ભારત-ચીનને ટેરિફથી ડરાવી ન શકાય, ધાક-ધમકીનો યુગ સમાપ્ત: પુતિનની US-યુરોપને શિખામણ

Vladimir Putin: રશિયાના રાષ્ટ્રપતિ વ્લાદિમીર પુતિને અમેરિકન પ્રમુખ ડોનાલ્ડ ટ્રમ્પને સ્પષ્ટ શબ્દોમાં કહ્યું છે કે, તમે ભારત અને ચીન સાથે આ રીતે વાત ન કરી શકો. આંતરરાષ્ટ્રીય કૂટનીતિના નિયમો અને શિષ્ટાચાર શીખવતા પુતિને કહ્યું કે, 'ટ્રમ્પે ટેરિફ અને પ્રતિબંધો દ્વારા ભારત અને ચીન પર દબાણ લાવવાનો પ્રયાસ ન કરવો જોઈએ. તમે ભારત કે ચીન સાથે આ રીતે વાત ન કરી શકો.'

ભારત-ચીન પર દબાણ મુદ્દે પુતિનની ટ્રમ્પને ફટકાર

શાંઘાઈ કોઓપરેશન ઓર્ગેનાઈઝેશન (SCO) શિખર સંમેલન પછી, પુતિને મીડિયા સાથે વાતચીત કરી. તેમણે ટ્રમ્પ પ્રશાસન પર એશિયાની બે સૌથી મોટી શક્તિઓ, ભારત અને ચીનને નબળી પાડવા માટે આર્થિક દબાણનો ઉપયોગ કરવાનો આરોપ લગાવ્યો. પુતિને કહ્યું કે ભારત અને ચીન ભાગીદાર છે અને અમેરિકાની ટેરિફ સિસ્ટમ તેમનું નેતૃત્વ નબળું પાડવાનો એક પ્રયાસ છે. તેમણે ભારપૂર્વક કહ્યું કે ભારત અને ચીન જેવા મોટા દેશોની પોતાની સ્વતંત્ર રાજનીતિ છે.

...તો તેનું કરિયર ખતમ થઈ જશે

પુતિને જણાવ્યું કે, 'મોટા દેશોના નેતાઓ પર પ્રતિબંધો લગાવવાથી તેમનું રાજકીય કરિયર જોખમમાં મૂકાય છે, કારણ કે તેમના દેશોએ સંસ્થાનવાદ અને સાર્વભૌમત્વ માટે સંઘર્ષ કર્યો છે.' તેમણે વોશિંગ્ટનને યાદ અપાવ્યું કે સંસ્થાનવાદનો યુગ હવે પૂરો થયો છે અને ભાગીદારો સાથે આવી ભાષાનો ઉપયોગ ન કરવો જોઈએ. તેમણે આશા વ્યક્ત કરી કે પરિસ્થિતિ સુધરશે અને રાજકીય સંવાદ ફરી શરૂ થશે.

કોઈની દાદાગીરી નહીં ચાલે

આ જ પ્રેસ કોન્ફરન્સમાં પુતિને કહ્યું કે, 'આ બહુપક્ષીય દુનિયામાં કોઈની દાદાગીરી નહીં ચાલે, બધાના અધિકારો સમાન છે.' તેમણે ટ્રમ્પ તરફ ઇશારો કરતા કહ્યું કે, 'ભારત, ચીન અને રશિયા જેવી આર્થિક મહાશક્તિઓ હાજર છે. તેમ છતાં કોઈ એક દેશનું વૈશ્વિક રાજકારણ કે સુરક્ષા પર વર્ચસ્વ ન હોવું જોઈએ, બધા સમાન હોવા જોઈએ.'

આ પણ વાંચો: 'રશિયા પર કાર્યવાહી કરવા મેં ભારત પર ટેરિફ લગાવ્યા', પુતિન અંગે સવાલ પર ભડક્યા ટ્રમ્પ

પુતિનની આ ટિપ્પણી એવા સમયે આવી છે જ્યારે ભારતને રશિયન તેલ ખરીદવાને કારણે અમેરિકન પ્રતિબંધોનો સામનો કરવો પડી રહ્યો છે, જ્યારે ચીન હજુ પણ વોશિંગ્ટન સાથે ટ્રેડ વોરમાં ફસાયેલું છે.

રશિયન તેલ ખરીદવા માટે સેકન્ડરી પ્રતિબંધો લાદવામાં આવ્યા

ડોનાલ્ડ ટ્રમ્પે જણાવ્યું કે તેમના પ્રશાસને રશિયન તેલ ખરીદવા બદલ ભારત પર પ્રતિબંધો લગાવ્યા છે, જેનાથી રશિયાને અબજો ડોલરનું નુકસાન થયું છે. તેમણે ચેતવણી આપી કે ભવિષ્યમાં વધુ પ્રતિબંધો લાગુ થઈ શકે છે. ટ્રમ્પે ભારપૂર્વક કહ્યું કે તેમણે બે અઠવાડિયા પહેલા જ ભારતને આ વિશે સ્પષ્ટ ચેતવણી આપી હતી.