ગાઝા અંગે ટ્રમ્પના પીસ પ્લાનને વડાપ્રધાન મોદીનું ખુલ્લેઆમ સમર્થન, કહ્યું - ભારત શાંતિની પડખે

Donald Trump and PM Modi : ડોનાલ્ડ ટ્રમ્પની ગાઝામાં શાંતિ સ્થાપિત કરવાની યોજનાની જાહેરાત બાદ આ મામલે હવે મોટી પ્રગતિના સંકેતો જોવા મળી રહ્યા છે. વડા પ્રધાન નરેન્દ્ર મોદીએ ટ્રમ્પની પહેલની પ્રશંસા કરતા કહ્યું કે ઈઝરાયલી બંધકોની મુક્તિના સંકેતો એક મહત્વપૂર્ણ પગલું રજૂ કરે છે. 

પીએમ મોદીએ કરી પોસ્ટ 

પીએમ મોદીએ એક્સ પોસ્ટમાં લખ્યું, "અમે પ્રમુખ ટ્રમ્પના નેતૃત્વનું સ્વાગત કરીએ છીએ કારણ કે ગાઝામાં શાંતિ પ્રયાસો નિર્ણાયક પ્રગતિ તરફ આગળ વધી રહ્યા છે. બંધકોની મુક્તિના સંકેતો એક મોટું પગલું છે. ભારત કાયમી અને ન્યાયી શાંતિ માટેના તમામ પ્રયાસોને મજબૂત સમર્થન આપવાનું ચાલુ રાખશે." ઘણા અન્ય વૈશ્વિક નેતાઓ પણ ટ્રમ્પની પહેલની પ્રશંસા કરી રહ્યા છે.  

ઓસ્ટ્રેલિયાનું પણ સમર્થન

ઓસ્ટ્રેલિયાના વડા પ્રધાન એન્થની અલ્બાનીઝે પણ ટ્રમ્પની યોજનાને ટેકો આપ્યો. તેમણે કહ્યું, "ઓસ્ટ્રેલિયા ટ્રમ્પની યોજનામાં થયેલી પ્રગતિનું સ્વાગત કરે છે. હમાસે તાત્કાલિક તેના શસ્ત્રો નાખી દેવા જોઈએ અને બાકીના તમામ બંધકોને મુક્ત કરવા જોઈએ. ઓસ્ટ્રેલિયા યુદ્ધનો અંત લાવવા અને ન્યાયી અને કાયમી ઉકેલ મેળવવા માટે તેના ભાગીદારો સાથેના પ્રયાસોને સમર્થન આપવાનું ચાલુ રાખશે."