecuador Military Operations Action : દક્ષિણ અમેરિકામાં વધી રહેલા ડ્રગ માફિયાઓ અને આતંકવાદી સંગઠનોના નેટવર્કને તોડી પાડવા માટે અમેરિકાએ ઇક્વાડોર સાથે મળીને એક મોટું સૈન્ય ઓપરેશન શરૂ કર્યું છે. પેન્ટાગને મંગળવારે રાત્રે સત્તાવાર જાહેરાત કરતા જણાવ્યું હતું કે, બંને દેશોની સેનાઓ 'નાર્કો-ટેરરિઝમ' (માદક દ્રવ્યોના આતંકવાદ) વિરુદ્ધ સંયુક્ત કાર્યવાહી કરી રહી છે. આ ઓપરેશન ટ્રમ્પ વહીવટીતંત્રની તે વ્યૂહરચનાનો ભાગ માનવામાં આવે છે, જેમાં કેરેબિયન સમુદ્ર અને પૂર્વી પેસિફિક ક્ષેત્રમાં શંકાસ્પદ નૌકાઓ પર હુમલા તેજ કરવામાં આવ્યા છે.
અમેરિકી સલાહકારોની ભૂમિકા
યુએસ મિલિટરીના સાઉથ કમાન્ડના જણાવ્યા અનુસાર, અમેરિકી સ્પેશિયલ ફોર્સિસના સૈનિકો સીધા દરોડામાં ભાગ લેવાને બદલે પડદા પાછળ રહીને મહત્વની ભૂમિકા ભજવી રહ્યા છે. તેઓ ઇક્વાડોરના કમાન્ડોને ઓપરેશનલ પ્લાનિંગ, ઇન્ટેલિજન્સ શેરિંગ અને લોજિસ્ટિક્સમાં મદદ કરી રહ્યા છે. ખાસ કરીને ડ્રગ્સના સંગ્રહ અને શિપમેન્ટ માટે વપરાતી ફેસિલિટીઝ પર દરોડા પાડવા માટે ઇક્વાડોરની સેનાને ટેકનિકલ સપોર્ટ પૂરો પાડવામાં આવી રહ્યો છે.
દરોડાનો વીડિયો વાયરલ
મિલિટરીના સાઉથ કમાન્ડ દ્વારા જાહેર કરવામાં આવેલા ૩૦ સેકન્ડના વીડિયોમાં એક હેલિકોપ્ટર દુર્ગમ વિસ્તારો પરથી ઉડાન ભરતું અને સૈનિકોને એરલિફ્ટ કરતું જોવા મળે છે. સૈન્ય અધિકારીઓના મતે, આ માત્ર શરૂઆત છે અને આગામી દિવસોમાં દેશભરમાં આ પ્રકારના અનેક દરોડા પાડવામાં આવશે. જોકે, મિશનની સફળતા કે ચોક્કસ લક્ષ્યાંકો અંગે હજુ સુધી કોઈ સત્તાવાર પુષ્ટિ કરવામાં આવી નથી.
ઇક્વાડોરની વ્યૂહાત્મક સ્થિતિ
નોંધનીય છે કે ઇક્વાડોર પોતે ડ્રગ્સનું ઉત્પાદન કરતું નથી, પરંતુ તે કોલંબિયા અને પેરુના ક્રિમિનલ ગ્રુપ્સ માટે વિશ્વના સૌથી મોટા 'ટ્રાફિકિંગ રૂટ' (હેરાફેરીના માર્ગ) તરીકે ઓળખાય છે. જનરલ ફ્રાન્સિસ એલ. ડોનોવને આ લડાઈમાં ઇક્વાડોરની સેનાના સાહસના વખાણ કર્યા હતા અને તેને આ ક્ષેત્રમાં અમેરિકાનો સૌથી મજબૂત સાથી ગણાવ્યો હતો.
અમેરિકાનો ઉદ્દેશ્ય સ્પષ્ટ છે કે તે લાઇન ઓફ કંટ્રોલથી હજારો માઇલ દૂર હોવા છતાં, લેટિન અમેરિકામાં સ્થિરતા અને સુરક્ષા જાળવી રાખવા માટે કોઈપણ હદે જઈ શકે છે. આ ઓપરેશન દ્વારા અમેરિકાએ વિશ્વને સંદેશ આપ્યો છે કે તે 'મલ્ટીપોલર વર્લ્ડ'માં પણ પોતાનું વર્ચસ્વ અને ભાગીદારોની સુરક્ષા માટે કટિબદ્ધ છે.
