SCO સમિટની કઈ વાતથી ભડક્યું યુક્રેન? રશિયાને લઈને આપ્યું મોટું નિવેદન

SCO Summit 2025: યુક્રેનના વિદેશ મંત્રાલયે તિયાનજિનમાં યોજાયેલી શાંઘાઈ કોઓપરેશન ઓર્ગેનાઈઝેશન (SCO) ની બેઠકના પરિણામોને ધ્યાનમાં લેતા કહ્યું કે, આ સમિટના મુખ્ય દસ્તાવેજ, 20 પાનાના તિયાનજિન ઘોષણા પત્રમાં યુક્રેન પર રશિયાના યુદ્ધનો ઉલ્લેખ ન હોવો એ ખૂબ જ આશ્ચર્યજનક અને નકારાત્મક સંકેત છે.

યુક્રેને કહ્યું કે, આ યુરોપમાં થયેલી સૌથી મોટી આક્રમકતા છે, જેને બીજા વિશ્વયુદ્ધ પછી સૌથી ગંભીર માનવામાં આવે છે અને આવા મહત્વપૂર્ણ દસ્તાવેજમાં તેનો ઉલ્લેખ ન હોવો એ ખૂબ જ આશ્ચર્યજનક છે. જ્યારે ઘોષણા પત્રમાં અન્ય ઘણા યુદ્ધો, આતંકવાદી હુમલાઓ અને વિશ્વના ઘટનાક્રમનો ઉલ્લેખ છે, ત્યારે રશિયા-યુક્રેન યુદ્ધ પર મૌન સ્પષ્ટપણે એક મોટી ચૂક છે.

રશિયાની ચાલ નિષ્ફળ રહી

યુક્રેનનું કહેવું છે કે, રશિયાના આક્રમણનો ન્યાયી અંત ન આવે ત્યાં સુધી અમે વૈશ્વિક વિકાસ, આંતરરાષ્ટ્રીય શાંતિ-સુરક્ષા, સંયુક્ત રાષ્ટ્ર ચાર્ટરના સિદ્ધાંતોનું પાલન અને વિશ્વના વિવિધ પ્રદેશો વચ્ચે વેપાર સંબંધોના સ્થિર વિકાસની વાત ન કરી શકીએ. યુક્રેને એ વાત પર ભાર મૂક્યો કે, SCO સમિટના નિવેદનમાં રશિયા-યુક્રેન યુદ્ધનો ઉલ્લેખ ન હોવો એ રશિયાના રાજદ્વારી પ્રયાસોની નિષ્ફળતાનો સંકેત છે. રશિયા આ યુદ્ધ અંગે વિશ્વને બે ભાગમાં વહેંચવાનો અને એવી છાપ ઉભી કરવાનો પ્રયાસ કરી રહ્યું હતું કે, યુરોપ અને ઉત્તર અમેરિકાની બહારના દેશો રશિયાના આક્રમણ પ્રત્યે સકારાત્મક વલણ ધરાવે છે, પરંતુ આ વખતે રશિયાની આ ચાલ નિષ્ફળ રહી. 

આ પણ વાંચો: PM મોદી, પુતિન અને જિનપિંગની મુલાકાતથી અમેરિકા ભડક્યું, કહ્યું- ભારતે અમારી સાથે રહેવું જોઈએ

રશિયા કેમ નિષ્ફળ રહ્યું?

યુક્રેનનું માનવું છે કે, રશિયા પોતાના તમામ પ્રયાસો છતાં SCO સદસ્ય દેશોના અભિપ્રાયને એક એવી સ્થિતિમાં લાવવામાં નિષ્ફળ રહ્યું જે પોતાના પક્ષમાં હોય. યુક્રેને ફરીથી તમામ શાંતિપ્રિય દેશોને રશિયાના આક્રમણનું મૂલ્યાંકન કરતી વખતે આંતરરાષ્ટ્રીય કાયદાના નિયમો અને સંયુક્ત રાષ્ટ્ર ચાર્ટરના નિયમોનું પાલન કરવાની અપીલ કરી છે. યુક્રેને ચીનની મહત્વપૂર્ણ ભૂ-રાજકીય ભૂમિકાને ધ્યાનમાં રાખીને બેઈજિંગને યુક્રેનમાં શાંતિ સ્થાપિત કરવામાં વધુ સક્રિય ભૂમિકા ભજવવા વિનંતી કરી છે. આ શાંતિ ત્યારે જ શક્ય બનશે જ્યારે તમામ પક્ષો સંયુક્ત રાષ્ટ્ર ચાર્ટરના સિદ્ધાંતોનું સન્માન કરશે.