US South Korea Security Talks: ઉત્તર કોરિયાએ અમેરિકા-દક્ષિણ કોરિયાની સુરક્ષા વાર્તા અને બુસાન બંદરે અમેરિકન એરક્રાફ્ટ કેરિયરની હાજરી પર સખત વાંધો ઉઠાવ્યો છે. બેલિસ્ટિક મિસાઇલ પરીક્ષણના એક દિવસ પછી, ઉત્તર કોરિયાના સંરક્ષણમંત્રી નો ક્વાંગ ચૉલે શનિવારે જાહેરાત કરી કે પ્યોંગયાંગ હવે વધુ આક્રમક કાર્યવાહી કરશે.
અમેરિકા-દ. કોરિયાની સુરક્ષા ભાગીદારી તણાવનું કારણ
અમેરિકા અને દક્ષિણ કોરિયાની સુરક્ષા ભાગીદારીને કારણે ઉત્તર કોરિયાનો ગુસ્સો સતત વધી રહ્યો છે. તેણે સિયોલમાં થયેલી સુરક્ષા વાર્તા અને બુસાન પોર્ટ પર અમેરિકન એરક્રાફ્ટ કેરિયરની હાજરીની આલોચના કરી. સંરક્ષણ મંત્રી નો ક્વાંગ ચૉલે કહ્યું કે ઉત્તર કોરિયા અમેરિકન સૈન્યની હાજરી અને સુરક્ષા સહયોગ ક્ષેત્રમાં તણાવ વધારનારું પગલું માને છે, ખાસ કરીને આ સપ્તાહે પરમાણુ-સંચાલિત એરક્રાફ્ટ કેરિયર 'જ્યોર્જ વૉશિંગ્ટન' બુસાન બંદર પર પહોંચ્યા પછી.
મિસાઇલ પરીક્ષણ અને અમેરિકન પ્રતિબંધો
ઉત્તર કોરિયાએ પોતાની સુરક્ષા ચિંતાઓનો હવાલો આપીને એક દિવસ પહેલાં જ પૂર્વી તટ તરફ સમુદ્રમાં એક બેલિસ્ટિક મિસાઇલ છોડી હતી. આ મિસાઇલ પરીક્ષણ ગુરુવારે અમેરિકા દ્વારા લગાવવામાં આવેલા નવા પ્રતિબંધોની આલોચના કર્યા પછી થયું હતું. અમેરિકાએ આ પ્રતિબંધો એ ઉત્તર કોરિયન વ્યક્તિઓ અને સંસ્થાઓ પર લગાવ્યા છે જેમના પર સાયબર સંબંધિત મની લોન્ડ્રિંગ નેટવર્કમાં સામેલ હોવાનો આરોપ છે.
દક્ષિણ કોરિયાની પ્રતિક્રિયા
શનિવારે દક્ષિણ કોરિયાના સંરક્ષણ મંત્રાલયે આ મિસાઇલ લૉન્ચની કડક આલોચના કરી, જેમાં જણાવાયું કે ઉત્તર કોરિયાનું આ પગલું ક્ષેત્રીય સ્થિરતા માટે ગંભીર ખતરો છે. આ ઉપરાંત, મંત્રાલયે ઉત્તર કોરિયા દ્વારા અમેરિકા-દક્ષિણ કોરિયાની બેઠકની ટીકાને પણ દુર્ભાગ્યપૂર્ણ ગણાવી.
નો ક્વાંગ ચૉલે હાલમાં અમેરિકા અને દક્ષિણ કોરિયાના સંરક્ષણ મંત્રીઓની કોરિયન સરહદ વિસ્તારની મુલાકાત પર પણ વાંધો ઉઠાવ્યો હતો. તેમણે આરોપ મૂક્યો કે, બંને દેશ ઉત્તર કોરિયા વિરુદ્ધ સૈન્ય રોકથામ વધારવા અને તેમના પરંપરાગત તેમજ પરમાણુ હથિયારોને એકીકૃત કરવાની યોજના બનાવી રહ્યા છે. તેમણે સ્પષ્ટ કર્યું કે, આ ડીપીઆરકે (Democratic People’s Republic of Korea) વિરુદ્ધ તેમના શત્રુતાપૂર્ણ સ્વભાવનો ખુલ્લો અને સ્પષ્ટ ઇરાદો છે.
અમેરિકાનું નિવેદન અને ધમકી
મંગળવારે, અમેરિના સંરક્ષણ મંત્રી પીટ હેગસેથે જણાવ્યું હતું કે, અમેરિકા-દક્ષિણ કોરિયાના ગઠબંધનનું મુખ્ય ધ્યાન ઉત્તર કોરિયાને રોકવા પર રહેશે. જોકે, વોશિંગ્ટન ક્ષેત્રીય જોખમોને ધ્યાનમાં રાખીને દક્ષિણ કોરિયામાં તૈનાત પોતાના સૈનિકોની તૈનાતીમાં પણ થોડો ફેરફાર કરવાનું વિચારી રહ્યું છે.
આ ઉપરાંત, નો ક્વાંગ ચૉલે દાવો કર્યો કે અમેરિકન એરક્રાફ્ટ કેરિયર 'જ્યોર્જ વૉશિંગ્ટન'ની બુસાનમાં એન્ટ્રી અને તાજેતરમાં થયેલા અમેરિકા-દક્ષિણ કોરિયાના સંયુક્ત હવાઈ અભ્યાસોએ પરિસ્થિતિને વધુ ભડકાવી છે. તેમણે ચેતવણી આપતા કહ્યું કે, 'અમે દુશ્મનોની ધમકીઓ સામે સુરક્ષાની ખાતરી કરવા અને શાંતિ જાળવવાના સિદ્ધાંત પર વધુ આક્રમક કાર્યવાહી કરીશું.'
આ પણ વાંચો: અમેરિકામાં શટડાઉનની અસર દેખાવા લાગી, 40 એરપોર્ટ પર 1000થી વધુ ફ્લાઈટ કેન્સલ
ટ્રમ્પની વાતચીતની ઈચ્છા
બીજી તરફ, દક્ષિણ કોરિયાની નૌસેનાએ સ્પષ્ટતા કરી કે એરક્રાફ્ટ કેરિયરનો આ પ્રવાસ માત્ર લોજિસ્ટિક્સ સપ્લાય અને ક્રૂને આરામ આપવા માટેનો હતો. આ દરમિયાન, અમેરિકન પ્રમુખ ડોનાલ્ડ ટ્રમ્પે ગયા સપ્તાહે દક્ષિણ કોરિયાની યાત્રામાં ફરીથી પોતાની ઈચ્છા વ્યક્ત કરી હતી કે તેઓ ઉત્તર કોરિયાના નેતા કિમ જોંગ ઉન સાથે ફરી વાતચીત કરવા માંગે છે. ભલે મુલાકાત ન થઈ શકી, પરંતુ ટ્રમ્પે કહ્યું કે, તેઓ ટૂંક સમયમાં ક્ષેત્રમાં પાછા ફરીને કિમ સાથે મળવા માટે તૈયાર છે.
ઉલ્લેખનીય છે કે ગયા સપ્તાહે, જ્યારે ટ્રમ્પ અને અન્ય વૈશ્વિક નેતાઓ દક્ષિણ કોરિયામાં પ્રાદેશિક બેઠકો માટે એકઠા થઈ રહ્યા હતા, ત્યારે જ ઉત્તર કોરિયાએ કોરિયન દ્વીપકલ્પના પશ્ચિમી ભાગમાં ક્રૂઝ મિસાઇલોનું પણ પરીક્ષણ કર્યું હતું.
