'અમેરિકા-ઈરાન ફરી મંત્રણા કરશે, અઠવાડિયામાં યોજાશે બેઠક...', પાકિસ્તાને કર્યો મોટો દાવો

Pakistan Updates on US-Iran Talks: અમેરિકા અને ઈરાન વચ્ચે 21 કલાક ચાલેલી મેરેથોન મંત્રણા કોઈપણ નક્કર સમજૂતી વિના પૂરી થઈ હોવા છતાં, મધ્યસ્થી કરી રહેલા પાકિસ્તાને હજુ પણ આશા છોડી નથી. પાકિસ્તાનના વિદેશ મંત્રી ઈશાક ડારે રવિવારે સવારે પત્રકાર પરિષદમાં જણાવ્યું હતું કે, મંત્રણા 'ગંભીર અને રચનાત્મક' રહી છે અને આવનારા 10 દિવસમાં વાટાઘાટોનો બીજો રાઉન્ડ શરૂ થઈ શકે છે.

પાકિસ્તાનની મધ્યસ્થી અને નવી આશા

પાકિસ્તાની સૂત્રો અને ન્યૂઝ ચેનલ અલ-મયાદીન મુજબ, અમેરિકન પ્રતિનિધિમંડળ નવા પ્રસ્તાવો અને નવી માંગણીઓ સાથે ટૂંક સમયમાં પરત ફરી શકે છે. સૌથી મહત્ત્વની વાત એ છે કે મંત્રણા ભલે સફળ ન થઈ હોય, પરંતુ બંને દેશો વચ્ચેનો 'સીઝફાયર' (યુદ્ધવિરામ) હજુ પણ ચાલુ રહેશે. પાકિસ્તાન આર્મી ચીફ અસીમ મુનીરે આ મધ્યસ્થીમાં સક્રિય ભૂમિકા ભજવી હતી અને બંને પક્ષોને સમજાવવાના પ્રયાસો કર્યા હતા.

કયા મુદ્દાઓ પર વાત અટકી?

ઈરાનના વિદેશ મંત્રાલયના પ્રવક્તાએ સ્વીકાર્યું હતું કે 2-3 મુખ્ય મુદ્દાઓ પર મતભેદ એટલા ઊંડા છે કે તાત્કાલિક સમજૂતી શક્ય નહોતી. ખાસ કરીને 'હોર્મુઝ સ્ટ્રેટ' (Strait of Hormuz) પર નિયંત્રણ અને સુરક્ષાને લઈને નવા અને જટિલ પ્રશ્નો ઊભા થયા છે. ઈરાને સ્પષ્ટ કર્યું છે કે તેઓ અવિશ્વાસના વાતાવરણમાં વાત કરી રહ્યા છે, તેથી એક જ બેઠકમાં ઉકેલની અપેક્ષા રાખવી વ્યવહારુ નથી.

કૂટનીતિના દરવાજા હજુ ખુલ્લા છે

ભલે જેડી વેન્સ અને તેમની ટીમ અત્યારે પરત ફરી રહી હોય, પરંતુ પાકિસ્તાનના જણાવ્યા મુજબ કૂટનીતિનો રસ્તો બંધ થયો નથી. આગામી રાઉન્ડમાં અમેરિકા તેના પ્રતિનિધિમંડળમાં ફેરફાર કરે તેવી પણ શક્યતા છે. પાકિસ્તાને પોતાને એક મજબૂત મધ્યસ્થી તરીકે સાબિત કર્યા છે અને હવે આખી દુનિયાની નજર આવતા અઠવાડિયે યોજાનારી સંભવિત બેઠક પર છે.