Trump Cuts Tariffs on Key Food Items: અમેરિકન પ્રમુખ ડોનાલ્ડ ટ્રમ્પે શુક્રવારે એક મોટી જાહેરાત કરીને અમેરિકન ગ્રાહકોને રાહત આપી છે. તેમણે કોફી, ઉષ્ણકટિબંધીય ફળો અને અન્ય ઘણી જરૂરી વસ્તુઓ પરના આયાત ટેરિફમાં ઘટાડો કર્યો છે. વ્હાઇટ હાઉસનો આ નિર્ણય એવા સમયે આવ્યો છે જ્યારે યુએસ ગ્રાહકો માટે વધતા ખર્ચને નિયંત્રણમાં લેવાનો પ્રયાસ ચાલી રહ્યો છે, જે ટ્રમ્પની વેપાર નીતિમાં એક મોટો અને અણધાર્યો ફેરફાર ગણાય છે.
ટ્રમ્પે અગાઉ ઘરેલું ઉત્પાદનને પ્રોત્સાહન આપવાના હેતુથી આયાતી માલ પર ટેરિફ લાદવાની નીતિ અપનાવી હતી. પરંતુ અમેરિકન આહારના મુખ્ય ખાદ્યપદાર્થો પરના આ ટેરિફ હટાવવાનો નિર્ણય તાજેતરની વચ્ચેના ગાળાની ચૂંટણીઓ પછી લેવાયો છે. આ ચૂંટણીઓમાં આર્થિક ચિંતાઓ મુખ્ય મુદ્દો બની હતી, જેના પરિણામે ડેમોક્રેટ્સની જીત થઈ હતી. એવામાં ફ્લોરિડાના પ્રવાસે જતી વખતે એર ફોર્સ વન પર પત્રકારો સાથે વાત કરતા ટ્રમ્પે કહ્યું, 'અમે કોફી જેવા કેટલાક ખાદ્યપદાર્થો પર થોડી રાહત આપી છે.'
ટેરિફ, મોંઘવારી અને રાજકીય પ્રતિક્રિયાઓ
ડોનાલ્ડ ટ્રમ્પને જ્યારે પૂછવામાં આવ્યું કે, 'શું તેમના ટેરિફને કારણે અમેરિકનો માટે ભાવો વધ્યા છે, ત્યારે તેમણે સ્વીકાર્યું કે, અમુક કિસ્સાઓમાં આવું બન્યું હોઈ શકે છે, પરંતુ મોટાભાગનો બોજ અન્ય દેશોએ ઉઠાવ્યો છે.
જાન્યુઆરીમાં તેમણે પદ સંભાળ્યું ત્યારથી મોંઘવારી ગાયબ થઈ ગઈ હોવાના ટ્રમ્પના વારંવારના દાવાઓ છતાં ફુગાવો ઊંચો રહ્યો છે, જેનાથી ઘરના બજેટ પર દબાણ વધ્યું છે. વહીવટીતંત્ર દલીલ કરે છે કે ટેરિફ મુખ્યત્વે સરકારી આવક વધારવામાં મદદરૂપ થયા છે. જોકે, ડેમોક્રેટ્સે શુક્રવારના આ ટેરિફ કપાતને એવી મૌન સ્વીકૃતિ તરીકે જોયું કે આ નીતિઓથી અમેરિકન ગ્રાહકોને નુકસાન થયું હતું.
ટેરિફ કપાતથી અમુક ઉત્પાદનો સસ્તા
એપ્રિલમાં વૈશ્વિક સ્તરે લાદવામાં આવેલા ટેરિફને કારણે ઘણા મુખ્ય ખાદ્યપદાર્થોના ભાવ વધ્યા હોવાની ટીકાનો ટ્રમ્પે સામનો કર્યો હતો. જોકે, નવા એક્ઝિક્યુટિવ ઓર્ડર હેઠળ ટેરિફની કપાત થવાથી, અમેરિકનો માટે ઘણા ઉત્પાદનો વધુ સસ્તા બનશે.
જે વસ્તુઓ પરના ટેરિફ દૂર કરવામાં આવ્યા છે તેમાં મુખ્યત્વે ચા, ફ્રૂટ જ્યુસ, કોકોઆ, મસાલા, કેળા, સંતરા, ટમેટાં અને અમુક ખાતરોનો સમાવેશ થાય છે. આમાંના મોટાભાગના ઉત્પાદનો યુએસમાં બનતા નથી, તેથી ટેરિફ હટાવવાથી ગ્રાહકોને ભાવમાં રાહત મળવાની અપેક્ષા છે.
તેમજ અમેરિકાના ફૂડ ઇન્ડસ્ટ્રી એસોસિએશને આ નિર્ણયને આવકારતા તેને ઝડપી ટેરિફ રાહત ગણાવી છે, જે સપ્લાય ચેઇનની સમસ્યાઓ વચ્ચે જરૂરી છે. વ્હાઇટ હાઉસે સ્પષ્ટતા કરી કે ઇક્વાડોર અને આર્જેન્ટિના જેવા ભાગીદારો સાથેના નવા વેપાર કરારોને કારણે કેટલાક ટેરિફની હવે જરૂર નથી, જે યુએસ નિકાસને પ્રોત્સાહન આપવા માટે પણ મદદરૂપ થશે. જોકે ટ્રમ્પે અઠવાડિયાની શરૂઆતમાં જ કોફી પરના ટેરિફ ઘટાડવાનો સંકેત આપ્યો હતો.
ટેરિફ આવકથી દેવું ઘટાડવાની યોજના
ટ્રમ્પે સંકેત આપ્યો કે ટેરિફમાંથી મળેલી આવકનો ઉપયોગ 2026માં ઘણા અમેરિકનોને $2000ની ચૂકવણી કરવા માટે થઈ શકે છે, જોકે તેમણે ચોક્કસ સમયરેખા આપી નથી. તેમણે એવો પણ ઈશારો કર્યો કે આ ભંડોળ રાષ્ટ્રીય દેવું ઘટાડવા માટે વાપરી શકાય છે. ફુગાવાની ચિંતાઓ સામે બચાવ કરતા ટ્રમ્પે કહ્યું કે, 'આ કમાયેલા નાણાં છે, બનાવટી નથી. ધનિકો સિવાય દરેકને આ વાસ્તવિક નાણાં મળશે, જે અન્ય દેશોમાંથી આવે છે.'
