VIDEO: ટ્રમ્પની સુરક્ષામાં ચૂક, વ્હાઈટ હાઉસમાં અજાણ્યો શખસ કાર લઇને ઘૂસી ગયો

Donald Trump News : અમેરિકામાં વ્હાઇટ હાઉસની સુરક્ષામાં ફરી એકવાર ચૂક સામે આવી છે. મંગળવારે રાત્રે લગભગ 10:37 વાગ્યે, એક વ્યક્તિએ પોતાની કારને જાણીજોઈને વ્હાઇટ હાઉસના બાહ્ય સુરક્ષા બેરિયર સાથે અથડાવી હતી. આ ઘટના સમયે ડોનાલ્ડ ટ્રમ્પ વ્હાઇટ હાઉસની અંદર જ હાજર હતા, જેના કારણે સુરક્ષા એજન્સીઓમાં હોબાળો મચી ગયો હતો.

યુએસ સિક્રેટ સર્વિસના જવાનોએ તરત જ કાર્યવાહી કરીને કારના ડ્રાઇવરને કસ્ટડીમાં લઈ લીધો હતો. ઘટના બાદ તરત જ, સિક્રેટ સર્વિસના યુનિફોર્મ ડિવિઝને કારની સંપૂર્ણ તપાસ કરી અને તેને સુરક્ષિત જાહેર કરી, જેથી કોઈ વિસ્ફોટક પદાર્થનો ખતરો ન હોવાની પુષ્ટિ થઈ. જોકે, સાવચેતીના ભાગરૂપે, વ્હાઇટ હાઉસના ગેટ તરફ જતા રસ્તાને વાહનવ્યવહાર માટે બંધ કરી દેવામાં આવ્યો છે.

સોશિયલ મીડિયા પર વીડિયો વાયરલ આ ઘટના બાદ સોશિયલ મીડિયા પર વ્હાઇટ હાઉસની બહારનો વીડિયો ઝડપથી વાયરલ થઈ ગયો, જેમાં સિક્રેટ સર્વિસના અધિકારીઓ ક્ષતિગ્રસ્ત કારની તપાસ કરતા, તેનું માપ લેતા અને તસવીરો લેતા જોવા મળ્યા હતા. હાલમાં ડ્રાઇવરની ઓળખ અને આ ઘટના પાછળના તેના ઈરાદા વિશે કોઈ માહિતી જાહેર કરવામાં આવી નથી. અધિકારીઓ ડ્રાઇવરની પૂછપરછ કરી રહ્યા છે, જેમાં તે કોઈ વિરોધ પ્રદર્શનનો ભાગ હતો કે માનસિક અસ્થિરતાનો શિકાર હતો તેવા તમામ પાસાઓની તપાસ કરવામાં આવી રહી છે.

વારંવાર બનતી આવી ઘટનાઓ આ પહેલીવાર નથી જ્યારે વ્હાઇટ હાઉસની સુરક્ષામાં આ પ્રકારની ઘટના બની હોય. ગયા વર્ષે જાન્યુઆરી 2024 અને મે 2024માં પણ કાર ટકરાવવાની બે અલગ-અલગ ઘટનાઓ બની હતી. આ વારંવાર બનતી ઘટનાઓએ વ્હાઇટ હાઉસની સુરક્ષા વ્યવસ્થા પર ફરી એકવાર ગંભીર સવાલો ઉભા કર્યા છે, ખાસ કરીને જ્યારે ઈસ્ટ વિંગમાં સમારકામનું કામ ચાલી રહ્યું છે. સિક્રેટ સર્વિસ આ તાજેતરની ઘટનાની ઊંડાણપૂર્વક તપાસ કરી રહી છે.