Brazil Love Story : બ્રાઝિલના સેલિનોપોલિસની 26 વર્ષીય એલિસેન સિલ્વાની ઊંચાઈ અસાધારણ 6.8 ફૂટ છે, જે 5.4 ફૂટની ઊંચાઈ ધરાવતા તેના પતિ ફ્રાન્સિનાલ્ડો દા સિલ્વા કાર્વાલ્હો કરતાં ઘણી ઊંચી છે. બંનેની ઊંચાઈમાં બે ફૂટનો નોંધપાત્ર તફાવત હોવા છતાં તેમની પ્રેમકથા સ્વીકૃતિ અને મક્કમતાના પુરાવા તરીકે ઊભરી આવી છે. આ કપલની લવ સ્ટોરી અને લગ્ન જીવન ઓનલાઈન ચર્ચાનો વિષય બની ગયા છે.
બ્રાઝિલની લગભગ સાત ફૂટ ઊંચી મહિલાના લગ્ન પાંચ ફૂટ ચાર ઈંચની હાઈટ ધરાવતા યુવક સાથે થયા હતા. બંને જ્યારે ઘરની બહાર નીકળે છે ત્યારે લોકોની નજર તેમના પર જ ચોંટેલી હોય છે. મહિલાએ જણાવ્યું કે કેવી રીતે ઊંચાઈને કારણે તેમણે લોકોના વિચિત્ર પ્રત્યાઘાતોનો સામનો કરવો પડે છે. તેમની પ્રેમ કહાની અને લગ્ન જીવન ઓનલાઈન વાયરલ થવાથી આ કપલ હાલ ચર્ચાનું કેન્દ્ર બન્યું છે.એલિસેનનો અસામાન્ય વિકાસ દસ વર્ષની ઉંમરે શરૂ થયો હતો જ્યારે તેની ઊંચાઈ લગભગ છ ફૂટ હતી જે તેના પરિવારના સભ્યો કરતાં ઘણી વધુ હતી.
ઝડપી વૃદ્ધિની સાથે, તેના હાડકાં અને માથામાં પીડાદાયક દબાણ પણ હતું. પાછળથી ડોક્ટરોએ તેની કફોત્પાદક ગ્રંથિ પર એક સૌમ્ય ગાંઠ શોધી કાઢી, જેના કારણે વૃદ્ધિ હોર્મોનનું પ્રમાણ વધુ પડતું હતું.- આ સ્થિતિને જાઈજેન્ટિઝમ તરીકે ઓળખવામાં આવે છે.તેના પરિવારને તબીબી પરીક્ષણો પરવડતા નહોતા, પણ તેમને ત્યારે રાહત મળી જ્યારે એક બ્રાઝિલિયન ટીવી નેટવર્કે તેની વાર્તાના બદલામાં તેનો મેડિકલ ખર્ચ ભોગવવાની ઓફર આપી. જોકે તેને પોતાની સમસ્યાના જવાબ મળ્યા હોવા છતાં તેનું સ્કૂલ જીવન અસહ્ય હતું. સતત સતામણીને કારણે તેણે ૧૭ વર્ષની વયે અભ્યાસ છોડવો પડયો જેના પરિણામે તે એકલી પડી ગઈ અને ભાવિ પણ અનિશ્ચિત બન્યું.
પણ 2011માં ફ્રાન્સિનાલ્ડો સાથે મુલાકાત થયા પછી બધું બદલાઈ ગયું. તેણે એલિસેન સાથે દયા અને ગૌરવયુક્ત વર્તન કર્યું અને ઊંચાઈની પરવા ન કરનાર તેના જીવનનો પ્રથમ વ્યક્તિ બન્યો. આ દંપતીએ 2015માં લગ્ન કર્યા અને બાદમાં તેમને પુત્ર થયો જે હાલ ત્રણ વર્ષનો છે અને જેની ઊંચાઈ સામાન્ય છે.
બ્રાઝિલની સૌથી ઊંચી મહિલા તરીકે ઓળખાતી હોવા છતાં, એલિસેન પોતાની વિશિષ્ટતાને સ્વીકારવાનું શીખી ગઈ છે. એક સમયે તે પોતાના દેખાવથી શરમાતી હતી, પરંતુ હવે તે એક વ્યાવસાયિક મોડેલ બનવાનું તેનું સ્વપ્ન સાકાર કરવા મથી રહી છે. જો કે હજી સુધી કોઈ એજન્સીઓએ તેની સાથે કોઈ કરાર નથી કર્યા, પણ પોર્ટફોલિયો બનાવ્યો હોવાથી તેનો આત્મવિશ્વાસ વધ્યો છે અને તેને પોતાને સ્વીકારવામાં મદદ મળી છે.
આજે એલિસેનને પોતાના પર ગર્વ છે, અને તેના માટે તે પોતાના પરિવારની આભારી છે અને અન્ય લોકોને પ્રેરણા આપવા માટે પણ કટિબદ્ધ છે. તેનો સંદેશ સરળ છતાં શક્તિશાળી છે: 'કઠોર શબ્દોની ઉપેક્ષા કરો, તેને તમારી ઓળખ બનવાની તક ન આપો. તેના સ્થાને તમારી વિશિષ્ટતાનો સ્વીકાર કરો અને પ્રેમ તેમજ આત્મવિશ્વાસ સાથે જીવો.'
