ઈરાને યુદ્ધ રોકવા મૂકી 3 મોટી શરત: રાષ્ટ્રપતિ પેઝેશ્કિયને કહ્યું - 'મંજૂર હોય તો જ અટકશે જંગ'

Iran and Israel - USA War Updates : પશ્ચિમ એશિયામાં અમેરિકા, ઇઝરાયલ અને ઈરાન વચ્ચે ચાલી રહેલું ભીષણ યુદ્ધ હવે નિર્ણાયક મોડ પર પહોંચ્યું છે. વૈશ્વિક અર્થતંત્ર પર આ જંગની માઠી અસરો વચ્ચે ઈરાને પહેલીવાર યુદ્ધ વિરામ માટે પોતાની શરતો દુનિયા સામે મૂકી છે.

શાંતિ માટે ઈરાનનો 'રોડમેપ'

ઈરાન અને અમેરિકા-ઇઝરાયલ વચ્ચેના યુદ્ધને બે અઠવાડિયા જેટલો સમય થવા આવ્યો છે ત્યારે ઈરાનના રાષ્ટ્રપતિ મસૂદ પેઝેશ્કિયને સોશિયલ મીડિયા પ્લેટફોર્મ 'X' પર સ્પષ્ટ કર્યું છે કે ઈરાન કયા સંજોગોમાં પાછળ હટશે. તેમણે જણાવ્યું કે જો આંતરરાષ્ટ્રીય સ્તરે ઈરાનની માંગણીઓ સંતોષવામાં આવે તો જ તેહરાન યુદ્ધ સમાપ્ત કરવા માટે તૈયાર છે.

Talking to leaders of Russia and Pakistan, I reaffirmed Iran’s commitment to peace in the region. The only way to end this war—ignited by the Zionist regime & US—is recognizing Iran’s legitimate rights, payment of reparations, and firm int'l guarantees against future aggression.

— Masoud Pezeshkian (@drpezeshkian) March 11, 2026

ઈરાનની 3 મુખ્ય શરતો:

1. વૈધ અધિકારોની માન્યતા: આંતરરાષ્ટ્રીય સ્તરે ઈરાનના કાનૂની અને વ્યૂહાત્મક અધિકારોને સ્વીકારવામાં આવે.

2. યુદ્ધનું વળતર (હરજાણું): જંગ દરમિયાન ઈરાનને થયેલા આર્થિક અને માળખાગત નુકસાનની ભરપાઈ અમેરિકા અને ઇઝરાયલ દ્વારા કરવામાં આવે.

3. આંતરરાષ્ટ્રીય ગેરંટી: ભવિષ્યમાં ઈરાન પર કોઈ પણ પ્રકારના હુમલા નહીં થાય તેની નક્કર આંતરરાષ્ટ્રીય સુરક્ષા ગેરંટી આપવામાં આવે.

રશિયા અને પાકિસ્તાન સાથે પરામર્શ

રાષ્ટ્રપતિ પેઝેશ્કિયને જણાવ્યું કે તેમણે રશિયા અને પાકિસ્તાનના નેતાઓ સાથે પણ આ મુદ્દે વાતચીત કરી છે. તેમણે આ સંઘર્ષ માટે અમેરિકા અને ઇઝરાયલને જવાબદાર ઠેરવતા કહ્યું કે, "ઝાયોનિસ્ટ શાસન અને અમેરિકાએ આ લડાઈ શરૂ કરી છે. અમે વિસ્તારમાં શાંતિ ઈચ્છીએ છીએ, પરંતુ તેના માટે જવાબદાર દેશોએ જવાબદેહી સ્વીકારવી પડશે."

વૈશ્વિક અર્થતંત્ર પર જોખમ

આ યુદ્ધને કારણે 'સ્ટ્રેટ ઓફ હોર્મુઝ'માં સર્જાયેલા તણાવથી ક્રૂડ ઓઈલ અને ગેસના ભાવમાં ભડકો થયો છે. દરિયાઈ માર્ગે તેલ ટેન્કરોની અવરજવર ખોરવાતા વિશ્વભરમાં મોંઘવારી વધવાની આશંકા છે. 28 ફેબ્રુઆરીએ અમેરિકા-ઇઝરાયલના હુમલાથી શરૂ થયેલો આ સંઘર્ષ હવે તેહરાન દ્વારા ડ્રોન અને મિસાઈલ હુમલાના સ્વરૂપે જોર્ડન અને ઈરાક સુધી ફેલાયો છે.