ઈરાનનાં પ્રમુખ 'મોજતમા-ખામેનેઈને' કારમાં મળ્યા પરંતુ તે વ્યક્તિ મોજતબા જ હતી કે કેમ તે વિષે તેમને શંકા છે

• તહેરાનમાં અજ્ઞાત સ્થળે રાત્રીના અંધકારમાં કારમાં મળ્યા, પરંતુ તેમને જોઈ ન શક્યા : હાથ પણ મેળવ્યા નહીં

તહેરાન : એક તરફ મોજતબા ખામેનેઈની ક્યાં છે તે વિષે અનિશ્ચિતતા પ્રવર્તી રહી છે તેવામાં ઈરાનના પ્રમુખ મસૂદ પેઝેશ્કીયાન અહીંનાં કોઈ અજ્ઞાત સ્થળે માત્ર થોડી મીનીટો પૂરતા જ તેઓને મળી શક્યા અને તે પણ અંધારી રાત્રીએ, કાળા કાચ ચઢાવેલી બંધ મોટરમાં જેમાં પેઝેશ્કીયાન તેમને જોઈ પણ શક્યા ન હતા. માત્ર અવાજ સંભળાતો હતો, જે ખામેનીનો હોવાનું લાગતું હતું.
આ બંધ મોટરમાં, ખામેનેઈ આગળની સીટ ઉપર બેઠા હતા, જ્યારે પેઝેશ્કીયાન પાછળની સીટ ઉપર બેઠા હતા. બંને વચ્ચે માત્ર થોડી મિનિટો સુધી જ વાતચીત થઈ હતી. તેઓ વચ્ચે હસ્તધૂનન પણ થયું ન હતું. આથી ખામેનેઈની તંદુરસ્તી અંગે બહુવિધ તર્કો શરૂ થઈ ગયા છે.
ઉલ્લેખનીય છે કે, આ પૂર્વે થોડા જ દિવસે અમેરિકી પ્રમુખ ડોનાલ્ડ ટ્રમ્પે કહ્યું હતું કે, મોજતબા ખામેનેઇ અમેરિકા-ઈઝરાયલના હુમલામાં ગંભીર રીતે ઘાયલ થયા છે.
બ્રિટનથી પ્રસિદ્ધ થતાં, ઈરાનનાં ઈન્ટરનેશનલે ખામેનેઈ-પેઝેશ્કીયાન મુલાકાત અંગે આ અહેવાલ પ્રસિદ્ધ કર્યો હતો.
આ રીપોર્ટ ગત મે માસમાં બંને નેતાઓ વચ્ચે યોજાયેલી મુલાકાતથી તદ્દન વિરોધાભાસી જ રહ્યો છે. તે વખતે બંને નેતાઓ વચ્ચે અઢી-કલાક સુધી મંત્રણાઓ ચાલી હતી. તે મંત્રણા અંગે પ્રમુખ પેઝેશ્કીયાને કહ્યું હતું કે મંત્રણાઓ સાલસભર્યા વાતાવરણમાં યોજાઈ હતી. પરંતુ આ વખતની મંત્રણાઓ તે મંત્રણા કરતાં તદ્દન જુદી જ હતી.
મંત્રણા માટે તેમને પહેલેથી જ જણાવ્યા પ્રમાણે પેઝેશ્કીયાનને શહેરનાં કોઈ તહેરાનના છેડાના ભાગે આવેલાં અજ્ઞાત સ્થળે લઈ જવાયા ત્યાં એક કાર ઊભી હતી. આસપાસ લાઇટો પણ ન હતી, કે મોટરની રૂફ લાઇટ પણ ચાલુ ન હતી. બારીનાં કાચ બંધ હતા અને કાળા હતા. તે મોટરમાં આગળની સીટમાં ખામેનેઈ બેઠા હતા, પરંતુ તેમનું મુખ દેખાતું ન હતું, કારણ કે, પેઝેશ્કીયાનને પાછળની સીટમાં બેસવા જણાવાયું હતું. આથી પેઝેશ્કીયાનને શંકા ગઈ કે, ખરેખર તે વ્યક્તિ જેની સાથે તેઓ વાત કરી રહ્યા છે. તે ખરેખર મોજતબા ખામેનેઈ હશે કે કેમ ? વળી આ મંત્રણા માત્ર થોડી મીનીટો પૂરતી જ ચાલી. આથી પેઝેશ્કીયાનને અત્યંત માઠું લાગ્યું હતું. કોઈ ઔપચારિક હસ્તધૂનન પણ કરવામાં આવ્યાં ન હતાં.
હવે બીજી મીટીંગ થશે કે કેમ ? તેવું મોટરમાંથી બહાર નીકળી બહાર ઉભેલાઓને પૂછ્યું ત્યારે સ્પષ્ટ 'ના' કહેવામાં આવી.
આ પૂર્વે પ્રમુખ ટ્રમ્પે કહ્યું હતું કે 'ખામેનેઈ ખતમ થયા હોય તેમ ૯૦ ટકા લાગે છે. તેમની (ઈરાનની) પાસે નથી નેવી કે એરફોર્સ બધું જ ખતમ છે. એન્ટી-એરક્રાફ્ટ-ગન પણ ખતમ છે. તેમના લગભગ બધાં જ નેતાઓ ખતમ થઈ ગયા છે.' ટ્રમ્પનું આ કથન સાચું ઠર્યું હોય તેમ લાગે છે.