નવી દિલ્હી, તા. 11 મે 2021, મંગળવાર

કોરોના કાળની અંદર ફૂડ એન્ડ ડ્રગ્સ એડમિનિસ્ટ્રેશને(એફડીએ) સોમવારે એક મહત્વનો નિર્ણય લીધો છે. એફડીએ દ્વારા 12થી 15 વર્ષના બાળકો માટે ફાઇજર-બાયોએનટેકની રસીને ઇમરજન્સી વપરાશ માટેની મંજૂરી આપી છે. એફડીએના અધિકારી જેનેટ વુડકૉકે આ નિર્ણયને કોરોના મહામારી સામેની લડતમાં મહત્વપૂર્ણ ગણાવ્યો છે. 

તેમણે કહ્યું કે આ નિર્ણય બાળકોના હિતમાં તો છે જ પરંતુ સાથે જ તેમને એક સામાન્ય જીવન જીવવામાં પણ મદદ કરશે. ઉલ્લેખનીય છે કે આ પહેલા ફાઇઝરની આ રસીને 16 વર્ષથી ઉપરના લોકો માટે મંજૂરી આપવામાં આવી હતી. જેનેટે જણાવ્યું કે બાળકોની રસીને મંજૂરી મળવાથી આપણે તેમને આ કોરોના મહામારીના પ્રકોપથી બચાવી શકીશું. આ નિર્ણય જીવનને સામાન્ય બનાવવામાં અને કોરોનાને હરાવવામાં મહત્વપૂર્ણ સાબિત થશે.

જેનેટે માતા પિતાને આ રસીને લઇને વિશ્વાસ અપાવ્યો છે. તેમણે કહ્યું કે કોઇ પણ ખચકાટ વગર બાળકોને રસી અપાવો. આ રસી તમમા પરીક્ષણોમાં સફળ થઇ છે. એફડીએ દ્વારા તમામ આંકડાને ગંભીરતાથી સમીક્ષઆ કરી છે અને ત્યારબાદ જ તેને મંજૂરી આપવામાં આવી છે. 

ઉલ્લેખનીય છે કે ફાઇજરે માર્ચ 2021માં કહ્યું હતું કે તેમની રસી 12 વર્ષથી મોટી ઉંમરના બાળકો માટે સુરક્ષિત છે. આ સિવાય અમેરિકાનો પુરતો પ્રયત્ન છે કે બાળકોની શાળા ખુલ્યા પહેલા તેમનું રસીકરણ કરી દેવામાં આવે. ફાઇજરે માર્ચ મહિનામાં આંકડા જાહેર કરીને કહ્યું હતું કે 12થી 15 વર્ષના 2260 વોલંટિયર્સને આ વેક્સિન આપવામાં આવી હતા, જેમાંથી એક પણ બાળકને કોરોના થયો નથી . ફાઇજરે આ રસી બાળકો માટે 100 ટકા અસરકારક હોવાનો દાવો કર્યો છે.