150 લોકોની હત્યા, 200 મહિલાઓનું અપહરણ... પાક સેના પર ગંભીર આક્ષેપ, POJKમાં મોટા આંદોલનની તૈયારી

POJK Mass Protest On Oct 24 JAAC: પાકિસ્તાનના કબજા હેઠળના જમ્મુ-કાશ્મીર (POJK) ના પૂંછ ડિવિઝનમાં જમ્મુ-કાશ્મીર જોઈન્ટ અવામી એક્શન કમિટી એટલે કે, JAAC દ્વારા 24 ઓક્ટોબરથી ફરી એકવાર મોટા પાયે આંદોલન કરવાની તૈયારીઓ હાથ ધરવામાં આવી છે. સુરક્ષા એજન્સીઓના જણાવ્યા અનુસાર, કોટલીને આ આંદોલનનું મુખ્ય કેન્દ્ર બનાવવામાં આવ્યું છે, જ્યાં એક વિશાળ જનસભાનું આયોજન કરવામાં આવ્યું છે. તે જ દિવસે રાવલાકોટ અને અબ્બાસપુરમાં ચાલી રહેલા ધરણાં કોટલીની મુખ્ય જનસભામાં જોડાઈ જશે, જ્યારે મુઝફ્ફરાબાદ અને મીરપુરમાં ચક્કાજામની તૈયારીઓ ચાલી રહી છે.

ઇન્ટરનેટ અને નાગરિક સુવિધાઓ પર પ્રતિબંધ

વિસ્તારમાં સંચાર સેવાઓની સ્થિતિ હજુ પણ સામાન્ય થઈ નથી. મુઝફ્ફરાબાદમાં અંદાજે 136 દિવસ પછી ઇન્ટરનેટ સેવા પુનઃસ્થાપિત કરવામાં આવી છે, પરંતુ પૂંછ અને કોટલીના કેટલાક વિસ્તારોમાં મોબાઈલ અને ઇન્ટરનેટ પર પ્રતિબંધો હજુ પણ યથાવત છે, જેના કારણે સ્થાનિક નાગરિકો, વિદ્યાર્થીઓ અને વેપારીઓની મુશ્કેલીઓમાં વધારો થયો છે.

આંદોલન હવે રાજકીય અધિકારો સુધી પહોંચ્યું

JAAC નું આ આંદોલન શરૂઆતમાં મોંઘા વીજળીના બિલ અને ઘઉંના લોટના ભાવ જેવા આર્થિક મુદ્દાઓથી શરૂ થયું હતું, પરંતુ હવે તેમાં નાગરિક અધિકારો, વહીવટી જવાબદેહી અને વિધાનસભામાં રાજકીય પ્રતિનિધિત્વ જેવા ગંભીર મુદ્દાઓ જોડાઈ ગયા છે. જુલાઈથી સપ્ટેમ્બર દરમિયાન ચાલેલા અગાઉના આંદોલન દરમિયાન પાકિસ્તાની સેનાએ અંદાજે 150 આંદોલનકારીઓની હત્યા કરી હતી અને સુરક્ષા એજન્સીઓના રિપોર્ટ મુજબ 200 થી વધુ મહિલાઓ અને યુવતીઓનું અપહરણ કરી લેવામાં આવ્યું હતું, જેમની હજુ સુધી કોઈ ભાળ મળી નથી.

જો 24 ઓક્ટોબરના રોજ થનારા આંદોલન પહેલા પાકિસ્તાની સુરક્ષા અધિકારીઓ અને સ્થાનિક કઠપૂતળી સરકાર JAAC નેતૃત્વ સાથે કોઈ નક્કર સમજૂતી નહીં કરે, તો ક્ષેત્રમાં સ્થિતિ અત્યંત ગંભીર અને બેકાબૂ બની શકે છે.